រាជធានីភ្នំពេញ ៖ រដ្ឋមន្ត្រីក្រសួងវប្បធម៌ និងវិចិត្រសិល្បៈលោកស្រី ភឿង សកុណា បានចាត់ទុកមហោស្រពសិល្បៈមហាជនអភិវឌ្ឍន៍ជាតិជាការលើកស្ទួយ និងលើកទឹកចិត្តសិល្បករ សិល្បការិនី។
លោកស្រីបានអះអាងថា ការរៀបចំឱ្យមានការប្រកួតប្រជែងមហោស្រពសិល្បៈមហាជនអភិវឌ្ឍន៍ថ្នាក់ជាតិ មានសារសំខាន់ណាស់ក្នុងការលើកស្ទួយ និងលើកទឹកចិត្តសិល្បករ សិល្បការិនីទូទាំងប្រទេស សំដៅរួមចំណែកថែរក្សាការពារ និងលើកកម្ពស់តម្លៃសិល្បៈវប្បធម៌ ប្រពៃណី ទំនៀមទំលាប់ដែលជាបេតិកភណ្ឌវប្បធម៌អរូបិយ៍របស់ជាតិ។
លោកស្រី ភឿង សកុណា មានប្រសាសន៍បែបនេះក្នុងពិធីបើកមហោស្រពសិល្បៈមហាជនអភិវឌ្ឍន៍ថ្នាក់ជាតិឆ្នាំ២០១៤ ដែលធ្វើឡើងកាលពីថ្ងៃទី២១ កុម្ភៈ ២០១៤ នៅសាលសន្និសីទចតុមុខ រាជធានីភ្នំពេញ។
លោកស្រីបញ្ជាក់ថា មហោស្រពសិល្បៈមហាជនអភិវឌ្ឍន៍ថ្នាក់ជាតិក្នុងឆ្នាំនេះមានស្នាដៃចំនួន២៤មកពីទូទាំងរាជធានី-ខេត្ត ក្នុងនោះមានទម្រង់ល្ខោនចំនួន៧ស្នាដៃ ទម្រង់របាំ១២ស្នាដៃ ទម្រង់អាយ៉ៃចំនួន៥ស្នាដៃ និងឆាកកំប្លែងរឿង៣ស្នាដៃ ដោយមានសិល្បករ សិល្បការិនីចូលរួមមិនតិចជាង៦០០នាក់ទេ។
គួរបញ្ជាក់ថា ការរៀបចំប្រឡងប្រណាំងមហោស្រពមហាជនអភិវឌ្ឍន៍ថ្នាក់ជាតិនាពេលនេះក៏បានភ្ជាប់ការអបអរសាទរទិវាវប្បធម៌ជាតិដែលនឹងប្រារព្ធធ្វើនៅថ្ងៃទី៣ មីនា ២០១៤ នៅសាលមហោស្រពចតុមុខ ក្រោមអធិបតីភាពសម្តេចអគ្គមហាសេនាបតីតេជោហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន៕
ចែករំលែកព័តមាននេះ