រាជធានីភ្នំពេញ ៖ ABA ដែលជាធនាគារពាណិជ្ជធំជាងគេនៅកម្ពុជា ជាថ្មីម្តងទៀតត្រូវបានទទួលស្គាល់ជា ធនាគារបម្រើសេវារូបវន្តបុគ្គលដ៏ឆ្នើមបំផុតប្រចាំឆ្នាំ នៅកម្ពុជា ពីទស្សនាវដ្តី Asian Banking…
រាជធានីភ្នំពេញ ៖ ABA ដែលជាធនាគារពាណិជ្ជធំជាងគេនៅកម្ពុជា ជាថ្មីម្តងទៀតត្រូវបានទទួលស្គាល់ជា ធនាគារបម្រើសេវារូបវន្តបុគ្គលដ៏ឆ្នើមបំផុតប្រចាំឆ្នាំ នៅកម្ពុជា ពីទស្សនាវដ្តី Asian Banking and Finance (ABF) ។ នេះជាឆ្នាំទី 5 ជាប់ៗគ្នា ដែល ABA ទទួលបានពានរង្វាន់ថ្នាក់តំបន់ដ៏មានកិត្យានុភាពនេះ ដោយទទួលស្គាល់ពីការប្តេជ្ញាចិត្តជាបន្ដបន្ទាប់របស់ធនាគារចំពោះនវានុវត្តន៍ សេវាកម្មល្អឯក និងភាពនាំមុខ លើផ្នែកឌីជីថលនៅក្នុងវិស័យធនាគារកម្ពុជា ។
គណៈវិនិច្ឆ័យរបស់ទស្សនាវដ្តី ABF បានពិចារណាលើសមិទ្ធផលគួរឲ្យកត់សម្គាល់ថ្មីៗរបស់ ABA រួមមានជាអាទិ៍ ការសម្រេចបានអតិថិជនក្នុងដៃប្រមាណជាង 5.1 លាននាក់ និងកិច្ចខិតខំប្រឹងប្រែងជាបន្ដបន្ទាប់ក្នុងការពង្រឹងសមត្ថភាពកម្មវិធីធនាគារលើទូរស័ព្ទដៃ និងសេវាធនាគារអនឡាញ ដើម្បីបម្រើសេវាជូនអតិថិជនជារូបវន្ដបុគ្គល និងអាជីវកម្មឲ្យកាន់តែប្រសើរឡើងជាលំដាប់ ។
ABA Mobile ដែលជាផលិតផលឯករបស់ធនាគារ ទទួលបានការអភិវឌ្ឍសំខាន់ៗ ក្នុងគោលបំណងពង្រឹងសុវត្ថិភាព និងបង្កើនភាពងាយស្រួលជូនដល់អ្នកប្រើប្រាស់ ។ មុខងារថ្មីៗ រួមមានជាអាទិ៍ ៖
• សោមុខ (FacePass Secure) ៖ មុខងារសុវត្ថិភាព ប្រើប្រាស់បច្ចេកវិទ្យាស្គាល់ផ្ទៃមុខផ្ទាល់ ដែលមានវត្តមានក្នុងកម្មវិធីធនាគារលើទូរស័ព្ទដំបូងគេបង្អស់នៅកម្ពុជា ។ មុខងារនេះ ប្រើប្រាស់បច្ចេកវិទ្យាទំនើប ដែលទប់ស្កាត់ការក្លែងបន្លំបានទាំងស្រុង ។
• មុខងារឆាតក្នុង ABA Mobile ៖ មុខងារថ្មីដំបូងបង្អស់សម្រាប់កម្មវិធីធនាគារលើទូរស័ព្ទក្នុងប្រទេស ដែលអនុញ្ញាតឲ្យអ្នកប្រើប្រាស់ជជែកសន្ទនា ផ្ញើប្រាក់ និងបញ្ជាក់ប្រតិបត្តិការយ៉ាងសុវត្ថិភាពនៅកន្លែងតែមួយ មិនមានការលួច ឬក្លែងបន្លំប្រូហ្វាលដូចបណ្ដាញសង្គម ។
• ណាវី ជំនួយការនិម្មិតសម្រាប់សេវាធនាគារ ៖ ជា AI ជំនួយការសម្រាប់ផ្ដល់ព័ត៌មាននានាពាក់ព័ន្ធនឹងសេវាធនាគារ ដែលបង្កើតឡើងដើម្បីឆ្លើយតបភ្លាមៗទៅនឹងសំណួរ ឬចម្ងល់អំពីផលិតផល ឬសេវាកម្មរបស់ ABA។ ណាវីចេះច្រើនភាសា និងបានរចនាឡើងដើម្បីយល់សំណួរ និងផ្ដល់ចម្លើយច្បាស់ ងាយស្រួលយល់ដូចនិយាយជាមួយមនុស្សពិតៗ ។
