រាជធានីភ្នំពេញ ៖ ថ្លែងនៅក្នុងជំនួបពិភាក្សាការងារជាមួយលោកឧបនាយករដ្ឋមន្ត្រីបណ្ឌិតសភាចារ្យ សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី កាលពីថ្ងៃទី២៤កក្កដា នៅទីស្តីការគណៈរដ្ឋមន្ត្រីលោក PengiramKasmirhanPengiranTahir ឯកអគ្គរាជទូតប្រទេសប្រ៊ុយណេប្រចាំកម្ពុជា បានបញ្ជាក់ថា ទាំងរាជរដ្ឋាភិបាលប្រ៊ុយណេ រួមទាំងក្រុមហ៊ុនហោះហើរឯកជននៅប្រទេសនេះ មានបំណងចង់ឲ្យមានជើងហោះហើរដោយត្រង់ពីប្រទេសប៊ុ្រយណេមករាជធានីភ្នំពេញនិងក្រុងសៀមរាប ដោយសារតែប្រទេសកម្ពុជាមានសក្តានុពលខ្ពស់លើវិស័យទេសចរណ៍ ។
គួរបញ្ជាក់ថា នៅក្នុងជំនួបខាងលើនេះ ភាគីទាំងពីរក៏បានលើកយកបញ្ហាសំខាន់ៗមួយចំនួនមកពិភាក្សាផងដែរ រួមមានជំរុញឲ្យមានការហោះហើរដោយត្រង់ពីប្រ៊ុយណេមកកម្ពុជា, ការផ្តល់អាហារូបករណ៍ដល់និស្សិតខ្មែរទៅសិក្សានៅអាមេរិកដោយភាគីប្រ៊ុយណេជាអ្នករ៉ាប់ង, ការនាំអង្ករពីកម្ពុជាទៅប្រ៊ុយណេ ,កិច្ចសហប្រតិបត្តិការលើវិស័យវប្បធម៌និងវិចិត្រសិល្បៈ ។
លោក PengiramKasmirhanPengiranTahir មានប្រសាសន៍ថា ប្រទេស របស់លោកមានកម្មវិធីមួយសម្រាប់ជួយឧបត្ថម្ភគាំទ្រផ្តល់អាហារូបករណ៍ដល់និស្សិតថ្នាក់បណ្ឌិតនិងក្រោយបណ្ឌិតទៅសិក្សានៅសហរដ្ឋអាមេរិក ។ ដូច្នេះសម្រាប់ឆ្នាំនេះលោកចង់ឃើញនិស្សិតកម្ពុជាចំនួន២០នាក់ថែមទៀតចេញទៅសិក្សានៅសហរដ្ឋអាមរិក ក្រោមការឧបត្ថម្ភរបស់ប្រទេសប្រ៊ុយណេ ។ ទាក់ទងកិច្ចសហប្រតិបត្តិការលើវិស័យវប្បធម៌និងវិចិត្រសិល្បៈ លោកឯកអគ្គរាជទូតរូបនោះបានលើកឡើងថា ប្រទេសទាំងពីរចាំបាច់ត្រូវពង្រឹងកិច្ចសហប្រតិបត្តិការលើវិស័យនេះ ដើម្បីរួមចំណែកលើកស្ទួយកិច្ចសហប្រតិបត្តិការលើគ្រប់វិស័យ ៕
ចែករំលែកព័តមាននេះ