កូកា-កូឡា បន្តប្តេជ្ញាយកចិត្តទុកដាក់លើកិច្ចការចីរភាពនៅកម្ពុជា ក្នុងជំនួបទ្វេភាគីជាមួយឯកឧត្ដម ឧបនាយករដ្ឋមន្ត្រី សុខ ចិន្តាសោភា
ទីក្រុងញូវយ៉ក, ថ្ងៃទី ២៧ ខែកញ្ញា ឆ្នាំ ២០២៤ ៖ កាលពីថ្ងៃព្រហស្បតិ៍ ទី ២៦…
ទីក្រុងញូវយ៉ក, ថ្ងៃទី ២៧ ខែកញ្ញា ឆ្នាំ ២០២៤ ៖ កាលពីថ្ងៃព្រហស្បតិ៍ ទី ២៦ ខែកញ្ញា ក្រុមហ៊ុន កូកា-កូឡា បានរំលឹកឡើងវិញនូវការប្តេជ្ញាចិត្តដ៏យូរអង្វែងចំពោះកិច្ចការចីរភាពរបស់ខ្លួននៅប្រទេសកម្ពុជា ក្នុងជំនួបទ្វេភាគីជាមួយ ឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ។ កិច្ចប្រជុំនេះ ធ្វើឡើងនៅក្នុងស្ថានបេសកកម្មអចិន្ត្រៃយ៍កម្ពុជានាទីក្រុងញូយ៉ក មុនពេលដែលឯកឧត្តមអញ្ជើញឡើងថ្លែងសុន្ទរកថា ក្នុងកិច្ចប្រជុំមហាសន្និបាតអង្គការសហប្រជាជាតិ ។
លោក Michael Goltzman អនុប្រធានជាន់ខ្ពស់នៃគោលនយោបាយសកល និងចីរភាព ដែលជាអ្នកតំណាងក្រុមហ៊ុន កូកា-កូឡា ក្នុងជំនួបទ្វេភាគីនោះ បានគូសបញ្ជាក់ពីការរួមចំណែកជាច្រើនទសវត្សរ៍របស់ក្រុមហ៊ុនចំពោះកំណើនសេដ្ឋកិច្ច ការងារអភិវឌ្ឍន៍ និងកិច្ចខិតខំប្រឹងប្រែងប្រកបដោយចីរភាពរបស់ក្រុមហ៊ុន នៅក្នុងប្រទេសកម្ពុជា ។
ក្នុងជំនួបនោះ លោក Goltzman បានសង្កត់ធ្ងន់លើភាពស្របគ្នានៃគោលបំណងរបស់ ក្រុមហ៊ុន កូកា-កូឡា ជាមួយនឹងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ដែលជាសសរស្តម្ភដ៏សំខាន់នៃចក្ខុវិស័យរបស់ប្រទេសកម្ពុជាឆ្នាំ ២០៥០ ដើម្បីជម្រុញកំណើនសេដ្ឋកិច្ចប្រកបដោយចីរភាព។ យុទ្ធសាស្ត្រនេះ ផ្តោតលើអាទិភាពសំខាន់ៗចំនួនប្រាំ ដូចជា៖ មនុស្ស ផ្លូវ ទឹក អគ្គិសនី និងបច្ចេកវិទ្យា ។ ក្រុមហ៊ុន កូកា-កូឡា ប្តេជ្ញាគាំទ្រដល់គោលដៅកាត់បន្ថយការបំភាយឧស្ម័នកាបូននៅកម្ពុជា ជាពិសេសនៅក្នុងវិស័យដែលជះឥទ្ធិពលខ្ពស់ដូចជា វិស័យវាយនភ័ណ្ឌកាត់ដេរជាដើម ។
លោក Goltzman បានមានប្រសាសន៍ថា ៖ «ខណៈពេលដែលកម្ពុជាកំពុងខិតខំប្រឹងប្រែងសម្រេចឱ្យបានជាប្រទេសចំណូលមធ្យមកម្រិតខ្ពស់នៅឆ្នាំ ២០៣០ និងមានចំណូលខ្ពស់នៅឆ្នាំ ២០៥០ ក្រុមហ៊ុន កូកា-កូឡា ពិតជាមានមោទកភាពចូលខ្លួនជាដៃគូសហការ ក្នុងដំណើរឆ្ពោះទៅសម្រេចឲ្យបាននូវការអភិវឌ្ឍប្រកបដោយចីរភាពរបស់កម្ពុជា ។ យើងកំពុងវិនិយោគលើដំណោះស្រាយដ៏មាននវានុវត្តន៍ ដែលលើកស្ទួយដល់ការអភិវឌ្ឍបៃតង និងលើកកម្ពស់ជីវភាពរស់នៅរបស់ប្រជាពលរដ្ឋក្នុងសហគមន៍ដែលយើងកំពុងធ្វើប្រតិបត្តិការអាជីវកម្ម» ។
ក្រុមហ៊ុន កូកា-កូឡា មានវត្តមាននៅក្នុងប្រទេសកម្ពុជាតាំងពីឆ្នាំ ១៩៦៣ ហើយបានដើរតួនាទីដ៏សំខាន់មួយក្នុងការអភិវឌ្ឍន៍សេដ្ឋកិច្ចជាតិកម្ពុជា និងរួមចំណែកក្នុងការផ្តល់ឱកាសការងារជាច្រើនកន្លែង ជាក់ស្តែងក្រុមហ៊ុនកំពុងមានបុគ្គលិកដែលបានបម្រើការដោយផ្ទាល់ចំនួនជាង ៨៣០ នាក់ បុគ្គលិកបម្រើការងារដោយប្រយោលជាង ៨០០០ នាក់។ ៩៩,៧% នៃបុគ្គលិក គឺជាជនជាតិខ្មែរ។ លើសពីនេះ ៣៧% នៃបុគ្គលិកដែលកាន់តំណែងក្នុងជួរថ្នាក់គ្រប់គ្រងកម្រិតកណ្ដាល គឺជាស្ត្រី។
