ធនាគារ ហុង លីអុង ខេមបូឌា ចុះ MoU ជាមួយសមាគមសហគ្រាសធុនតូច និងមធ្យម នៃប្រទេសម៉ាឡេស៊ី ដើម្បីជួយពន្លឿនកំណើនសហគ្រាសធុនតូច និងមធ្យម នៅប្រទេសកម្ពុជា
រាជធានីភ្នំពេញ ៖ កាលពីថ្ងៃទី ២៨ ខែមេសា ឆ្នាំ ២០២២ ធនាគារ ហុង លីអុង…
រាជធានីភ្នំពេញ ៖ កាលពីថ្ងៃទី ២៨ ខែមេសា ឆ្នាំ ២០២២ ធនាគារ ហុង លីអុង…
រាជធានីភ្នំពេញ ៖ កាលពីថ្ងៃទី ២៨ ខែមេសា ឆ្នាំ ២០២២ ធនាគារ ហុង លីអុង (ខេមបូឌា) ភីអិលស៊ី (‘HLBCAM’ ឬ ‘Bank’) បានចុះហត្ថលេខាលើអនុស្សរណៈយោគយល់គ្នា (MoU) ជាមួយសមាគមសហគ្រាសធុនតូច និងមធ្យម នៃប្រទេសម៉ាឡេស៊ី ដើម្បីជួយពន្លឿនកំណើនសហគ្រាសធុនតូច និងមធ្យម តាមរយៈការចែករំលែកចំណេះដឹង និងជំនាញ ក៏ដូចជាផ្តល់ការប្រឹក្សាយល់បល់ និងឱកាសក្នុងការបង្កើតប្រព័ន្ធអាជីវកម្មក្នុងគោលបំណងចូលរួមចំណែកក្នុងការទ្រទ្រង់ភាពរីកចម្រើននៃសហគ្រាសធុនតូច និងមធ្យម នៅប្រទេសកម្ពុជា ។ ការចុះហត្ថលេខានេះ ក៏មានគោលបំណងសម្រួលដល់អាជីវកម្មក្នុងការបង្កើនសក្តានុពលនៃការវិនិយោគរបស់សហគ្រាសធុនតូច និងមធ្យមរវាងប្រទេសកម្ពុជា និងប្រទេសម៉ាឡេស៊ីផងដែរ ។
ការចុះហត្ថលេខាលើអនុស្សរណៈយោគយល់គ្នា (MOU) ត្រូវបានធ្វើឡើងរវាងលោក Terrence Teoh នាយកគ្រប់គ្រង និងជាអគ្គនាយកប្រតិបត្តិនៃ ធនាគារ ហុង លីអុង ខេមបូឌា និងលោក Ding Hong Sing ប្រធានជាន់ខ្ពស់ នៃសមាគមសហគ្រាសធុនតូច និងមធ្យម នៃប្រទេសម៉ាឡេស៊ី ដោយមានការអញ្ជើញចូលរួមជាសក្ខីភាពដ៏ខ្ពង់ខ្ពស់ពីសំណាក់ឯកឧត្ដម Eldeen Husaini ឯកអគ្គរដ្ឋទូតម៉ាឡេស៊ី ប្រចាំកម្ពុជា និងឯកឧត្ដម ចឺយ វិចិត្រ ឯកអគ្គរាជទូតកម្ពុជាប្រចាំប្រទេសម៉ាឡេស៊ី ក្នុងពិធីនេះផងដែរ ។
ក្នុងនាមជាធនាគារដែលត្រូវបានទទួលស្គាល់ឲ្យកាន់តួនាទីយ៉ាងសំខាន់ក្នុងការជួយពន្លឿនកំណើនសេដ្ឋកិច្ចសហគ្រាសធុនតូច និងមធ្យម នៅប្រទេសកម្ពុជា លោក Teoh បានបញ្ជាក់ពីការប្តេជ្ញាចិត្តរបស់ HLBCAM ក្នុងការគាំទ្រសហគ្រាសធុនតូច និងមធ្យម ដើម្បីពង្រឹងអាជីវកម្មសមាជិក SME ទាំងអស់ឲ្យកាន់តែប្រសើរឡើងបន្ទាប់ពីសេដ្ឋកិច្ចដែលទើបតែងើបឡើងវិញពីជំងឺរាតត្បាត