ABA ក៏បន្តគាំទ្រអាជីវកម្មតូចធំគ្រប់ប្រភេទផងដែរ ។ ផ្លែតហ្វមសេវាធនាគារអនឡាញ ABA Business បានសម្រួលប្រតិបត្តិការហិរញ្ញវត្ថុរបស់អាជីវកម្ម ជាមួយមុខងារល្អៗដូចជា ការទូទាត់ច្រើនដំណាលគ្នា ប្រាក់បៀវត្សរ៍ សេវាប្រមូលប្រាក់ និងការភ្ជាប់ប្រព័ន្ធគណនេយ្យ Cloud ។ ក្នុងឆ្នាំ 2024 ចំនួនអ្នកប្រើប្រាស់កើនបាន 24% និងទំហំប្រតិបត្តិការសរុបកើនបាន 35% ។ បណ្ដាស្ថាប័នជាច្រើនរបស់រដ្ឋាភិបាល ក៏ប្រើប្រាស់ ABA ដើម្បីគ្រប់គ្រងការទូទាត់ផងដែរ រួមមានជាអាទិ៍ ការប្រមូលពន្ធ បង់ទឹកភ្លើង និងសំរាម និងកម្រៃសេវាសាធារណៈផ្សេងៗទៀត បង្ហាញកាន់តែច្បាស់បន្ថែមទៀតអំពីទំនុកចិត្តមកលើ ABA ។
លោក Askhat Azhikhanov អគ្គនាយក និងជានាយកប្រតិបត្តិនៃធនាគារ ABA មានប្រសាសន៍ថា “យើងខ្ញុំមានមោទនភាពយ៉ាងក្រៃលែងដែលបានទទួលពាន ធនាគារបម្រើសេវារូបវន្តបុគ្គលដ៏ឆ្នើមបំផុតប្រចាំឆ្នាំ ជាលើកទីប្រាំ ។ ពានរង្វាន់នេះ បានឆ្លុះបង្ហាញពីកិច្ចខិតខំប្រឹងប្រែងជាបន្តបន្ទាប់របស់យើងខ្ញុំ ធ្វើយ៉ាងណាឲ្យសេវាធនាគារកាន់តែងាយស្រួលប្រើប្រាស់ ពេញដោយនវានុវត្ត ដោយគិតគូពីតម្រូវការជាក់ស្ដែងរបស់អតិថិជនជាគោល។ អ្វីដែលសំខាន់បំផុតនោះ ពានរង្វាន់នេះ បង្ហាញយ៉ាងច្បាស់ពីទំនុកចិត្តរបស់អតិថិជនមកលើធនាគារ ABA ផងដែរ” ។
នៅក្នុងសំណេរពាក់ព័ន្ធនឹងពានរង្វាន់របស់ធនាគារ ABA នាឆ្នាំនេះ ទស្សនាវដ្តី បានអធិប្បាយថា “ធនាគារ ABA ត្រូវបានទទួលស្គាល់ជា ធនាគារបម្រើសេវារូបវន្តបុគ្គលដ៏ឆ្នើមបំផុតប្រចាំឆ្នាំ ដោយសារលទ្ធផលដ៏រឹងមាំ ដោយបន្ដនាំមុខក្នុងទីផ្សារទាំងផ្នែករូបវន្ដបុគ្គល និងឌីជីថល ។ កម្មវិធី ABA Mobile ដែលជាផលិតផលឯករបស់ធនាគារ ត្រូវបានគេស្គាល់យ៉ាងទូលំទូលាយ ក្នុងន័យមធ្យោបាយទូទាត់ឌីជីថលប្រចាំប្រទេសកម្ពុជា។ វឌ្ឍនភាពឈានមុខរបស់ធនាគារ គួបផ្សំជាមួយនឹងបណ្ដាញសាខា និងសេវាកម្មដែលបន្ដពង្រីកជាលំដាប់ បានធ្វើឲ្យធនាគារនេះ ដើរតួសំខាន់ក្នុងបរិយាបន្នហិរញ្ញវត្ថុនៅកម្ពុជា ។” ជាមួយការផ្តោតលើនវានុវត្តន៍ និងយុទ្ធសាស្ដ្រអតិថិជនជាចម្បង ធនាគារ ABA បន្តនាំមុខ ក្នុងការពង្រឹងអនាគតឲ្យកាន់តែប្រសើរសម្រាប់វិស័យធនាគារនៅកម្ពុជា ៕ អត្ថបទសហការ
ចែករំលែកព័តមាននេះ