រាជធានីភ្នំពេញ ៖ អ្នកស្រីហេង មិនា បុគ្គលិកលក់កាហ្វេប្រចាំក្រុមហ៊ុនកាហ្វេយូអីុដា(UEDA) នៅកោះពេជ្របានឲ្យដឹងថា សព្វថ្ងៃកាហ្វេយូអីុដា ចាប់ផ្តើមពេញនិយម និងមានអ្នកពិសាច្រើនខុសប្លែកកាលពីឆ្នាំ២០១១ នៅពេលអ្នកស្រីចាប់ផ្តើមលក់កាហ្វេនេះដំបូងគឺលក់បានចំនួនតិចតួចប៉ុណ្ណោះ តែមកដល់ឆ្នាំ២០១៤ នេះឃើញថា
រាជធានីភ្នំពេញ ៖ អ្នកស្រីហេង មិនា បុគ្គលិកលក់កាហ្វេប្រចាំក្រុមហ៊ុនកាហ្វេយូអីុដា(UEDA) នៅកោះពេជ្របានឲ្យដឹងថា សព្វថ្ងៃកាហ្វេយូអីុដា ចាប់ផ្តើមពេញនិយម និងមានអ្នកពិសាច្រើនខុសប្លែកកាលពីឆ្នាំ២០១១ នៅពេលអ្នកស្រីចាប់ផ្តើមលក់កាហ្វេនេះដំបូងគឺលក់បានចំនួនតិចតួចប៉ុណ្ណោះ តែមកដល់ឆ្នាំ២០១៤ នេះឃើញថា ក្នុងមួយថ្ងៃអ្នកស្រីអាចលក់បានពី៦០ទៅ៧០កែវ និងក្នុងមួយខែអាចរកប្រាក់ចំណូលបានពី១៣០ទៅ១៤០ដុល្លារអាមេរិក តែទន្ទឹមនឹងនេះក៏មានបុគ្គលិកផ្សេងទៀតអាចរកប្រាក់កម្រៃបានច្រើនជាងនេះផងដែរ ។
អ្នកស្រី ហេង មិនា លើកឡើងថា បានជាអ្នកស្រីចាប់យកការងារជាអ្នកលក់កាហ្វេយូអីុដានេះព្រោះយល់ឃើញថា ជាការងារមួយប្លែកពីគេនៅរាជធានី និងមានសេវាកម្មល្អ ហើយសព្វថ្ងៃការលក់កាហ្វេនៅតាមរ៉ឺម៉កកង់បីនេះ អ្នកស្រីមានលក់កាហ្វេបីប្រភេទដូចជា ការហ្វេទឹកកក ក្នុង១កែវថ្លៃ២.៥០០រៀលកាហ្វេទឹកដោះគោ១កែវថ្លៃ៣.០០០រៀល និងកាហ្វេអារ៉ាប់ប៊ីកា ១កែវថ្លៃ៥.០០០រៀល ។នៅក្នុងចំណោមកាហ្វេទាំងនេះសម្រាប់អតិថិជនដែលចូលចិត្តពិសាច្រើនជាងគេគឺកាហ្វេទឹកដោះគោ ។
អ្នកស្រី ហេង មិនា បានបញ្ជាក់ថា ការប្រកបការងារនេះក្រុមការងារអ្នកស្រីមិនបានចំណាយដើមទុនអ្វីទេ បូករួមទាំងការបណ្តុះបណ្តាលអំពីរបៀបឆុងកាហ្វេឲ្យត្រូវចិត្តអតិថិជននិងការទំនាក់ទំនងក្នុងការនិយាយស្តីជាមួយអតិថិជនថែមទៀត តែយើងត្រូវចំណាយពេលនិងកម្លាំងរង់ចាំលក់កាហ្វេតែប៉ុណ្ណោះ ។កញ្ញាស្រី រដ្ឋ ប្រធានគ្រប់គ្រងទូទៅក្រុមហ៊ុនកាហ្វេយូអីុដា បានឲ្យដឹងថាកាហ្វេយូអីុដាចាប់ផ្តើមពេញនិយមនិងមានអ្នកពិសាច្រើនចាប់តាំងពីឆ្នាំ២០១៣មក ហើយមកដល់ពេលនេះក្រុមហ៊ុនមានរ៉ឺម៉កម៉ូតូលក់កាហ្វេនៅរាជធានីសរុបចំនួន១៧រ៉ឺម៉ក ដោយក្នុងមួយថ្ងៃក្រុមហ៊ុនបានឆុងការហ្វេចែកចាយទៅបុគ្គលិកទៅតាមតំបន់មានចំនួន៣០ទៅ៤០គីឡូក្រាម។
កញ្ញាបញ្ជាក់ថា ការលក់កាហ្វេរបស់ក្រុមហ៊ុនយូអ៊ីដា ក្នុងរដូវវស្សានេះមានការថមថយតិចតួច ព្រោះតែអាកាសធាតុមិនសូវអំណោផល ហើយម្យ៉ាងទៀតនៅរាជធានីពេលបច្ចុប្បន្នមានអ្នកប្រកបមុខរបរលក់កាហ្វេយកលំនាំតាមក្រុមហ៊ុនមានច្រើនដែលជាកត្តាបាត់បង់ចំណែកទីផ្សារមួយចំនួនផងដែរ ។
កញ្ញាលើកឡើងថា បុគ្គលិកអ្នកលក់កាហ្វេយូអីុដា ក្នុងមួយខែដំបូងក្រុមហ៊ុនផ្តល់ប្រាក់កម្រៃជូន១២០ដុល្លារអាមេរិកក្នុង១ខែ ប៉ុន្តែនៅខែទី២ក្រុមហ៊ុននឹងរៀបចំជូនពួកគាត់ឲ្យគិតជាភាគរយនៃចំនួនការលក់ជាក់ស្តែងវិញ ដែលជាការផ្តល់ឱកាសមួយឲ្យបុគ្គលិកមានការប្រកួតប្រជែង និងខិតខំក្នុងការងាររបស់ខ្លួនដើម្បីទទួលកម្រៃខ្ពស់ជាប្រចាំ ៕
ចែករំលែកព័តមាននេះ