រាជធានីភ្នំពេញ ៖ បើគ្មានអ្វីប្រែប្រួលនោះទេ លទ្ឋផលប្រឡងសញ្ញាបត្រទុតិយភូមិ ឬ បាក់ឌុប នឹងត្រូវប្រកាសនៅចន្លោះម៉ោង៤ទៅ៥រសៀលថ្ងៃទី២៩ សីហាស្អែកនេះ សម្រាប់មណ្ឌលរាជធានីភ្នំពេញ និង ខេត្តកណ្តាល ហើយសម្រាប់នៅតាមខេត្តទូទំាងប្រទេសនឹងប្រកាសនៅថ្ងៃទី៣០ សីហា ។
នេះបើយោងតាមប្រភពពីមន្រ្តីក្រសួងអប់រំ យុវជននិងកីឡា ដែលបា្រប់កោះសន្តិភាពនៅព្រឹកថ្ងៃទី២៨ សីហា ២០១៤ ប៉ុន្តែមន្រ្តីដដែលមិនបានបង្ហើបឲ្យដឹងពិតបា្រកដពីតួលេខ ថាតើមានបេក្ខជនប៉ុន្មានភាគរយដែលត្រូវជាប់សម្រាប់ឆ្នាំសិក្សា២០១៣-២០១៤នេះទេ ដោយគ្រាន់តែបញ្ជាក់ថា លទ្ឋផលវាយតម្លៃជាមធ្យមភាគពិតបា្រកដ អាចនឹងដឹងនៅត្រឹមម៉ោង២រសៀលថ្ងៃស្អែក ។
យ៉ាងណាក៍ដោយបើតាមលោក ហង់ ជួនណារ៉ុន រដ្ឋមន្រ្តីក្រសួងអប់រំ យុវជននិងកីឡា បានឲ្យដឹងកាលពីពេលថ្មីៗនេះថា ” ព័ត៌មានបឋម សិស្សបាក់ឌុបឆ្នាំនេះ ជាប់ក្នុងរង្វង់៣០ភាគរយ ” ។
ចំណែកសម្តេចតេជោ ហ៊ុន សែន កាលពីថ្ងៃទី១១ សីហា ២០១៤ ក្នុងឱកាសអញ្ជើញចែកសញ្ញាបត្រដល់ជ័យលាភីនិស្សិតសាកលវិទ្យាល័យន័រតុនក៍បានបញ្ជាក់ស្រដៀងគ្នានឹងលោករដ្ឋមន្រ្តីក្រសួងអប់រំដែរថា ” សិស្សប្រឡងបាក់ឌុបឆ្នាំនេះ អាចនឹងធ្លាក់ច្រើនជាងបណ្តាឆ្នាំកន្លងទៅ ក្នុងរង្វង់៣០ភាគរយ ” ។ យ៉ាងណាក៍ដោយក្នុងឱកាសនោះដែរ សម្តេចតេជោ ហ៊ុន សែន ក៍បានប្រកាសគំាទ្រក្រសួងអប់រំក្នុងការឲ្យមានការប្រឡងលើកទី២ សម្រាប់បេក្ខជនដែលធ្លាក់ ។
បើតាមលោករដ្ឋមន្រ្តីក្រសួងអប់រំ ហង់ ជួនណារ៉ុន ការប្រឡងលើកទី២ នឹងត្រូវប្រព្រឹត្តធ្វើនៅថ្ងៃទី១៣ តុលា ២០១៤ ដោយក្រសួងបានត្រៀមវគ្គបំប៉នដល់បេក្ខជនមិនជាប់តាមមុខវិជ្ជា និង ទុកពេលឲ្យសិស្សានុសិស្សរំលឹកមេរៀនផងដែរ ។
សូមបញ្ជាក់ថា សម្រាប់ឆ្នាំសិក្សា២០១៣-២០១៤ បេក្ខជនដែលត្រូវប្រឡងយកសញ្ញាបត្រទុតិយភូមិ ឬ បាក់ឌុបសរុប ៩ម៉ឺន ៣ពាន់ ៤៥៦នាក់ សម័យប្រឡងថ្ងៃទី០៤-០៥ សីហា ២០១៤ ។
គួររំលឹកដែរថា កាលពីឆ្នាំសិក្សា២០១២-២០១៣ មានបេក្ខជនដែលមកប្រឡងសរុប ១០ម៉ឺន ៥ពាន់ ២៩៧នាក់ ហើយបេក្ខជនដែលប្រឡងជាប់សរុប ៩ម៉ឺន ១៣៧០នាក់ គិតជាមធ្យម ជាប់៨៦,៧៧ភាគរយ ៕
ចែករំលែកព័តមាននេះ