រាជធានីភ្នំពេញ ៖ ការគ្រប់គ្រងកាកសំណល់ គឺជាបញ្ហាមួយដែលត្រូវដោះស្រាយជាបន្ទាន់នៅក្នុងប្រទេសកម្ពុជា ។ កំណើនសេដ្ឋកិច្ចដ៏រឹងមាំ ការពង្រីកទីក្រុងយ៉ាងឆាប់រហ័ស និងការអភិវឌ្ឍវិស័យឧស្សាហកម្ម រួមជាមួយនឹងការកើនឡើងនូវការប្រើប្រាស់របស់ប្រជាជនដែលមានកម្រិតជីវភាពមធ្យម និងខ្ពស់ដែលមានចំនួនកាន់តែច្រើនឡើងៗនៅក្នុងរយៈពេលពីរទសវត្សរ៍ចុងក្រោយ…
រាជធានីភ្នំពេញ ៖ ការគ្រប់គ្រងកាកសំណល់ គឺជាបញ្ហាមួយដែលត្រូវដោះស្រាយជាបន្ទាន់នៅក្នុងប្រទេសកម្ពុជា ។ កំណើនសេដ្ឋកិច្ចដ៏រឹងមាំ ការពង្រីកទីក្រុងយ៉ាងឆាប់រហ័ស និងការអភិវឌ្ឍវិស័យឧស្សាហកម្ម រួមជាមួយនឹងការកើនឡើងនូវការប្រើប្រាស់របស់ប្រជាជនដែលមានកម្រិតជីវភាពមធ្យម និងខ្ពស់ដែលមានចំនួនកាន់តែច្រើនឡើងៗនៅក្នុងរយៈពេលពីរទសវត្សរ៍ចុងក្រោយ បានធ្វើឱ្យមានការប៉ះពាល់យ៉ាងខ្លាំងដល់បរិមាណកាកសំណល់នៅក្នុងប្រទេសកម្ពុជា ។ នេះបើយោងតាមប្រកាសព័ត៌មានរបស់មូលនិធិអាល្លឺម៉ង់ Konrad-Adenauer-Stiftung (KAS) ចុះថ្ងៃទី ១៩ ខែកញ្ញា ឆ្នាំ២០១៩ កន្លងទៅ ។
ជារៀងរាល់ថ្ងៃគ្រាន់តែរាជធានីភ្នំពេញមួយបានបង្កើតឱ្យមានកាកសំណល់ក្នុងបរិមាណចន្លោះពី 2,000 ទៅដល់ 3,000 តោន ដែលក្នុងនោះមាន 600 តោន គឺជាកាកសំណល់ប្លាស្ទិក ។
ប្រទេសកម្ពុជាទាំងមូលបានបង្កឱ្យមានកាកសំណល់ជាង 10,000 តោនជារៀងរាល់ថ្ងៃ ឬច្រើនជាង 3.6 លានតោននៅក្នុងមួយឆ្នាំ ។ កំណើននៃការបង្កកាកសំណល់នេះរួមមានកាកសំណល់គ្រប់ប្រភេទទាំងអស់ ពោលគឺកាកសំណល់រឹងទីក្រុង កាកសំណល់ឧស្សាហកម្ម កាកសំណល់គ្រោះថ្នាក់ កាកសំណល់សំណង់ និងកាកសំណល់ពីការវាយកម្ទេចអគារដែលបង្កឱ្យមានបញ្ហាប្រឈមជាច្រើន ។ ជាទូទៅបញ្ហានៅក្នុងការគ្រប់គ្រងកាកសំណល់មានដូចជា ៖ កង្វះខាតការប្រមូលកាកសំណល់ឱ្យបានត្រឹមត្រូវ ហេដ្ឋារចនាសម្ព័ន្ធប្រព្រឹត្តកម្ម បច្ចេកទេស ការបណ្ដុះបណ្ដាលបច្ចេកទេសបុគ្គលិក ក៏ដូចជាគោលនយោបាយគ្រប់គ្រងប្រកបដោយប្រសិទ្ធភាពផងដែរ ។
កាកសំណល់ដែលចេះតែមានចំនួនកើនឡើងបង្កឱ្យមានបញ្ហាធ្ងន់ធ្ងរចំពោះសុខភាព និងបរិស្ថានដែលត្រូវបានលើកឡើងជារឿយៗនៅក្នុងបណ្ដាញផ្សព្វផ្សាយក្នុងស្រុក និងបណ្ដាញសង្គមនានា ។
កិច្ចប្រជុំកំពូលស្ដីពីកាកសំណល់នៅកម្ពុជាឆ្នាំ ២០១៩ នាថ្ងៃទី១៩ ខែកញ្ញា គឺជាការជួបជុំអង្គប្រតិបត្តិពីសហគមន៍ធុរកិច្ចកម្ពុជា អ្នករៀបចំគោលនយោបាយ និងនាយកដ្ឋានពាក់ព័ន្ធ ព្រមទាំងអង្គការបរិស្ថាន និងក្រុមហ៊ុនទើបបង្កើតថ្មីផងដែរ ។ កិច្ចប្រជុំកំពូលនេះត្រូវបានរៀបចំដោយមូលនិធិអាល្លឺម៉ង់ Konrad-Adenauer-Stiftung (KAS) ក្រុមធុរកិច្ចអាល្លឺម៉ង់ប្រចាំនៅកម្ពុជា (ADW) និងអង្គការកែច្នៃសំរាម និងការសិក្សានៅកម្ពុជា (COMPED) ។
