រាជធានីភ្នំពេញ ៖ លោកឧកញ៉ា ភួ ពុយ ប្រធានក្រុមប្រឹក្សាភិបាល និងជាអគ្គនាយកធនាគារស្រូវកម្ពុជា ភី អិល ស៊ី បានគូសបញ្ជាក់ថា ធនាគារស្រូវត្រូវបានបង្កើតឡើងជាមួយដៃគូភាគហ៊ុន ក្នុងនោះទុនសាកល្បងសម្រាប់ដំណើរការក្នុងឆ្នាំ២០១៤-២០១៥នេះគឺប្រហែលបរិមាណស្រូវចំនួន៧ម៉ឺនទៅ១សែនតោន។
រាជធានីភ្នំពេញ ៖ លោកឧកញ៉ា ភួ ពុយ ប្រធានក្រុមប្រឹក្សាភិបាល និងជាអគ្គនាយកធនាគារស្រូវកម្ពុជា ភី អិល ស៊ី បានគូសបញ្ជាក់ថា ធនាគារស្រូវត្រូវបានបង្កើតឡើងជាមួយដៃគូភាគហ៊ុន ក្នុងនោះទុនសាកល្បងសម្រាប់ដំណើរការក្នុងឆ្នាំ២០១៤-២០១៥នេះគឺប្រហែលបរិមាណស្រូវចំនួន៧ម៉ឺនទៅ១សែនតោន។
លោកឧញ៉ា ភួ ពុយ បានលើកឡើងយ៉ាងដូច្នេះក្នុងសិក្ខាសិលាផ្សព្វផ្សាយអំពីគោលការណ៍ និងដំណើរការអនុវត្តន៍ នៃការបើកទីផ្សារស្តុកបញ្ចាំស្រូវ-អង្ករ របស់ធនាគារស្រូវកម្ពុជា ដែលបានធ្វើឡើងកាលពីថ្ងៃទី២៨ សីហា នៅសណ្ឋាគារសាន់វេ។
លោកឧញ៉ា ភួ ពុយ បានគូសបញ្ជាក់បន្ថែមថា ការបង្កើតការស្តុកស្រូវត្រឹម១សែនតោននេះមិនមែនជារឿងធំដុំឡើយ ប៉ុន្តែយើងចង់បង្ហាញពីគោលបំណងក្នុងការបង្កើតធនាគារស្រូវនេះឡើងគឺជាចំណុចកណ្តាលមួយដើម្បីបង្កលក្ខណៈងាយស្រួលដល់ប្រធានកិនស្រូវ និងអ្នកនាំចេញ ហើយនឹងឈានទៅដល់ភាពល្អប្រសើរមួយក្នុងការពង្រីកស្តុកសម្រាប់ការនាំចេញនៅឆ្នាំជាបន្តបន្ទាប់។ លោកបន្តថា ធនាគារស្រូវបានបង្កើតនូវមជ្ឈមណ្ឌលស្រូវ អង្ករ ដែលរួមមានកន្លែងថ្លឹង ម៉ាស៊ីនសម្ងួត ឃ្លាំងវេចខ្ចប់ និងឃ្លាំងស្តុកដែលមានទីតាំនៅក្នុងខេត្តបាត់ដំបង ដែលមជ្ឈមណ្ឌលកណ្តាលនេះជាទីតាំងប្រមូលផ្តុំលើសេវាកម្មស្តុក បញ្ចាំ និងសេវាកម្មផ្សេងៗទៀតជាមួយកសិករ ឈ្មួញ ស្រូវ អង្ករ រោងម៉ាស៊ីនកិនស្រូវ និងអ្នកនាំចេញអង្ករផ្សេងៗ។ ធនាគារស្រូវនឹងដើរតួសកម្ម និងជាដៃគូច្បាស់លាស់ សម្រាប់បំពេញបន្ថែមលើកត្តាបរិមាណទៅដល់រោងម៉ាស៊ីនកិនស្រូវ អ្នកនាំចេញដែលមានតម្រូវការនាំចេញច្រើន ដែលលើសពីសមត្ថភាពស្តុកដែលខ្លួនមាន។ ដូច្នេះពួកគាត់លែងមានក្តីបារម្ភអំពីបញ្ហាខាងលើ និងមិនចាំបាច់ចំណាយប្រាក់កសាងឃ្លាំងស្តុកដែលនាំឲ្យខ្វះខាតទុនបង្វិលរបស់ខ្លួននោះឡើយ។ ជារួមធនាគារស្រូវគឺជាអ្នកបំរើពិតប្រាកដទាំងបរិមាណ ទាំងគុណភាពសម្រាប់អ្នកនាំចេញអង្ករ។
លោកឧកញ៉ាបញ្ជាក់ថា ក្នុងរយៈពេល៣ឆ្នាំទៅមុខ ធនាគារស្រូវមានផែនការពង្រីកឃ្លាំងប្រមូលស្តុកបញ្ចាំនៅតាមបណ្តាខេត្តគោលដៅបន្តទៀត ក្នុងគោលបំណងទទួល និងបំរើបរិមាណរាប់លានតោនសម្រាប់ផ្តល់សេវាកម្មនានា ជាមួយម៉ាស៊ីនកិនស្រូវ និងអ្នកនាំចេញអង្ករ ៕
ចែករំលែកព័តមាននេះ