រាជធានីភ្នំពេញ ៖ ថា សារុន មកពីក្លិបពុទ្ធសេរីវង្សពោធិសែនជ័យ បានផ្ដួលកីឡាករអ៊ីរ៉ង់ Hassani Nashtroudឱ្យសន្លប់នៅត្រឹមទឹកទី២ក្នុងជំនួបមិត្តភាពនៅលើសង្វៀនទូរទស្សន៍ស៊ីអិនស៊ីកាលពីថ្ងៃអាទិត្យទី២២ ធ្នូ ចំណែកកីឡាករ…
រាជធានីភ្នំពេញ ៖ ថា សារុន មកពីក្លិបពុទ្ធសេរីវង្សពោធិសែនជ័យ បានផ្ដួលកីឡាករអ៊ីរ៉ង់ Hassani Nashtroudឱ្យសន្លប់នៅត្រឹមទឹកទី២ក្នុងជំនួបមិត្តភាពនៅលើសង្វៀនទូរទស្សន៍ស៊ីអិនស៊ីកាលពីថ្ងៃអាទិត្យទី២២ ធ្នូ ចំណែកកីឡាករ បាង កាយ៉ាក មកពីសមាគមកីឡាប្រដាល់ក្រសួងកសិកម្ម បានត្រឹមយកឈ្នះកីឡាករថៃ ប៊ៀរ ថៃ ដោយពិន្ទុប៉ុណ្ណោះ។
ក្រឡេកមើលការប្រកួតនាពេលនោះ កីឡាករ ថា សារុន ដូចជាគ្មានលំបាកអ្វីបន្តិចសោះ ជាក់ស្ដែងនៅត្រឹមទឹកទី១ ថា សារុនបានធ្វើឱ្យកីឡាករអ៊ីរ៉ង់ស្ទើរតែមិនអាចតដៃបានម្ដងៗទៅហើយ ដោយគេបានបញ្ចេញស្នៀតជើងទាត់សន្ធាប់នៅផ្នែកខាងក្រោម តែសំណាងល្អដែលគូប្រកួតអាចទ្រាំទ្របានដល់ចប់ទឹកទី១។
ចូលដល់ទឹកទី២ ថា សារុន ដែលមានប្រៀបស្រាប់នោះបានសម្រុកចូលវាយយ៉ាងគំហុក ដោយបញ្ជូនស្នៀតកណ្ដាប់ដៃម៉ាត់ចូលមុខនិងពោះទឹកកីឡាករអ៊ីរ៉ង់ពេញៗរហូតមិនអាចតដៃបានត្រូវលោកអាជ្ញាកណ្ដាប់បញ្ឈប់លែងឱ្យប្រកួតតែម្ដង។
ចំណែកការប្រកួតរវាងកីឡាករ បាង កាយ៉ាក ជាមួយកីឡាករថៃប៊ៀរ ថៃវិញនោះកាន់តែមានភាពស្វិតស្វាញខ្លាំងថែមទៀតដោយប្រកួតគ្នា៥ទឹកពេញទម្រាំឈានទៅដល់ការចាញ់ឈ្នះ ។ គូនេះប្រកួតគ្នាចាប់ពីទឹកទី១ដល់ទឹកទី៤ចាញ់ឈ្នះ២ទឹកម្នាក់ ប៉ុន្តែបាង កាយ៉ាក គេបានព្យាយាមប្ដូរកណ្ដាប់ដៃនៅចុងទឹកទី៥ចូលគោលដៅច្រើនជាងទើបចប់ការប្រកួតអាជ្ញាកណ្ដាលបានប្រកាសឱ្យបាង កាយ៉ាក ឈ្នះពិន្ទុដោយមិនឯកច្ឆ័ន្ទ ៣ទល់២។
រីឯគូប្រកួតមិត្តភាពធម្មតាវិញ កីឡាករ ឡុង រ៉ាមី មកពីក្លិបខ្លារខិនមានរិទ្ធ បានត្រឹមស្មើពិន្ទុជាមួយកីឡាករ ស៊ន រ៉ាគីម មកពីក្លិបរាហូកីឡាខេត្តបាត់ដំបង និងកីឡាករ អេលីត សុខា មកពីក្លិបប៉ែនកាក់គុនខ្មែរ បានយកឈ្នះកីឡាករ សុខ កាន មកពីក្លិបឃ្លាំងមឿងកីឡានៅក្នុងទឹកទី១ ៕ (កែសម្រួលដោយ ៖ បុប្ផា)
ចែករំលែកព័តមាននេះ