រាជធានីភ្នំពេញ ៖ បុរសម្នាក់ត្រូវស្រ្តីដៃដល់កាប់នឹងកាំបិតប័ុងតោ បណ្តាលឱ្យរងរបួសខណៈចូលទៅជួយប្រពន្ធនឹងកូន ពីការដេញកាប់ប្រហាររបស់ស្រ្តីដៃដល់ជាកូនបំណុលដែលខឹងម្ចាស់បំណុលនិយាយផ្លែផ្កាដាក់ឱ្យរឿងជំពាក់លុយមិនសង ។ ហេតុការណ៍នេះកើតឡើងកាលពីវេលាម៉ោង ៧និង១៥ នាទីយប់ ថ្ងៃទី២៧ សីហា ២០១៤ នៅក្បែរកន្លែងលក់រថយន្តក្រុម ហ៊ុន L.M ស្ថិតក្នុងក្រុមទី៣ ភូមិតាងួន សង្កាត់កាកាប ខណ្ឌពោធិ៍សែនជ័យ ។
ស្រ្តីដៃដល់ដែលជាកូនបំណុលឈ្មោះ លឹមគឿន លីន អាយុ៤៥ ឆ្នាំ មុខរបរលក់ដូរ ស្នាក់នៅផ្ទះជួលកន្លែងកើតហេតុ ចំណែកបុរសរងគ្រោះឈ្មោះ រដ្ឋ សុខា អាយុ៥០ឆ្នាំ មុខរបរជួសជុលម៉ូតូ ស្នាក់នៅផ្ទះលេខ៣៤១ ផ្លូវលំ ក្រុមទី២ ភូមិតាងួន សង្កាត់កាកាប ខណ្ឌពោធិ៍សែនជ័យ ជាប្តីស្រ្តីម្ចាស់បំណុល។
ប្រភពព័ត៌មានបានឱ្យដឹងថា នៅមុនពេលកើតហេតុ ប្រពន្ធនិងកូនបុរសរងគ្រោះបាននិយាយផ្លែផ្កាដាក់ស្រ្តីដៃដល់ដែលជំពាក់លុយ ១២០ដុល្លាររាប់ខែហើយមិនសង ពេលនោះស្រ្តីដែលជាកូនបំណុលទ្រាំនឹងសម្តីផ្លែផ្ការបស់ម្ចាស់បំណុលមិនបានក៏ទាញកាំបិតប័ុងតោដេញកាប់ស្រ្តីម្ចាស់បំណុលនិងកូន ឃើញដូច្នេះបុរសរងគ្រោះបានចូលទៅជួយប្រពន្ធនិងកូនស្រាប់តែស្រ្តីដៃដល់កាប់ត្រូវបណ្តាលឱ្យរងរបួស។
ក្រោយពេលកើតហេតុស្រ្តីដៃដល់ត្រូវសមត្ថកិច្ចឃាត់ខ្លួនយកទៅសួរនាំនៅប៉ុស្តិ៍នគនរបាលរដ្ឋបាលកាកាប។
ចែករំលែកព័តមាននេះ