រាជធានីភ្នំពេញ ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៤ និង១០នាទីរសៀលថ្ងៃទី២៤ កក្កដា ខណៈពេលស្ត្រីម្នាក់បើកទ្វារហាងអ៊ុតសក់តូបលេខ៩៦ ក្នុងផ្សារហ្គោលដិនសូរិយាម៉ល ដែលមានទីតាំងនៅផ្ទះលេខ៥១ សង្កាត់ផ្សារថ្មីទី៣ ខណ្ឌដូនពេញ បានប្រទះ ឃើញស្ត្រីជាម្ចាស់ហាងស្លា.ប់នៅលើកៅអី
រាជធានីភ្នំពេញ ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៤ និង១០នាទីរសៀលថ្ងៃទី២៤ កក្កដា ខណៈពេលស្ត្រីម្នាក់បើកទ្វារហាងអ៊ុតសក់តូបលេខ៩៦ ក្នុងផ្សារហ្គោលដិនសូរិយាម៉ល ដែលមានទីតាំងនៅផ្ទះលេខ៥១ សង្កាត់ផ្សារថ្មីទី៣ ខណ្ឌដូនពេញ បានប្រទះ ឃើញស្ត្រីជាម្ចាស់ហាងស្លាប់នៅលើកៅអី ចំណែកប្ដីស្លាប់នៅលើឥដ្ឋ ហើយនៅក្បែរនោះមានកាំភ្លើងខ្លីម៉ាករូឡូផងដែរ យោងតាមឯកសារជួលតូបហាងអ៊ុតសក់លេខ៩៦ ក្នុងផ្សារហ្គោលដិនសូរិយាម៉ល បានឱ្យដឹងថា ស្ត្រីជាម្ចាស់ហាងដែលត្រូវប្ដីបាញ់ស្លាប់ឈ្មោះ ទក ផេង អាយុ២២ឆ្នាំ មានស្រុកកណើតនៅភូមិពន្លាជ័យ ឃុំបន្ទាយស្ទោង ស្រុុកស្ទោង ខេត្តកំពង់ធំ បានមកជួលតូបខាងលើអស់រយៈពេលជិតមួយឆ្នាំហើយ ។
ប្រភពព័ត៌មាននៅកន្លែងកើតហេតុបានឱ្យដឹងថា នៅវេលាម៉ោងជាង១រំលងអធ្រាត្រឈានចូលថ្ងៃទី២៤ កក្កដា គេដូចជាបានឮស្នូរកាំភ្លើងផ្ទុះពី២គ្រាប់ទៅ៣គ្រាប់នៅមុខហាងអ៊ុតសក់ខាងលើ(តូបលេខ៩៦)ក្នុងផ្សារហ្គោលដិនសូរិយាម៉ល តែគ្មាននរណាម្នាក់ចាប់អារម្មណ៍ទេ ដោយសារម្នាក់ៗស្មានថាក្រុមក្មេងៗដើររើសអេតចាយវាយទ្វារតូបលេង ។ លុះដល់វេលាម៉ោងជាង៤រសៀលថ្ងៃដដែល បុគ្គលិកសន្តិសុខផ្សារ និងបុគ្គលិកហាងអ៊ុតសក់ខាងលើមានការងឿងឆ្ងល់ ព្រោះមិនឃើញបើកទ្វារហាងដូចសព្វមួយដង ក៏នាំគ្នាលើកទ្វាររូតដែលបិទមើល ស្រាប់តែឃើញថៅកែស្រីដេកស្លាប់នៅលើកៅអី ឯបុរសជាប្តីដេកស្លាប់នៅលើឥដ្ឋ ព្រមទាំងមានកាំភ្លើងខ្លីមួយដើមម៉ាករូឡូនៅក្បែរសពបុរសជាប្តី ហើយក៏រាយការណ៍ឱ្យនគរបាលមូលដ្ឋានចុះមកពិនិត្យភ្លាមៗ ។
សមត្ថកិច្ចឱ្យដឹងថា បុរសជាប្តីឈ្មោះ លុច សុវណ្ណ អាយុ៣០ឆ្នាំ ជានាយអាវុធហត្ថនៅវរៈលេខ១៧៨ យាមប្រចាំការនៅសាលាក្តីខ្មែរក្រហម ហើយពីរនាក់ប្តីប្រពន្ធនេះទើបតែរៀបការបានរយៈពេលជិតមួយឆ្នាំប៉ុណ្ណោះ ។ នៅមុនពេលកើតហេតុ នារសៀលថ្ងៃទី២៣ កក្កដា គេឃើញបុរសជាប្តីអង្គុយផឹកស្រាបៀរជាមួយមិត្តភក្តិនៅមុខហាងអ៊ុតសក់របស់ភរិយា ហើយមូលហេតុឈានដល់ការបាញ់សម្លាប់ប្រពន្ធរបស់ខ្លួន រួចធ្វើអត្តឃាតនេះ ទំនងកើតចេញពីរឿងប្រចណ្ឌច្រើនជាងករណីផ្សេងៗទៀត ។ នេះជាការសន្និដ្ឋានជំហានដំបូង ។
សពប្ដីប្រពន្ធខាងលើត្រូវបានសាច់ញាតិយកទៅតម្កល់ធ្វើបុណ្យតាមប្រពៃណីនៅឈាបនដ្ឋានវត្តស្ទឹងមានជ័យ ។ ប្ដីប្រពន្ធនេះមិនទាន់មានកូននៅឡើយទេ ៕
ចែករំលែកព័តមាននេះ