រាជធានីភ្នំពេញ ៖ អ្នកសិល្បៈពហុជំនាញលោកដួង សុខគា បានរិះគន់សារព័ត៌មានជុំវិញការចុះផ្សាយមួយចំនួនពីអ្នកសិល្បៈ ដោយលោកចាត់ទុកការចុះផ្សាយរឿងរ៉ាវទាំងនោះជាបុព្វហេតុនាំឲ្យអ្នកសិល្បៈអស់ផ្លូវដើរ ។
អ្នកសិល្បៈដែលមានសំនួនវោហារហូរដូចទឹកលោកដួង សុខគា បានសរសេររិះគន់ដល់អ្នកសារព័ត៌មាននៅលើបណ្តាញសង្គមហ្វេសប៊ុករបស់ខ្លួន ដោយអមជាមួយនឹងផ្ទាំងរូបថតរបស់សារព័ត៌មាននៅក្នុងស្រុកមួយដែលចុះផ្សាយពីតារាស្រីម្នាក់ប្រើពាក្យសម្ដីអសុរោះដល់អ្នកសារព័ត៌មានសុទ្ធតែ«អាខ្មោចសារព័ត៌មាន»។
លោកដួង សុខគា បានចាត់ទុកការចុះផ្សាយនោះមិនធ្វើឲ្យចំណេញដល់អ្នកសិល្បៈរូបនោះឡើយ ហើយវាអាចធ្វើឲ្យអ្នកសិល្បៈរូបនោះអស់ផ្លូវដើរនៅក្នុងអាជីពរបស់ខ្លួន ។
ដួង សុខគា បានសរសេរកាលពីពេល ថ្មីៗនេះថា«កាសែតខ្លះពិតជាចុះបំផ្លាញផ្លូវដើររបស់តារាខ្មែរដើម្បីទាក់ទាញការចាប់អារម្មណ៍ពីអ្នកអានរបស់ខ្លួន ។ សូមបងប្អូនអ្នកអានពិចារណាផង ។ ជីវិតឯកជនអ្នកណាក៏មានដែរ មានរឿងខ្លះចុះផ្សាយវាមិនចំណេញសោះក៏ចុះដែរឱ្យតែគេគាំទ្រ ។ មានកាសែតខ្លះមិនបានសម្ភាសន៍ផងចុះផ្សាយទៅហើយ ។ ជួនកាលសម្ភាសន៍អីចេះចុះផ្សាយផ្សេងតែខ្ជិលរវល់ ។ សូមជួយគិតផង»។
ការរិះគន់នេះចាត់ទុកជារឿងមួយថ្មីទៀតក្នុងចង្កោមអ្នកសិល្បៈខ្មែរដែលបន្តរិះគន់ដល់សារព័ត៌មានដែលកន្លងមកការរិះគន់របស់តារាមួយចំនួនហាក់ប្រើពាក្យមិនសមក្នុងពេលអ្នកសារព័ត៌មានគ្រាន់តែសរសេរ និងចុះផ្សាយទៅតាមវិជ្ជាជីវៈរបស់ខ្លួនប៉ុណ្ណោះ ។
ជាក់ស្ដែងកន្លងមកតារាសម្តែងស្រីមួយរូបបានប្រើពាក្យអសុរោះយ៉ាងខ្លាំងលើអ្នកសារព័ត៌មានដោយបានហៅអ្នកសារព័ត៌មានសុទ្ធតែ«អាឆ្កែ»។ ចំណែកតារាចម្រៀងដែលបាត់មុខពីសិល្បៈអស់ជាច្រើនឆ្នាំលោកទិត្យ វិច្ឆិកា ក៏បានប្រើពាក្យប្រមាថអ្នកសារព័ត៌មានថា«អណ្តើកនៅក្នុងស្នូក» ព្រមទាំងពាក្យគ្រោតគ្រាតមួយចំនួនទៀត ។
ពាក្យរិះគន់ និងពាក្យមិនសមរម្យរបស់អ្នកសិល្បៈមួយចំនួននោះត្រូវបានគេមើលឃើញថា វាក៏អាចជះឥទ្ធិពលមិនល្អដល់អាជីពសិល្បៈរបស់ពួកគេផងដែរដោយសារពាក្យប្រមាថទាំងនោះត្រូវបានសារព័ត៌មានលើកយកមកចុះផ្សាយដើម្បីឲ្យមហាជនបានដឹង និងវាយតម្លៃ ។ ចំណុចនេះចង់មិនចង់ការប្រើពាក្យសម្ដីដោយមិនគិតពិចារណានោះក៏ជាហេតុនាំឲ្យប្រជាប្រិយភាពរបស់ពួកគេធ្លាក់ចុះ ។
អ្នកសារព័ត៌មានមួយចំនួនបានលើកឡើងថា អ្នកសិល្បៈកុំភ្លេចថា មួយផ្នែកនៃភាពល្បីល្បាញរបស់ខ្លួនក៏ជាគុណបំណាច់របស់សារព័ត៌មានដែរ ហេតុនេះប្រសិនបើមានការសាកសួរពីរឿងរ៉ាវអ្វីមួយពីអ្នកសារព័ត៌មាន អ្នកសិល្បៈគួរសហការជាមួយដើម្បីឲ្យការចុះផ្សាយនោះច្បាស់លាស់ ចៀសវាងការភាន់ច្រឡំ និងការយល់ខុសពីមហាជន ។
កន្លងមកមានអ្នកសិល្បៈមួយចំនួនតម្កើងឫកមិនជួប និងមិនផ្ដល់បទសម្ភាសន៍ឱ្យអ្នកសារព័ត៌មានទេ លុះការផ្សាយមានការខ្វះចន្លោះ ឬមិនត្រូវចិត្តខ្លួន ទើបបន្ទោសលើអ្នកសារព័ត៌មាន ។ អ្នកសារព័ត៌មានចង់បានព័ត៌មានត្រឹមត្រូវសម្រាប់ផ្ដល់ជូនប្រិយមិត្តអ្នកអាន មិនចង់ផ្សាយអ្វីដែលមិនគ្រប់ជ្រុងជ្រោយនោះទេ ដូច្នេះទាល់តែមានការសហការពីប្រភព រាប់ទាំងអ្នកសិល្បៈផង ៕
ចែករំលែកព័តមាននេះ