រាជធានីភ្នំពេញ ៖ ប្រជាពលរដ្ឋខ្មែររស់នៅសហគមន៍អឺរ៉ុបទទួលស្វាគមន៍សម្តេចតេជោ ហ៊ុន សែន យ៉ាងកក់ក្តៅជាទីបំផុត បន្ទាប់ពីសម្តេចទៅដល់ទីក្រុងហ្សឺណែវ ប្រទេសស្វីស កាលពីនៅរសៀលថ្ងៃទី០២ កក្កដា ។ នេះបើយោងតាមបណ្តាញសង្គមហ្វេស ប៊ុក របស់សម្តេចតេជោ ។
ប្រភពបានបន្តថា បន្ទាប់ពីបានអញ្ជើញដល់អាកាសយានដ្ឋាន អន្តរជាតិហ្សឺណែវ ប្រទេសស្វីស សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាត្រូវបានទទួលស្វាគមន៍ពីសំណាក់បងប្អូនសហគមន៍ខ្មែរដែលរស់នៅក្នុងសហគមន៍អឺរ៉ុបជាច្រើនបានមកទទួលស្វាគមន៍សម្តេចតេជោយ៉ាងរាក់ទាក់ និងកក់ក្តៅជាទីបំផុត ក្នុងខណៈពេលអញ្ជើញដល់សណ្ឋាគារស្នាក់នៅនាទីក្រុងហ្សឺណែវ ប្រទេសស្វីស ដែលបងប្អូនខ្មែរខ្លះមកពីប្រទេសអាល្លឺម៉ង់ ប្រទេសបារាំង ប្រទេសប៊ែលហ្សិក និងប្រទេសស្វីសនេះ ។
សម្តេចតេជោ ហ៊ុន សែន គណៈប្រតិភូជាន់ខ្ពស់កម្ពុជាទៅដល់ទីក្រុងហ្សឺណែវ ប្រទេសស្វីស ប្រកបដោយសុវត្ថិភាពហើយ ដើម្បីចូលរួមកិច្ចប្រជុំ «ត្រួតពិនិត្យឡើងវិញជាសកលលើជំនួយសម្រាប់ពាណិជ្ជកម្ម ឆ្នាំ២០១៩» ដែលនឹងប្រព្រឹត្តទៅពីថ្ងៃទី៣ ដល់ថ្ងៃទី៥ ខែកក្កដា ឆ្នាំ២០១៩ នៅអង្គការពាណិជ្ជកម្មពិភពលោក (WTO) ។ វត្តមាននៃការអញ្ជើញដល់របស់សម្ដេចតេជោនាយករដ្ឋមន្ត្រីនៅអាកាសយានដ្ឋានអន្តរជាតិទីក្រុងហ្សឺណែវ ប្រទេសស្វីស គឺមានការទទួលគារវកិច្ចស្វាគមន៍យ៉ាងកក់ក្តៅបំផុតពីសំណាក់ថ្នាក់ដឹកនាំមន្ត្រីជាន់ខ្ពស់នៃរដ្ឋាភិបាលប្រទេសស្វីស និងមន្ត្រីជាន់ខ្ពស់នៃរាជរដ្ឋាភិបាលកម្ពុជាប្រចាំនៅទីក្រុងហ្សឺណែវ ប្រទេសស្វីសជាច្រើនរូបផងដែរ ។
ក្រៅពីកិច្ចប្រជុំខាងលើសម្តេចតេជោ ហ៊ុន សែន នឹងអញ្ជើញថ្លែងសុន្ទរកថា នៅក្នុងកិច្ចប្រជុំជាទៀងទាត់លើកទី៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិដែលនឹងផ្តល់សារៈសំខាន់ និងច្បាស់លាស់មួយដែលឆ្លុះបញ្ចាំងពីការប្តេជ្ញាចិត្តដ៏មោះមុតរបស់រាជរដ្ឋាភិបាលកម្ពុជា ក្នុងការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ។ ជាមួយគ្នានោះដែរសម្ដេចតេជោនាយករដ្ឋមន្ត្រី និងអញ្ជើញជួបពិភាក្សាការងារជាមួយឥស្សរជនសំខាន់ៗជាច្រើនរូបវិនិយោគិន ព្រមទាំងជួបជាមួយសហគមន៍ខ្មែរនៅស្វីស និងអ៊ឺរ៉ុបជាច្រើនក្រុមទៀតផង ៕ កែសម្រួលដោយ ៖ សុឃាក់
ចែករំលែកព័តមាននេះ