ខេត្តសៀមរាប៖ ព្រឹត្តិការណ៍ប្រឡងសរសេរតាមអាន ថ្នាក់ជាតិជាសាធារណៈ “សំណេរអង្គរ” លើកទី២ បានបញ្ចប់ដោយជោគជ័យ នៅបរិវេណស្ពានហាល ប្រាសាទអង្គរវត្ត នាថ្ងៃទី១៩ ខែមករា…
ខេត្តសៀមរាប៖ ព្រឹត្តិការណ៍ប្រឡងសរសេរតាមអាន ថ្នាក់ជាតិជាសាធារណៈ “សំណេរអង្គរ” លើកទី២ បានបញ្ចប់ដោយជោគជ័យ នៅបរិវេណស្ពានហាល ប្រាសាទអង្គរវត្ត នាថ្ងៃទី១៩ ខែមករា កន្លងទៅនេះ ក្រោមអត្ថបទ “សៀមរាប-អង្គរ គឺជារតនសម្បត្តិសេដ្ឋកិច្ចវប្បធម៌” ដោយមានអ្នកចូលរួមយ៉ាងច្រើនកុះករចំនួន ១២២០នាក់ មកពី ២២រាជធានី-ខេត្ត ដែលក្នុងនោះមានទាំងកុមារអាយុ៦ឆ្នាំ និងមនុស្សចាស់អាយុ៨១ឆ្នាំ ព្រមទាំងព្រះសង្ឃ ជនបរទេស និងអនិកជនខ្មែរ ដែលរស់នៅបរទេសខ្លះទៀតផង ។
ព្រឹត្តិការណ៍ “សំណេរអង្គរ” លើកទី២ ត្រូវបានផ្តួចផ្តើមរៀបចំឡើង ដោយក្រុមអ្នកស្រឡាញ់អក្សរសាស្ត្រខ្មែរ រួមជាមួយនឹងការគាំទ្រពីក្រសួងពាក់ព័ន្ធនានា និងអាជ្ញាធរមូលដ្ឋាន ក្នុងគោលបំណងលើកកម្ពស់ និងជំរុញទឹកចិត្តឱ្យសាធារណជន ជាពិសេសកូនខ្មែរចូលរួមស្រឡាញ់អក្សរសាស្ត្រខ្មែរ និងបំផុសឡើងវិញនូវការសរសេរតាមអានដើម្បីបង្កើនចំណេះដឹង ព្រមទាំងផ្សព្វផ្សាយបន្ថែមនូវវិស័យទេសចរណ៍នៅតំបន់រមណីយដ្ឋានអង្គរផងដែរ។ តួយ៉ាង ការប្រកួតសរសេរតាមអានថ្នាក់ជាតិនេះ បើកឱ្យមានការចូលរួមប្រកួតពីសំណាក់ប្រជាពលរដ្ឋគ្រប់ស្រទាប់ មិនប្រកាន់អាយុ ភេទ ជាតិ សាសន៍ តួនាទី ដើម្បីជ្រើសរើសជ័យលាភី ដែលសរសេរពាក្យខ្មែរបានត្រឹមត្រូវជាងគេបំផុត ។
ឆ្លៀតក្នុងឱកាសនេះ លោក ជុនហៀង ថាវសិទ្ធិ អនុប្រធានធុរកិច្ច ក្រុមហ៊ុន វ័ន ហ្វ្រេតធើនីធី (វីតាល់) បានឱ្យដឹងថា៖ «វីតាល់មានកិត្តិយសដែលបានចូលរួមជាដៃគូសហការឧបត្ថម្ភធំ ក្នុងព្រឹត្តិការណ៍សរសេរតាមអានថ្នាក់ជាតិដ៏ធំលើកទី២ នៅទឹកដីអង្គរ ខេត្តសៀមរាប ដែលកម្មវិធីនេះពិតជាមានអត្ថន័យយ៉ាងទូលំទូលាយជាទីបំផុត ក្នុងការបណ្ដុះស្មារតីស្រឡាញ់ និងចូលរួមក្នុងការអភិរក្សលើកតម្លៃអក្សរសាស្ត្រខ្មែរដែលជាសម្បត្តិវប្បធម៌ដ៏យូរលង់ណាស់មកហើយរបស់ដូនតាយើង។ ពិសេសគឺជួយពង្រឹងឱ្យយុវជន-យុវតីជំនាន់ក្រោយសរសេរភាសាខ្មែរ ឱ្យបានត្រឹមត្រូវតាមក្បួនអក្ខរាវិរុទ្ធ ការអានពាក្យខ្មែរឱ្យត្រឹមត្រូវ និងស្វែងរកអ្នកដែលមានស្នាដៃសរសេរអក្សរខ្មែរស្អាតជាងគេផងដែរ» ។
គួរបញ្ជាក់ផងដែរថា ការចូលរួមឧបត្ថម្ភរបស់វីតាល់សម្រាប់កម្មវិធីសំណេរអង្គរលើកទី២នេះ អាចកើតឡើងក៏ដោយសារការគាំទ្រ ពីសំណាក់អតិថិជន និងអ្នកប្រើប្រាស់ ដែលជានិច្ចកាល វីតាល់ បានបន្តរក្សាបេសកម្មក្នុងការកាត់ប្រាក់ចំណេញ២៥៛ ពីវីតាល់១ដប។ វីតាល់ប្តេជ្ញាតាំងចិត្ត ក្នុងការបន្តចូលរួមឧបត្ថម្ភគាំទ្រ ដល់ការបង្កើតអោយមានគម្រោងថ្មីៗ បន្ថែមទៀត ដើម្បីបុព្វហេតុជួយដល់វិស័យអប់រំ បរិស្ថាន សុខភាព-កីឡា ព្រមទាំងវប្បធម៌ និងសង្គម។ «វីតាល់មោទនភាព ផលិតផលជាតិ» ៕ អត្ថបទសហការ
ចែករំលែកព័តមាននេះ