ខេត្តស្ទឹងត្រែង ៖ យុវជនឈាមរាវម្នាក់ត្រូវបានកម្លាំងនគរបាលស្រុកសៀមប៉ាងចាប់ឃាត់ខ្លួន និងបញ្ជូនទៅសាលាដំបូងខេត្ត ដើម្បីផ្តន្ទាទោស បន្ទាប់ពីបានសម្លាប់ស្ត្រីជាម្តាយចិញ្ចឹមរប់សខ្លួនដោយកាប់នឹងពូថៅយ៉ាងសាហាវព្រៃផ្សៃ ។ ជនជាប់ចោទពាក់ព័ន្ធនឹងករណីខាងលើនេះ ត្រូវបាននគរបាលព្រហ្មទណ្ឌកម្រិតធ្ងន់ ឱ្យដឹងថា ឈ្មោះ កែវ ពៅ អាយុ២៣ឆ្នាំ រស់នៅជាមួយស្ត្រីរងគ្រោះជាម្តាយចិញ្ចឹមឈ្មោះ ណុប ភា អាយុ៥២ឆ្នាំ ក្នុងភូមិស្ពានខិះ ឃុំស្រែសំបូរ ស្រុកសៀមប៉ាង ។
ជននេះ ត្រូវកម្លាំងនគរបាលស្រុកស្ទាក់ចាប់ខ្លួនបាននៅឃុំព្រែកមាស ស្រុកសៀមប៉ាង កាលពីយប់ថ្ងៃទី២៤ កក្កដា បន្ទាប់ពីកាប់ម្តាយចិញ្ចឹមរបស់ខ្លួនជាច្រើនពូថៅបណ្តាលឱ្យស្លាប់ភ្លាមៗនៅនឹងកន្លែង ។ ហេតុការណ៍នេះ បានកើតទ្បើងកាលពីវេលាម៉ោង៩និង២០នាទីយប់ ថ្ងៃទី២៤ កក្កដា ។ តាមប្រភពព័ត៌មានពីអ្នកភូមិស្ពានខិះ ឱ្យដឹងថា មុនពេលកើតហេតុ ជនបាតដៃប្រទ្បាក់ឈាមរូបនេះ រួមជាមួយបក្សពួក២ទៅ៣នាក់ បាននាំគ្នាអង្គុយផឹកស្រាអស់ជាច្រើនលីត្រនៅក្នុងផ្ទះ លុះចប់កម្មវិធីផឹកស៊ីហើយ ក៏បាននិយាយទូរស័ព្ទជាមួយនារីម្នាក់ តែមិនដឹងថា ជាស្រីស្នេហ៍ឬយ៉ាងណានោះទេ ។
ពេលនោះស្ត្រីជាម្តាយចិញ្ចឹមបានស្តីបន្ទោស និងយកកាំបិតមកជន្ល ស្រាប់តែកូនចិញ្ចឹមរូបនេះខឹងសម្បាតែម្តង ក៏ស្ទុះទៅយកពូថៅមកកាប់ម្តាយចិញ្ចឹមជាច្រើនពូថៅចំក្បាលនិងខ្លួនប្រាណបណ្តាលឱ្យប្រកាច់ស្លាប់ក្នុងថ្លុកឈាមនៅនឹងកន្លែង ។ ប្រភពព័ត៌មានពីអ្នកភូមិថា ស្ត្រីរងគ្រោះនេះ បានទទួលយុវជនដៃដល់មកចិញ្ចឹមរយៈពេល៣ឆ្នាំមកហើយ ក្រោយពេលមានការខ្ចាត់ព្រាត់ពីឪពុកម្តាយនិងពីផ្ទះសម្បែងរបស់ខ្លួន ដោយសារតែចរិតកាចសាហាវទូន្មានមិនស្តាប់ ។ គិតទៅឆ្កែកន្ទុយខ្វៀននៅតែខ្វៀន ពេលមករស់នៅជាមួយម្តាយចិញ្ចឹមក៏បង្កឱ្យស្ត្រីជាអ្នកមានគុណទី២ស្លាប់ក្នុងកណ្តាប់ដៃរបស់ខ្លួនថែមទៀត ។
ក្រោយពីកាប់ស្ត្រីជាម្តាយចិញ្ចឹមស្លាប់ហើយ ជននេះក៏បានជិះម៉ូតូរត់គេចខ្លួន តែត្រូវកម្លាំងនគរបាលដែលដាក់ពង្រាយចាប់ខ្លួនបានក្រោយកើតហេតុបន្តិច រួចបញ្ជូនមកស្នងការដ្ឋាននគរបាលខេត្ត និងកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