ប្រភពដដែលបានបញ្ជាក់ថា គោលដៅនៃកិច្ចប្រជុំកំពូលនេះ គឺដើម្បីបង្កើតកិច្ចពិភាក្សាដែលលើកទឹកចិត្តឱ្យមានភាពជាដៃគូរវាងអ្នកដោះស្រាយបញ្ហាវិស័យសាធារណៈ និងផ្នែកឯកជន វិនិយោគិន និងអ្នកពាក់ព័ន្ធផ្សេងៗទៀតនៅក្នុងវិស័យនេះ ។ អ្នកចូលរួមជាង 300 នាក់បានចុះឈ្មោះចូលរួមនៅក្នុងកម្មវិធីនេះ ហើយក៏មានការចូលរួមពីអ្នករៀបចំពិព័រណ៍ចំនួន ២៥នាក់ផងដែរ ។
លោកបណ្ឌិត Daniel Schmücking ជានាយកប្រចាំប្រទេសនៃមូលនិធិខុនរ៉ាដ បានមានប្រសាសន៍ថា «យើងមានក្ដីសោមនស្សយ៉ាងខ្លាំងដែលអាចបង្កើតកម្មវិធីជួបជុំមនុស្សជាច្រើន ដើម្បីលើកឡើងអំពីប្រធានបទដ៏មានសារសំខាន់នេះ ដែលនេះជាការសបញ្ជាក់ថា កាកសំណល់គឺជាប្រធានបទដែលធ្វើឱ្យយើងទាំងអស់គ្នាមានការព្រួយបារម្ភ ហើយដំណោះស្រាយចំពោះបញ្ហានេះដែលនឹងជួយកែលម្អបរិស្ថាន និងសង្គមរបស់យើងទាំងមូល»។ លោកបានបន្ថែមថា «ខ្ញុំសង្ឃឹមថា យើងអាចចូលរួមចំណែកនៅក្នុងការជំរុញកិច្ចសហប្រតិបត្តិការប្រកបដោយជោគជ័យរវាងវិស័យសាធារណៈ និងឯកជនស្ដីពីការគ្រប់គ្រងកាកសំណល់ ។ យើងមានឱកាសជាច្រើនដើម្បីសម្រេចកិច្ចការនេះ» ។
កម្មវិធីនេះបានធ្វើឡើងនៅ The FACTORY ភ្នំពេញ ដែលមានវាគ្មិនមួយចំនួនមកពីរដ្ឋបាលសាធារណៈ សង្គមស៊ីវិល ប្រព័ន្ធអេកូសេដ្ឋកិច្ច ធ្វើការចែករំលែកបទពិសោធន៍ និងគំនិតរបស់ខ្លួនតាមរយៈការធ្វើបទបង្ហាញ និងការពិភាក្សាតុមូល ។ ប្រធានបទគឺស្ដីអំពីចក្ខុវិស័យសម្រាប់ការគ្រប់គ្រងកាកសំណល់ប្រកបដោយប្រសិទ្ធភាព ដំណោះស្រាយកាកសំណល់ប្រកបដោយជោគជ័យ និងមានភាពច្នៃប្រឌិតរបស់ប្រទេសកម្ពុជា ព្រមទាំងការចែករំលែកបទពិសោធន៍របស់ប្រទេសអាល្លឺម៉ង់ពាក់ព័ន្ធនឹងការគ្រប់គ្រង និងកែច្នៃកាកសំណល់ ។
ប្រទេសអាល្លឺម៉ង់ ត្រូវបានចាត់ទុកជាប្រទេសឈានមុខគេលំដាប់អន្តរជាតិនៅក្នុងការគ្រប់គ្រង និងកែច្នៃកាកសំណល់ប្រកបដោយជោគជ័យ ហើយក្រុមហ៊ុនអាល្លឺម៉ង់មួយចំនួនកំពុងដំណើរការអាជីវកម្មនៅក្នុងវិស័យគ្រប់គ្រងកាកសំណល់ក្នុងតំបន់អាស៊ីអាគ្នេយ៍ ។
អ្នកចូលរួមក៏មានឱកាសឆ្លើយសំណួរ ចម្លើយ ក្នុងកិច្ចពិភាក្សាទាំងឡាយដែលមានក្នុងកិច្ចប្រជុំកំពូលតាមរយៈការលើកជាសំណួរផ្សេងៗ ។ ក្រៅពីនេះកិច្ចពិភាក្សានេះផ្ដល់នូវឱកាសទំនាក់ទំនងដើម្បីជួបជាមួយនឹងដៃគូសក្ដានុពល ហើយនឹងមានការធ្វើបទបង្ហាញអំពីដំណោះស្រាយបែបទំនើប ការច្នៃប្រឌិត និងកម្មវិធីផ្សេងៗពីអ្នករៀបចំពិព័រណ៍ជាច្រើននាក់នៅក្នុងកម្មវិធីនោះផងដែរ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