ខេត្តសៀមរាប ៖ បុរសម្នាក់បានស្លាប់នៅតាមផ្លូវ ខណៈដែលក្រុមគ្រួសារដឹកបញ្ជូនទៅសង្គ្រោះនៅមន្ទីរពេទ្យ បន្ទាប់ពីបុរសរូបនេះត្រូវបានមន្ដ្រីបរិស្ថានឈ្មោះ គង់ សុធា ប្រធានស្នាក់ការដែនជម្រកសត្វព្រៃបឹងពែរ និងជាអ្នករកស៊ីបើកសិប្បកម្មខ្លួនឯងផង បានជួលឱ្យអារឈើបេងមុខយក្សចំនួនពីរដុំ ក្នុងតម្លៃស្រាបៀរ១០កំប៉ុង តែត្រូវរណាយន្តភ្លាត់មកអារ.កខ្លួនឯង ។
ហេតុការណ៍នេះ កើតឡើងកាលពីថ្ងៃទី២៥ កក្កដា វេលាម៉ោង៥ល្ងាច ស្ថិតនៅភូមិខ្វាវ ឃុំខ្វាវ ស្រុកជីក្រែង ។ ប្រពន្ធជនរងគ្រោះឈ្មោះ ថា បានរៀបរាប់ឱ្យដឹងថា លោក គង់ សុធា ប្រធានស្នាក់ការដែនជម្រកសត្វព្រៃបឹងពែរ ដែលមានស្នាក់ការ នៅកន្លែងកើតហេតុខាងលើ បានទៅលួងលោម និងជួលប្ដីរបស់គាត់ឈ្មោះ គិន លាង (ហៅឡេវ) អាយុ៣៤ឆ្នាំ ឱ្យទៅអារឈើបេង ដែលមានទំហំមុខកាត់១ម៉ែត្រ៣តឹក ចំនួន២ដុំ ឱ្យមន្ដ្រីបរិស្ថានរូបនោះ ។
គាត់បន្ដថា ដំបូងឡើយប្ដីរបស់គាត់មិនព្រមទេ ប៉ុន្ដែហេតុតែភាពល្ងង់ខ្លៅ គួបផ្សំនឹងជីវភាពក្រីក្រ ខ្វះមុខខ្វះក្រោយផងនោះ ជាពិសេសគឺមន្ដ្រីបរិស្ថានរូបនោះ បានគំរាមប្ដីរបស់គាត់ម្ដងហើយម្ដងទៀត ដោយបញ្ជាឱ្យទៅខាងតែបាន បើទោះបីប្ដីរបស់គាត់បដិសេធក្ដី ទីបំផុតប្តីរបស់គាត់ក៏ទៅតាមបញ្ជា ដោយមន្ត្រីបរិស្ថានរូបនោះប្រាប់ថា ឱ្យថ្លៃឈ្នួលស្រាបៀរ១០កំប៉ុង ។ ស្ត្រីជាប្រពន្ធបានរៀបរាប់ទៀតថា នៅពេលប្ដីរបស់គាត់កំពុងអារឈើនោះ ស្រាប់តែចៃដន្យអាក្រក់ ត្រូវរណាយន្ដ (ម៉ាស៊ីនត្រង់ស៊ីន័រ) កន្ដ្រាក់ភ្លាត់មកចំបំពង់.ក បណ្ដាលឱ្យរងរបួសធ្ងន់ និងបានបាត់បង់ជីវិតពេលដឹកជិតដល់មណ្ឌលសុខភាពខ្វាវ ។
ចំណែកមន្ត្រីបរិស្ថាន បន្ទាប់ពីឃើញហេតុការណ៍ដូច្នេះ បានដាក់មេប្រូចបាត់ស្រមោលតែម្តង ហើយពេលនេះប្រពន្ធជនរងគ្រោះ បានដាក់ពាក្យប្ដឹងទៅអាជ្ញាធរពាក់ព័ន្ធ ដើម្បីឱ្យមន្ដ្រីបរិស្ថានរូបនេះ មកទទួលខុសត្រូវតាមច្បាប់ ។ សពជនរងគ្រោះ ត្រូវក្រុមគ្រួសារដឹកយកទៅគេហដ្ឋានដើម្បីធ្វើបុណ្យតាមប្រពៃណីទាំងក្តីសោកសង្រេង ។ អ្នកសារព័ត៌មានមិនទាន់អាចទាក់ទង សមត្ថកិច្ចមូលដ្ឋាន ដើម្បីបញ្ជាក់ពីករណីនេះបាននៅឡើយទេ ។
គួរបញ្ជាក់ថា ឃុំខ្វាវ ស្រុកជីក្រែង ជាតំបន់ ក្រុមឈ្មួញរកស៊ីឈើ ដឹកជញ្ជូនឈើខុសច្បាប់យ៉ាងអនាធិបតេយ្យ ប្រៀបដូចតំបន់នោះគ្មានអាជ្ញាធរ ឬសមត្ថកិច្ចអនុវត្តច្បាប់ដូច្នោះដែរ ៕
ចែករំលែកព័តមាននេះ