រាជធានីភ្នំពេញ ៖ តារាសម្តែង និងជាអតីតតារាបង្ហាញម៉ូដប្រចាំក្រុមអុីម៉ា អ្នកនាងស្រីពេជ្រ បានភ្ជាប់បេះដូងជាមួយបុរសនៅអាមេរិកជាច្រើនឆ្នាំមកហើយ ។ បុរសកំពូលស្នេហ៍របស់នាង មានគម្រោងនាំយកតារាស្រីសម្បុរស្រអែមស្រស់រូបនេះទៅនៅទឹកដីជឿនលឿនមួយនោះទៀតផង ។
រាជធានីភ្នំពេញ ៖ តារាសម្តែង និងជាអតីតតារាបង្ហាញម៉ូដប្រចាំក្រុមអុីម៉ា អ្នកនាងស្រីពេជ្រ បានភ្ជាប់បេះដូងជាមួយបុរសនៅអាមេរិកជាច្រើនឆ្នាំមកហើយ ។ បុរសកំពូលស្នេហ៍របស់នាង មានគម្រោងនាំយកតារាស្រីសម្បុរស្រអែមស្រស់រូបនេះទៅនៅទឹកដីជឿនលឿនមួយនោះទៀតផង ។
ថ្មីៗនេះអ្នកសិល្បៈស្និទ្ធស្នាលទម្លាយឱ្យដឹងថា ស្រីពេជ្រ ទើបតែបើកហាងលក់គុយទាវធំមួយនៅចំកន្លែងអ៊ូអរកណ្តាលរាជធានីភ្នំពេញ ។ អ្នកសិល្បៈមួយចំនួនលើកឡើងថា ស្រីពេជ្រ អាចបានជំនួយពីម្ចាស់ស្នេហ៍នាងសម្រាប់របរបើកហាងគុយទាវនេះ ។
នាងស្រីពេជ្រ ឆ្នាំនេះមានយីអ៊ុនឡើងវិញ ក្រោយពីផ្អាកអាជីពសិល្បៈមួយរយៈ ងាកទៅច្បាមមុខរបរថ្មី ។ នាងទទួលបានការងារសិល្បៈច្រើនគួរសម ដោយសារបណ្តាផលិតកម្មទាំងក្នុង និងក្រៅប្រទេសផ្តល់ឱកាសឱ្យនាងសម្តែងមិនដែលដាច់ឡើយ ។
ម៉្លោះហើយទើបតារាសម្តែងរូបនេះមានភាពកក់ក្តៅក្នុងពេលជំហានច្បាមអាជីពសិល្បៈឡើងវិញទទួលបានការទាក់ទាញពីម្ចាស់ផលិតកម្មទាំងក្នុង និងក្រៅស្រុក ។ ថ្មីៗនេះស្រីពេជ្រ ទើបតែបានចូលរួមថតខារ៉ាអូខេឱ្យផលិតកម្មថោន សម្រាប់ចេញលក់ក្នុងឱកាសបុណ្យចូលឆ្នាំខ្មែរនាពេលខាងមុខ ដោយនាងរំលេចឈុតសម្លៀកបំពាក់ប្រពៃណីខ្មែរយ៉ាងស្រស់សោភា ។ ស្រីពេជ្រ ពេលទៅសម្តែងខារ៉ាអូខេឱ្យផលិតកម្មថោននៅទន្លេបាទី កាលពីថ្ងៃទី២៥ កុម្ភៈ ឆ្នាំ២០១៤ គេឃើញបុរសម្នាក់វ័យកណ្តាលដើរយ៉ាងកៀកកិតជិតនាង និងតាមមើលគ្រប់ជំហានសម្តែងរបស់នាង ។ បុរសនោះ គឺជាម្ចាស់ចិត្តនាងនៅអាមេរិក ហើយស្រីពេជ្រ ប្រាប់អ្នកសិល្បៈថា ទើបតែមកលេងស្រុកបានប៉ុន្មានអាទិត្យ និងឆ្លៀតពេលជូននាងទៅសម្តែងដើម្បីបានសាងអនុស្សាវរីយ៍បន្ថែមទៀត ក្រោយពេលរស់នៅបែកគ្នា ។
បុរសនោះក្រៅពីមកលេងស្រីពេជ្រ ជាគូស្នេហ៍ ថែមទាំងមកជួយជាគំនិតដល់ស្រីពេជ្រ លើរបរលក់គុយទាវទៀតផង ។ ស្រីពេជ្របញ្ជាក់ថា បុរសជាម្ចាស់ចិត្តនាង ទើបតែមកលេងស្រុកសាជាថ្មី ដើម្បីមកមើលការងារខ្លះក្នុងស្រុក ដូចដែលអ្នកសិល្បៈលើកឡើងមែន ។ ចំពោះហាងគុយទាវ មុនពេលបើកនាងបានសុំយោបល់ពីម្ចាស់ស្នេហ៍ផងដែរ ដោយសារតែពួកនាងស្គាល់គ្នាយូរឆ្នាំមកហើយ និងយល់ចិត្តគ្នា យោគយល់គ្នា ឱ្យតែមានគម្រោងធ្វើអ្វីមួយតែងតែសួរនាំគ្នា ដើម្បីបញ្ចៀសរឿងរ៉ាវនាំឱ្យមើលមុខគ្នាមិនចំ ។
ហាងគុយទាវរបស់នាង មានទីតាំងនៅទល់មុខសណ្ឋាគារឡឺប្រេសុីដង់ តាមបណ្តោយមហាវិថីកម្ពុជាក្រោម បើកលក់បានមួយខែមកហើយ គ្រាន់តែនាងមិនទាន់ប្រកាសជាផ្លូវការថា ជាហាងអ្វី រង់ចាំប្តូរឈ្មោះសិន ព្រោះនាង និងគូស្នេហ៍រង់ចាំដាក់ឈ្មោះណាដែលល្អ ពីរោះទាក់ទាញ ។ មូលហេតុនាងបើកហាងគុយទាវនេះ ដោយសារតែនាងស្រឡាញ់ផ្នែកលក់គុយទាវ កាហ្វេ ព្រោះអ្នកណាក៏ត្រូវការហូបជាប្រចាំ ។ បើមុខរបរលក់ខោអាវ អ៊ុតសក់ កែសម្រស់ នាងមិនចូលចិត្តប៉ុន្មានទេ ព្រោះឃើញគេដួលច្រើនណាស់។
ស្រីពេជ្រ ត្រូវម្ចាស់ស្នេហ៍របស់នាង មានគម្រោងនាំទៅរស់នៅអាមេរិក ដោយកំពុងតែរត់ការ ព្រោះពួកនាងស្រឡាញ់គ្នាដូចប្តីប្រពន្ធទៅហើយ ។ អ្នកសិល្បៈជាមិត្តភក្តិរបស់ស្រីពេជ្រ លើកឡើងថា នាងមានសំណាងគ្រាន់បើ ព្រោះរកបានអ្នកស្រឡាញ់ថ្នាក់ថ្នម ចេះយល់ចិត្ត ។ ស្រីពេជ្រ ផ្ទាល់ក៏ទទួលស្គាល់ដែរថា នាងពិតជាមានសំណាងមែន ព្រោះរកបានអ្នកស្រឡាញ់ពេញបេះដូង ។ នាងប្តេជ្ញាចិត្តថែរក្សាស្នេហានេះឱ្យគង់វង្សដោយភាពអត់ធ្មត់ ៕
ចែករំលែកព័តមាននេះ