រាជធានីភ្នំពេញ ៖ អ្នកនាងអឿន ស្រីមុំ អះអាងថានៅថ្ងៃទី១០ មករា ២០១៤ នាងនឹងដឹកដៃតារាចម្រៀងសំឡេងពីរោះផ្នែកមនោសញ្ចេតនាគឺលោកសួស សងវាចា ចេញទៅច្រៀងនៅប្រទេសបារាំងរយៈពេល១ខែកន្លះ ។ អ្វីដែលនាងសប្បាយចិត្តមួយផ្នែកទៀតគឺដោយសារតែនាងនឹងបានជួបជុំស្វាមីអ្នករត់តាក់ស៊ីនៅទីនោះ បន្ទាប់ពីឃ្លាតគ្នារយៈពេលយូរដោយសារនាងត្រឡប់មករស់នៅស្រុកខ្មែរវិញ ។
ក្នុងជំនួបជាមួយអ្នកយកព័ត៌មានពេលកំពុងតែបង្ហាញមុខក្នុងពិធីសម្ពោធខ្សែភាពយន្តរឿង«ពូជខ្ញុំអីុចឹង » តារាចម្រៀងនិយមច្រៀងបទរដឺន អឿន ស្រីមុំ បង្ហើបប្រាប់ថា បន្ទាប់ពីសម្ពោធរឿងដែលនាងចូលរួមសម្តែងនេះរួចបានប៉ុន្មានថ្ងៃប៉ុណ្ណោះ នាងនឹងលោកសួស សងវាចានឹងរៀបចំវ៉ាលីសចេញទៅច្រៀងជូនបងប្អូនខ្មែរយើងនៅប្រទេសបារាំងសាជាថ្មីម្តងទៀតតាមសំណូមពររបស់អ្នករស់នៅទីនោះ ។
បន្ទាប់ពីដឹងថាជាប់កិច្ចសន្យាច្រៀងនៅបារាំងដល់ទៅខែកន្លះនោះនាងអឿន ស្រីមុំ អត់ហ៊ានទទួលចុះកិច្ចសន្យាថតរឿងថ្មីឱ្យផលិតកម្មណាឡើយ ។ មានគេចង់ឱ្យនាងសម្តែងភាពយន្តច្រើនដែរ តែអត់ទាន់ហា៊នសម្រេចថាយ៉ាងណា រង់ចាំមកដល់កម្ពុជាវិញ ទើបគិតពីការសម្តែងសាជាថ្មី ។
តារាចម្រៀងដែលត្រូវប៉ាន់ខាងឆក់ឱកាសទៅសម្តែងកើបប្រាក់នៅបរទេសជា រឿយៗរូបនេះថ្លែងថានាងបានឱកាសចេញទៅសម្តែងនៅប្រទេសបារាំងលើកនេះហាក់មានអារម្មណ៍រីករាយជាពន់ពេកដោយសារបានសម្តែងបង្កើតភាពទាក់ទាញសម្រាប់រូបនាងនៅបរទេសជាថ្មីទៀត ។ ម្យ៉ាងទៀតនោះនាងនឹងបានជួបជុំស្វាមីជាអាណិកជននៅទីនោះបន្ទាប់ពីបែកគ្នាមួយរយៈធំ ដោយនាងនៅចេញមុខយ៉ាងពេញទំហឹងក្នុងស្រុក ។ នាងនឹងឆ្លៀតពេលសម្រាកពីការសម្តែងនៅក្បែរស្វាមី ដើរលេងកម្សាន្តឱ្យបានច្រើនកន្លែង ។ មួយផ្នែកទៀតចង់ទុកពេលនៅផ្ទះចម្អិនម្ហូបអាហារជូនប្តីឱ្យបានប្លែកមាត់ខ្លះក្នុងន័យរឹតចំណងស្នេហាឱ្យកាន់តែល្អប្រសើរ ក្រោយពេលនៅឃ្លាតគ្នាសែនឆ្ងាយ ។
តារាចម្រៀងរូបនេះនិយាយថា «នាងខ្ញុំដ្បិតតែនៅឆ្ងាយពីស្វាមីមែន តែយើងអត់ដែលមានបញ្ហាអ្វីខ្វែងគំនិតគ្នាឡើយ ពោលគឺយល់ចិត្តគ្នាបានល្អដូចដើម ។ ធ្វើម៉េចនេះជាការរស់នៅបែកគ្នា ដើម្បីស្វែងរកអនាគត ព្រោះយើងសុទ្ធតែរវល់ការងារដូចគ្នា ទាន់មានកម្លាំងត្រូវប្រឹងរកលុយទុកថ្ងៃក្រោយ ។ នាងខ្ញុំសប្បាយចិត្តដែលប្តីប្រពន្ធយើងចេះយោគយល់គ្នា ព្រោះជីវិតជាប្តីប្រពន្ធសំខាន់ជឿទុកចិត្តគ្នាឱ្យបានច្រើន នោះច្បាស់ជាមិនមានបញ្ហាអ្វីកើតឡើងនាំឱ្យទាស់ចិត្តនោះទេ » ។
អ្នកនាងអឿន ស្រីមុំ នឹងវិលមកស្រុកវិញក្នុងអំឡុងពេលមុនបុណ្យចូលឆ្នាំថ្មី ប្រពៃណីជាតិ ដើម្បីមកច្បាមយកការងារសិល្បៈជាបន្តទៀត ដែលនៅចាំទទួលនាង ។ ស្រីមុំនិយាយថានាងនឹងវិលមកវិញទាន់បុណ្យចូលឆ្នាំថ្មី ជាពិសេសទាន់ការថតកម្មវិធីសិល្បៈសម្រាប់បុណ្យចូលឆ្នាំថ្មីតាមស្ថានីយទូរទស្សន៍ ។ នាងរំពឹងថាឆ្នាំនេះនាងនឹងបានបង្ហាញមុខអំឡុងពេលចូលឆ្នាំខ្មែរក្រោយពីអាក់ខានមួយរយៈ ។ ពេលចូលឆ្នាំ ម្តងៗមានកម្មវិធីផ្សាយតាមទូរទស្សន៍សប្បាយណាស់ ដោយតារា នីមួយៗបានជួបជុំគ្នាក្នុងបរិយាកាសរីករាយទទួលពរជ័យទាំងអស់គ្នា ទើបធ្វើឱ្យនាងមានបំណងមកជួបជុំក្នុងឱកាសចូលឆ្នាំថ្មីនៅស្រុកយើងឱ្យទាន់ពេល មិនឱ្យខកខានដូចមុនឡើយ ។
ដំណើរចេញទៅសម្តែងនៅប្រទេសបារាំងលើកនេះ អឿន ស្រីមុំ រំពឹងថា នាងនិងលោកសួស សងវាចា នឹងទទួលបានការគាំទ្រច្រើនពីបងប្អូនខ្មែរនៅទីនោះ ៕
ចែករំលែកព័តមាននេះ