គីរីរម្យ, កំពង់ស្ពឺ ៖ ផ្លូវបេតុងអ៊ុតកៅស៊ូ ១ខ្សែរប្រវែង ៧០០០ម៉ែត្រ ទទឹង ៥ម៉ែត្រ តភ្ជាប់ពីរង្វង់មូលនាគព័ន្ធទៅឋានសួគ៌គិរីរម្យ ក្នុងភូមិសាស្ត្រ ភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ បានសម្ពោធដាក់ឱ្យប្រើប្រាស់ជាផ្លូវការ ក្រោមវត្តមានឯកឧត្តម ហួត ហាក់ រដ្ឋមន្ត្រីក្រសួងទេសចរណ៍, ឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ និងឯកឧត្ដមអ្នកឧកញ៉ាបណ្ឌិត សួរ វីរៈ អគ្គនាយកក្រុមហ៊ុនវិរៈ ប៊ុនថាំ កាលពីថ្ងៃទី ២៨ ខែមិថុនា ឆ្នាំ ២០២៦ ។
ឯកឧត្តម ហួត ហាក់ បាននាំនូវបណ្ដាំផ្ញើសាកសួរសុខទុក្ខប្រកបដោយក្ដីនឹករលឹក ពីសំណាក់សម្ដេចធិបតីនាយករដ្ឋមន្ដ្រី និងលោកជំទាវបណ្ឌិត ជូនចំពោះប្រជាពលរដ្ឋនៅក្នុងអង្គពិធី ក៏ដូចជាប្រជាពលរដ្ឋនៅទូទាំងខេត្តកំពង់ស្ពឺ ដែលទទួលបានសមិទ្ធផលថ្មីនេះ ។ ឯកឧត្តម ក៏បានឱកាសកោតសរសើរ ឯកឧត្ដមអ្នកឧកញ៉ាបណ្ឌិត សួរ វីរៈ ក៏ដូចជាក្រុមហ៊ុនវិរៈ ប៊ុនថាំ គ្រុប ដែលតែងយកចិត្តទុកដាក់ចូលរួមជំរុញ និងលើកស្ទួយវិស័យទេសចរណ៍នៅកម្ពុជា ។
ជាមួយគ្នានេះ ឯកឧត្តមបណ្ឌិត ជាម ច័ន្ទសោភ័ណ បានលើកឡើងពីសារៈប្រយោជន៍នៃផ្លូវមួយខ្សែរនេះ ដែលបម្រើផ្នែកសេដ្ឋកិច្ច និងសង្គម មានសក្ដានុពលទេសចរណ៍ និងសេវាសាធារណៈជូនប្រជាពលរដ្ឋ ក្នុងភូមិសាស្ត្រតបន់គីរីរម្យ ។
ឯកឧត្ដមអ្នកឧកញ៉ាបណ្ឌិត សួរ វីរៈ បានមានប្រសាសន៍ថា ផ្លូវបេតុងអ៊ុតកៅស៊ូនេះ គឺជាសមិទ្ធផលថ្មីមួយទៀតដែលក្រុមហ៊ុនវិរៈ ប៊ុនថាំ កសាងសម្រាប់ប្រជាពលរដ្ឋនៅក្នុងមូលដ្ឋាន និងភ្ញៀវទេសចរណ៍ដើម្បីជួយសម្រួលដល់ការធ្វើចរាចរ និងបានរួមចំណែកក្នុងការលើកកម្ពស់សេដ្ឋកិច្ច ក្នុងមូលដ្ឋានផងដែរ ។ ផ្លូវនេះ គឺជាសរសៃឈាមសេដ្ឋកិច្ចដ៏មានសារៈសំខាន់ ដែលមិនអាចមើលរំលង ។ យើងខ្ញុំសង្ឃឹមថា ផ្លូវបេតុងមួយខ្សែរនេះនឹងជួយសម្រួលការធ្វើដំណើរ កាត់បន្ថយពេលវេលា និងការចំណាយរបស់បងប្អូន ។ ងាយស្រួលដឹកជញ្ជូនកសិផល និងទំនិញនានា ។ បង្កើនឱកាសរកស៊ីទទួលទាន និងកាត់បន្ថយភាពក្រីក្រ និងតភ្ជាប់ទំនាក់ទំនងរវាងតំបន់មួយទៅតំបន់មួយឱ្យកាន់តែជិតស្និទ្ធ ។
ការកសាងផ្លូវបេតុងមួយខ្សែរនេះឡើង បានបញ្ជាក់យ៉ាងច្បាស់ថា ទីណាមានផ្លូវ ទីនោះមានការអភិវឌ្ឍ និងមានក្តីសង្ឃឹម ។ ឯកឧត្ដមអ្នកឧកញ៉ាបណ្ឌិត ក៏បានអំពាវនាវដល់ប្រជាពលរដ្ឋទាំងអស់ ចូលរួមប្រើប្រាស់ផ្លូវនេះដោយការថែទាំ ដើម្បីអាចបម្រើផលប្រយោជន៍បានយូរអង្វែង ៕ អត្ថបទសហការ
ចែករំលែកព័តមាននេះ