រាជធានីភ្នំពេញ ៖ អតីតមេការម្នាក់ ត្រូវបានកម្លាំងកងរាជអាវុធហត្ថរាជធានីភ្នំពេញ ស្រាវជ្រាវឃាត់ខ្លួន ដោយសង្ស័យជាប់ពាក់ព័ន្ធនឹងការផ្ញើគ្រាប់បែកនិងទូរស័ព្ទគំរាមជំរិតទារប្រាក់៥.០០០ដុល្លារពីថៅកែភោជនីយដ្ឋានែ្រ ផម(Prime Restaurant) កាលពីថ្ងៃទី២៦ កក្កដា ។ បន្ទាប់ពីឃាត់ខ្លួន នៅព្រឹកថ្ងៃទី២៧ កក្កដា ក៏ឈានទៅដល់ការឆែកឆេរលំនៅឋានដែរ ប៉ុន្តែជនជាប់សង្ស័យត្រូវបានសមត្ថកិច្ចឱ្យដឹងថា មិនមានការពាក់ព័ន្ធនឹងករណីសង្ស័យនេះទេ ។
គួរបញ្ជាក់ថា កាលពីវេលាម៉ោង១១និង៣០នាទីព្រឹកថ្ងៃទី២៦ កក្កដា មានការភ្ញាក់ផ្អើលមួយនៅភោជនីយដ្ឋានែ្រ ផម ដែលមានទីតាំងស្ថិតនៅផ្ទះលេខ១០៤ ផ្លូវលេខ៣១៥ សង្កាត់បឹងកក់ទី២ ខណ្ឌទួលគោក ខណៈពេលមានជនម្នាក់ជិះម៉ូតូមួយគ្រឿងយកកាដូដែលមានគ្រាប់បែកក្រឡាទៀបមួយគ្រាប់ តែពុំមានគីបនិងគ្រឿងផ្ទុះយកទៅឱ្យសន្តិសុខយាមផ្ញើជូនថៅកែហាង ។ បន្ទាប់ពីមានការភ្ញាក់ផ្អើល ជននោះបានទូរស័ព្ទគំរាមទារប្រាក់ចំនួន៥ពាន់ដុល្លារពីថៅកែហាង ។
តាមបុរសឈ្មោះសឿន ប៊ុនធឿន អាយុ៣០ឆ្នាំ ជាសន្តិសុខភោជនីយដ្ឋានែ្រ ផមបានឱ្យសមត្ថកិច្ចដឹងថា នៅវេលាម៉ោងប្រមាណ១១និង៣០នាទីព្រឹកថ្ងៃទី២៦ កក្កដា មានជនម្នាក់ជិះម៉ូតូមួយគ្រឿងមកឈប់នៅមុខហាងហើយយកកាដូមួយផ្ញើឱ្យថៅកែហាង ។ ខណៈនោះគាត់ក៏បានបើកកាដូនោះមើលស្រាប់តែឃើញគ្រាប់បែកក្រឡាទៀបមួយគ្រាប់ដាក់ក្នុងប្រអប់ទូរស័ព្ទក៏បានរាយការណ៍ប្រាប់សមត្ថកិច្ចធ្វើឱ្យមានការភ្ញាក់ផ្អើលឡើង ។ នៅព្រឹកនោះ សមត្ថកិច្ចក៏បានចុះទៅកន្លែងកើតហេតុធ្វើការត្រួតពិនិត្យគ្រាប់តែពុំឃើញមានគីបនិងគ្រឿងផ្ទុះឡើយ។
បន្ទាប់ពីមានការគំរាមកំហែងនេះ សមត្ថកិច្ចកងរាជអាវុធហត្ថក៏បានស្រាវជ្រាវ ហើយឈានទៅឃាត់ខ្លួនអតីតមេការម្នាក់ឈ្មោះសុខ កក្កដា នៅវេលាម៉ោងប្រមាណ៦និង៣០នាទីល្ងាចថ្ងៃទី២៦ កក្កដា នៅក្នុងសង្កាត់ស្វាយប៉ាក ខណ្ឌឫស្សីកែវ ដោយជាប់សង្ស័យ ហើយក៏បានឈានទៅឆែកឆេរលំនៅឋាន តែមិនមានភស្ដុតាង និងជាប់ពាក់ព័ន្ធក្នុងករណីនេះទេ ។ បានជាមានការសង្ស័យបើតាមមន្ត្រីកងរាជអាវុធហត្ថឱ្យដឹងថា ព្រោះរូបគេជាអតីតមេការអាចខឹងនឹងថៅកែហាងដែលបញ្ឈប់ពីការងារ ។
ចំណែកឈ្មោះសុខ កក្កដា បានឱ្យដឹងថា ខ្លួនបានឈប់ធ្វើការនៅហាងែ្រ ផមកាលពីថ្ងៃទី១៤ កក្កដា ដែលការឈប់នោះដោយសារខ្លួនពុំពេញចិត្តនឹងថៅកែហើយថៅកែក៏មិនពេញចិត្តរូបគេដែរ។ ចំពោះការចោទថា រូបគេជាអ្នកគំរាមកំហែងនោះមិនមែនជាការពិតឡើយ ៕
ចែករំលែកព័តមាននេះ