ហើយនឹងជួយកសាងឡើងវិញឱ្យកាន់តែរឹងមាំ និងកាន់តែមាននិរន្តរភាពតាមរយៈឱកាសពាណិជ្ជកម្ម និងការវិនិយោគផ្សេងៗ ។ សហគ្រាសធុនតូច និងមធ្យមនៅកម្ពុជាមានចំនួនគណនីអាជីវកម្ម ៩៨% ជួយរួមចំណែកដល់ទៅ ៧៣% សម្រាប់ការផ្ដល់ឱកាសការងារ និង ៥៨% វិនិយោគលើផលិតផលក្នុងស្រុកសរុប (GDP) ។
លោក Teoh បានមានប្រសាសន៍ថា ៖ «ដោយមានសហគ្រាសធុនតូច និងមធ្យម ជាអ្នកចូលរួមចំណែកយ៉ាងសំខាន់ក្នុងកំណើនសេដ្ឋកិច្ចរបស់កម្ពុជា យើងចែករំលែកនូវគោលដៅដូចគ្នានឹងកម្ពុជា ដើម្បីជួយជំរុញស្មារតីសហគ្រាស និងជំរុញការអភិវឌ្ឍន៍សេដ្ឋកិច្ច ។ តាមរយៈអនុស្សរណៈនេះ ខ្ញុំជឿថាសមត្ថភាពរួមគ្នារបស់យើង និងការយល់ដឹងស៊ីជម្រៅនៃទីផ្សារទាំងពីរដើម្បីជួយសមាជិក SME នៅប្រទេសកម្ពុជា និងប្រទេសម៉ាឡេស៊ី អាចស្វែងរកឱកាសក្នុងការបង្កើតប្រព័ន្ធអាជីវកម្មទៅវិញទៅមក ។ យើងក៏អាចជួយពួកគាត់ឱ្យភ្ជាប់ទំនាក់ទំនងអាជីវកម្មយ៉ាងមានប្រសិទ្ធភាព និងជួយដោះស្រាយទាំងផ្នែកហិរញ្ញវត្ថុ ហើយជាពិសេសផ្តល់ការប្រើប្រាស់ប្រព័ន្ធគ្រប់គ្រងសាច់ប្រាក់អាជីវកម្មបែបឌីជីថលទំនើប ដើម្បីជំរុញដំណើរការអាជីវកម្មឲ្យកាន់តែមានភាពងាយស្រួល និងនិរន្តរភាពកាន់តែទូលំទូលាយ» ។
លោក Ding Hong Sing តំណាងឲ្យសហគមន៍សហគ្រាសធុនតូច និងមធ្យមប្រចាំប្រទេសម៉ាឡេស៊ី បានមានប្រសាសន៍ថា អនុស្សរណៈនេះ នឹងបើកឱកាសដ៏មានប្រយោជន៍ជាច្រើនសម្រាប់សហគ្រាសធុនតូច និងមធ្យមរបស់ប្រទេសទាំងពីរដើម្បីជំរុញកិច្ចសហប្រតិបត្តិការនេះ កាន់តែមានប្រសិទ្ធភាពខ្ពស់ ។ “គោលបំណងរួមរបស់យើងគឺចែករំលែកជំនាញ និងចំណេះដឹងផ្នែកឧស្សាហកម្ម តាមរយៈដំណើរទស្សនកិច្ចសិក្សា សិក្ខាសាលា និងសិក្ខាសាលាជាមួយដៃគូអាជីវកម្មដែលពាក់ព័ន្ធ ។ តាមរយៈការរួមកម្លាំងគ្នា យើងអាចជួយសហគ្រាសធុនតូច និងមធ្យមឱ្យដឹងពីសក្តានុពល និងឱកាសពេញលេញក្នុងការទាញយកឱកាសវិនិយោគពីវិស័យ SME នៃប្រទេសកម្ពុជា និងប្រទេសម៉ាឡេស៊ីដែលកំពុងរីកចម្រើន ។
