រាជធានីភ្នំពេញ ៖ តារាកំប្លែងប្រចាំស្ថានីយទូរទស្សន៍ CTN នាយក្រូច បានសម្តែងការសោកស្តាយ និងសូមទោសចំពោះកំហុសឆ្គងនៃការសម្តែងរបស់ខ្លួន កាលពីពេលកន្លងទៅដែលរងការអះអាងថា ធ្វើឱ្យប៉ះពាល់ដល់សាសនាអ៊ិស្លាម ។ នាយក្រូច បានចាត់ទុកការសម្តែងរបស់ខ្លួននាពេលនោះ ក្នុងន័យផ្តល់ការសើចសប្បាយដល់ទស្សនិកជនប៉ុណ្ណោះ គឺគ្មានគោលបំណងណាមួយចង់មាក់
រាជធានីភ្នំពេញ ៖ តារាកំប្លែងប្រចាំស្ថានីយទូរទស្សន៍ CTN នាយក្រូច បានសម្តែងការសោកស្តាយ និងសូមទោសចំពោះកំហុសឆ្គងនៃការសម្តែងរបស់ខ្លួន កាលពីពេលកន្លងទៅដែលរងការអះអាងថា ធ្វើឱ្យប៉ះពាល់ដល់សាសនាអ៊ិស្លាម ។ នាយក្រូច បានចាត់ទុកការសម្តែងរបស់ខ្លួននាពេលនោះ ក្នុងន័យផ្តល់ការសើចសប្បាយដល់ទស្សនិកជនប៉ុណ្ណោះ គឺគ្មានគោលបំណងណាមួយចង់មាក់ងាយដល់សាសនាអ៊ិស្លាមឡើយ តែវាជាកំហុសដោយអចេតនា ។
ការសូមទោសរបស់តារាកំប្លែងរួមក្រុមជាមួយនាយពែកមី រូបនេះធ្វើឡើងបន្ទាប់ពីមានសមាគមខ្មែរអ៊ិស្លាមមួយសម្តែងការមិនសប្បាយចិត្ត និងទាមទារឱ្យតារាកំប្លែងនាយក្រូច សុំទោសជាសាធារណៈ ចំពោះការសម្តែងកំប្លែងកាលពីឆ្នាំ២០១១ ធ្វើឱ្យប៉ះពាល់ដល់សាសនាអ៊ិស្លាម ។ ឆ្លើយតបការទាមទារនេះ តារាកំប្លែងដែលមានប្រភពមកពីខេត្តកំពង់ស្ពឺនាយក្រូច បានសរសេរសារកាលពីពេល ថ្មីៗនេះបញ្ជាក់ពីការសោកស្តាយ និងសូមការអភ័យទោសចំពោះកំហុសរបស់ខ្លួនដែលបានកើតឡើងដោយអចេតនាបង្ហោះនៅលើបណ្តាញសង្គមហ្វេសប៊ុករបស់ខ្លួន ។
នាយក្រូច សរសេរថា «ខ្ញុំបាទនាយក្រូចសូមខន្តីអភ័យទោសពីបងប្អូនខ្មែរអ៊ិស្លាមទាំងអស់ទូទាំងពិភពលោក ដោយការសម្តែងរបស់ខ្ញុំមួយកាលពីឆ្នាំ២០១១ ហើយមានការប៉ះពាល់ដល់វប្បធម៌ប្រពៃណីសាសនារបស់បងប្អូន ។ កាលដើមឡើយខ្ញុំគិតថា ជាការសម្តែងកំប្លែងជូនទស្សនិកជនឱ្យបានសើចសប្បាយតែប៉ុណ្ណោះ មិនបានដឹងខ្លួនខុសឡើយ ។ ណាមួយខ្ញុំក៏មិនមានបំណងចង់ប្រមាថមើលងាយដល់សាសនាបងប្អូនដែរ នេះកំហុសដោយអចេតនារបស់ខ្ញុំ ហេតុនេះហើយសូមបងប្អូនខ្មែរអ៊ិស្លាមទាំងអស់កុំខឹងអន់ចិត្តខ្ញុំអី ។ សូមអរគុណនូវការស្រលាញ់រាប់អាន និងគាំទ្ររូបខ្ញុំនាយក្រូច តាំងតែពីដើមរហូតមក ហើយសូមបន្តការគាំទ្រខ្ញុំទៀត» ។
តារាកំប្លែងនាយក្រូច ទទួលរងការរិះគន់ខ្លាំង ពីមហាជនជាអ្នកគាំទ្រ កាលពីពេល ថ្មីៗនេះ ចំពោះឈុតសម្តែងកំប្លែងមួយជាមួយប្អូនស្រី គឺនាងអីុត ដោយនាយស្លៀកពាក់តាមបែបខ្មែរអ៊ិស្លាម កាលពីអំឡុងឆ្នាំ២០១១ ក្នុងកម្មវិធីពិព័រណ៍ពាណិជ្ជកម្មភូមិមួយផលិតផលមួយ ដែលធ្វើឡើងក្នុងខេត្តកែប។ នៅក្នុងឈុតឆាក ដែលនាយក្រូចសម្តែងជាមួយនាងអីុត គឺនាយក្រូចដើរតួជាគ្រូដាក់ស្នេហ៍ ជនជាតិខ្មែរអ៊ិស្លាម ដោយតែងខ្លួន និងនិយាយត្រាប់តាមបងប្អូនខ្មែរអ៊ិស្លាម ៕
ចែករំលែកព័តមាននេះ