ប្រតិបត្តិការអាជីវកម្មរបស់ ក្រុមហ៊ុន កូកា-កូឡា នៅកម្ពុជា ត្រូវបានគាំទ្រដោយដៃគូរបស់ខ្លួន គឺក្រុមហ៊ុន ស្វាយអឺ កូកា-កូឡា លីមីធីត ដែលជាដៃគូផលិតភេសជ្ជៈធំជាងគេលំដាប់ទីប្រាំរបស់ក្រុមហ៊ុន កូកា-កូឡា ដោយកំពុងមានវត្តមាននៅ កម្ពុជា វៀតណាម ចិន និងភាគខាងលិចសហរដ្ឋអាមេរិក ។
ក្នុងអំឡុងពេលនៃកិច្ចប្រជុំនេះ លោក Michael Goltzman អនុប្រធានជាន់ខ្ពស់នៃគោលនយោបាយសកល និងចីរភាព បានពិភាក្សាអំពីការរួមចំណែករបស់ ក្រុមហ៊ុន កូកា-កូឡា ចំពោះការគាំពារទឹក ការគ្រប់គ្រងសំណល់ប្លាស្ទិក ការបង្កើតសំបកវេចខ្ចប់ប្រកបដោយចីរភាព និងការលើកកម្ពស់ដល់សេដ្ឋកិច្ចចក្រា ។
លោក Goltzman បានរំលឹកផងដែរថា ក្រុមហ៊ុននៅតែប្រកាន់ខ្ជាប់នូវការគាំទ្ររបស់ខ្លួន ចំពោះយុទ្ធសាស្ត្របញ្ចកោណរបស់កម្ពុជា ដោយបន្តការវិនិយោគលើគំនិតផ្តួចផ្តើមពាក់ព័ន្ធនឹងចីរភាព ទឹក និងការវេចខ្ចប់ ដែលជំរុញឱ្យមានផលវិជ្ជមានដល់មនុស្ស និងបរិស្ថាន ។
អំពីក្រុមហ៊ុន កូកា-កូឡា
ក្រុមហ៊ុន កូកា-កូឡា (NYSE: KO) គឺជាក្រុមហ៊ុនភេសជ្ជៈសកល លក់ភេសជ្ជៈចំនួនជាង ៥០០ ម៉ាក នៅជាង ២០០ ប្រទេសនៅលើពិភពលោក ។ បន្ថែមពីលើម៉ាកយីហោ កូកា-កូឡា របស់ក្រុមហ៊ុន ផលិតផលរបស់យើងរួមមាន ម៉ាកភេសជ្ជៈដែលមានតម្លៃបំផុតរបស់ពិភពលោក ដូចជា ភេសជ្ជៈដែលផលិតពីរុក្ខជាតិ AdeS, តែបៃតង Ayataka, កាហ្វេ Costa, ទឹក Dasani, ទឹកផ្លែឈើ Del Valle, ទឹកដោះគោ Fairlife, Fanta , កាហ្វេ Georgia, តែ និងកាហ្វេ Gold Peak, តែ Honest, ទឹកក្រឡុក និងទឹកផ្លែឈើ Innocent, ទឹកផ្លែឈើ Minute Maid, ភេសជ្ជៈកីឡា Powerade, ទឹកផ្លែឈើ Simply, ទឹក Smartwater, Sprite, ទឹកvitaminwater និងទឹកដូង ZICO ។
យើងកំពុងអភិវឌ្ឍផលិតផលរបស់យើងឱ្យកាន់តែប្រសើរឡើងជាបន្តបន្ទាប់ រួមមានដូចជាការកាត់បន្ថយជាតិស្ករនៅក្នុងភេសជ្ជៈ និងការនាំយកផលិតផលថ្មីៗទៅកាន់ទីផ្សារជាដើម ។ យើងក៏កំពុងធ្វើការដើម្បីកាត់បន្ថយផលប៉ះពាល់របស់យើងទៅលើបរិស្ថាន តាមរយៈការផ្ដល់ភាពស្រស់បំព្រងដល់ធម្មជាតិវិញ និងការលើកកម្ពស់ការកែច្នៃ។ ជាមួយនឹងដៃគូផលិតភេសជ្ជៈរបស់យើង យើងផ្តល់ការងារដល់បុគ្គលិកជាង ៧ សែននាក់ ដែលជ្រោមជ្រែងដល់កំណើនសេដ្ឋកិច្ចសហគមន៍មូលដ្ឋាននៅទូទាំងពិភពលោក ។
សម្រាប់ព័ត៌មានបន្ថែម សូមចូលទៅកាន់ Coca-Cola Journey នៅលើគេហទំព័រ ៖ www.coca-colacompany.com និងតាមដានក្រុមហ៊ុន កូកា-កូឡា នៅលើ Twitter, Instagram, Facebook និង LinkedIn ៕ អត្ថបទសហការ
ចែករំលែកព័តមាននេះ