ឯកឧត្ដម ចឺយ វិចិត្រ ឯកអគ្គរាជទូតកម្ពុជាប្រចាំប្រទេសម៉ាឡេស៊ី បានមានប្រសាសន៍ថា អនុស្សរណៈនេះ ស្របតាមសេចក្តីត្រូវការ បច្ចុប្បន្នរបស់ប្រទេសកម្ពុជា ដើម្បីជំរុញការអភិវឌ្ឍន៍ឧស្សាហកម្ម តាមរយៈការធ្វើពិពិធកម្មសេដ្ឋកិច្ច លើកកម្ពស់ការប្រកួតប្រជែង និងការពង្រឹងផលិតភាពដូចមានចែង ក្នុងគោលនយោបាយអភិវឌ្ឍន៍ឧស្សាហកម្មឆ្នាំ ២០១៥-២០២៥ អនុម័តដោយរាជរដ្ឋាភិបាលកម្ពុជា ។
ឯកឧត្តមបានមានប្រសាសន៍បន្ថែមទៀតថា ៖ «អត្ថប្រយោជន៍ទទួលបានពីអនុស្សរណៈនេះនឹងជួយសហគ្រាសធុនតូច និងមធ្យមកម្ពុជាពង្រីកប្រព័ន្ធអេកូសហគ្រិនដើម្បីគាំទ្រដល់គោលដៅអភិវឌ្ឍន៍សេដ្ឋកិច្ច និងសង្គមកម្ពុជា ហើយជំរុញឆ្ពោះទៅរកកំណើនសេដ្ឋកិច្ចខ្ពស់ប្រកបដោយនិរន្តរភាព និងលើកកម្ពស់វិស័យឧស្សាហកម្ម» ។
ឯកឧត្ដម Eldeen Husaini ឯកអគ្គរដ្ឋទូតម៉ាឡេស៊ីប្រចាំកម្ពុជា បានបញ្ជាក់សារជាថ្មីអំពីចំណងមិត្តភាពដ៏រឹងមាំរយៈពេល ៦៥ ឆ្នាំ រវាងប្រទេសកម្ពុជា និងប្រទេសម៉ាឡេស៊ី ដោយលើកឡើងពីអនុស្សរណៈនេះថាជាការឆ្លុះបញ្ចាំងដ៏ល្អនៃការប្តេជ្ញាចិត្តរបស់ប្រទេសទាំងពីរក្នុងការពង្រឹងទំនាក់ទំនង ជាពិសេសក្នុងពាណិជ្ជកម្មទ្វេភាគី ។
ឯកឧត្តមបានមានប្រសាសន៍បន្ថែមទៀតថា ៖ «ម៉ាឡេស៊ីទន្ទឹងរង់ចាំអនុស្សរណៈនេះសម្រាប់ត្រួសត្រាយផ្លូវលើកិច្ចសហការ និងឱកាសដែលនឹងផ្តល់ផលប្រយោជន៍ទៅវិញទៅមកដល់សហគ្រាសធុនតូច និងមធ្យមមកពីប្រទេសទាំងពីរ ដើម្បីពង្រឹងទិដ្ឋភាពសហគ្រាសធុនតូច និងមធ្យម ហើយរួមចំណែកលើកកម្ពស់ការប្រកួតប្រជែងអាជីវកម្មនៅក្នុងតំបន់» ។
ធនាគារ ហុង លីអុង (HLBCAM) តែងតែជួយគាំទ្រដល់សហគ្រាសធុនតូច និងមធ្យមនៅប្រទេសកម្ពុជា តាំងពីធនាគារចាប់ផ្តើមដំណើរការដំបូងនៅប្រទេសកម្ពុជា ដែល HLBCAM បានបង្ហាញពីការប្តេជ្ញាចិត្តក្នុងការជួយពន្លឿនកំណើនសហគ្រាសធុនតូច និងមធ្យមនៅប្រទេសកម្ពុជាដោយដាក់ឱ្យប្រើប្រាស់នូវកម្មវិធី SME មួយចំនួនដូចជា SMElite Package ដែលមានគោលបំណងពង្រឹងសក្តានុពលអាជីវកម្មរបស់សហគ្រាសធុនតូច និងមធ្យមនៅប្រទេសកម្ពុជា ជាមួយនឹងកញ្ចប់ហិរញ្ញប្បទានដែលអាចបត់បែនបាន ដោយផ្តល់ហិរញ្ញប្បទានរយៈពេលរហូតដល់ ១៥ឆ្នាំ និង ១០០% នៃតម្លៃទ្រព្យបញ្ចាំ ៕ ដោយសហការ
ចែករំលែកព័តមាននេះ