រាជធានីភ្នំពេញ ៖ ស្ត្រីម្នាក់ពិតជាអភ័ព្វស្នេហ៍ខ្លាំងណាស់ ជួបតែស្នេហ៍បោកប្រាស់ជាបន្តបន្ទាប់ ដែលប្ដី
ទី១ក្រោយពីចាប់ដៃគ្នាបានកូន២នាក់ លោកប្ដីក៏បែកចិត្តទៅមានស្រីថ្មីចាកចោលគាត់បាត់ទៅ ធ្វើឲ្យគាត់ក្លាយជាស្ត្រីមេម៉ាយកូន២ ។ លុះក្រោយមក គាត់មានប្ដីម្នាក់ទៀតបានកូន២នាក់ដែរ ប៉ុន្តែកូនស្រីម្នាក់ទើបមានអាយុ១០ខែ និងម្នាក់ទៀតនៅក្នុងផ្ទៃ៦ខែនៅឡើយ ស្រាប់តែលោកប្ដីទី២មានស្រី និងពង្រត់ស្រីនោះចាកចោលគាត់បាត់ទៀត ។ ក្រោយពីជួបស្នេហ៍ជូរចត់ម្ដងហើយម្ដងទៀតបែបនេះ ធ្វើឲ្យគាត់អស់សង្ឃឹមខ្លាំងណាស់ ហើយនៅព្រឹកថ្ងៃទី២០ ខែមិថុនា ស្ត្រីរូបនេះបានបីកូនស្រីតូច ព្រមទាំងកាន់រូបថតប្ដីទី២ចូលទៅកាន់សាលាសង្កាត់ចោមចៅ៣ ខណ្ឌពោធិ៍សែនជ័យ ដើម្បីរកអ្នកដែលមានលទ្ធភាពទទួលយកកូនស្រីរបស់គាត់ទៅចិញ្ចឹម ។
គាប់ជួនពេលនោះ មានស្ត្រីម្នាក់ឈ្មោះ ម៉េង យុទ្ធ អាយុ៣៦ឆ្នាំ និងប្តីឈ្មោះ កែម រ៉ុង អាយុ៤៣ឆ្នាំ មុខរបរលក់ទឹកកក ស្នាក់នៅជាប់របងសាលាសង្កាត់ចោមចៅ៣ ដែលពួកគាត់រៀបការច្រើនឆ្នាំហើយគ្មានកូន ក៏សម្រេចចិត្តទទួលយកកូនស្រីនោះទៅចិញ្ចឹមបីបាច់ថែរក្សាទុកជាកូនបង្កើតរបស់ពួកគាត់តែម្ដង ដោយមានការដឹងឮពីសំណាក់អាជ្ញាធរសង្កាត់ និងនគរបាលប៉ុស្តិ៍នៅទីនោះផងដែរ។
ស្ត្រីរូបនេះ បានប្រាប់ថា គាត់ឈ្មោះ រាម ភារម្យ អាយុ៤២ឆ្នាំ អតីតកម្មកររោងចក្រកាត់ដេរ ស្នាក់នៅផ្ទះជួលក្នុងភូមិសាមគ្គី៣ សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើតនៅភូមិកញ្ចំ ឃុំកញ្ចំ ស្រុកពារាំង ខេត្ត ព្រៃវែង ។ គាត់មិនបានដឹងថា គាត់បានសាងកម្មពៀរអ្វីទេកាលពីជាតិមុន ទើបជាតិនេះ កម្មតាមផ្ដន្ទាធ្វើឲ្យរូបគាត់ជួបតែប្ដីបោកប្រាស់ផិតក្បត់ប៉ុណ្ណោះ ទោះជាគាត់ខំសន្សំចិត្តស្មោះបម្រើបែបណា ក៏ប្ដីនៅតែក្បត់គ្មានមេត្តាឡើយ រហូតពេលនេះគាត់បានក្លាយខ្លួនជាស្ត្រីមេម៉ាយកូន៤តែម្ដង ។
ស្ត្រីអភ័ព្វស្នេហ៍រូបនេះរៀបរាប់ទៀតថា គាត់បានប្ដីទី១ជាអ្នកស្រុកភូមិក្បែរគ្នា ដោយមានមេបារៀបការឲ្យតាមប្រពៃណី ប៉ុន្តែគាត់មិនបានចាំឆ្នាំទេ ហើយក៏បានលាក់មិនប្រាប់ឈ្មោះប្ដីមុនដែរ ។ លុះក្រោយពីរៀបការចាប់ដៃគ្នាជាប្ដីប្រពន្ធបានកូនស្រី២នាក់ លោកប្ដីបានចាប់បែកឆ្វេង លួចមានសហាយស្មន់ជាមួយស្រីថ្មីម្នាក់ទៀត ហើយមិនយូរប៉ុន្មាន ប្ដីក៏បានចុះចោលគាត់ទៅរួមរស់ជាមួយស្រីថ្មីនោះចោលរូបគាត់និងកូន២នាក់ឲ្យរស់នៅគ្មានទីពឹង ហើយគ្រានោះគាត់បាន ខំប្រឹងរកសុីចិញ្ចឹមកូនទាំង២នាក់ដោយលំបាកបំផុត ។ ក្រោយមក គាត់បានសម្រេចចិត្តធ្វើដំណើរចាកចេញពីស្រុកកំណើតមករស់នៅភ្នំពេញ ស្នាក់នៅផ្ទះជួលនិងធ្វើជាកម្មការិនីរោងចក្រកាត់ដេរមួយ នៅក្នុងសង្កាត់ចោមចៅ ខណ្ឌពោធិ៍សែនជ័យ។
ស្ត្រីជួបតែស្នេហាមិនសមប្រកបរូបនេះនិយាយទៀតថា ក្រោយពេលក្លាយខ្លួនជាកម្មការិនីមួយរយៈពេល ហើយលេងហ្វេសប៊ុកចុះឡើងៗ មិនយូរប៉ុន្មានក៏បានស្គាល់បុរសម្នាក់ឈ្មោះ ទឹម ប្រុស អាយុ៥៥ឆ្នាំ ជាកម្មករសំណង់ ប៉ុន្តែមានរូបរាងស្អាតសង្ហា ។ បុរសនេះមានស្រុកកំណើត នៅភូមិរមេញ ឃុំរមេញ ស្រុកកោះអណ្តែត ខេត្តតាកែវ ថែមទាំងស្នាក់នៅផ្ទះជួលក្បែរខាងគ្នាទៀតផង ។
បុរសនេះ បានទាក់ទងសុំស្នេហ៍ដោយផ្ទាល់ផង និងតាមឆាតហ្វេសប៊ុកផង រហូតធ្វើឲ្យនាង បាក់ចិត្តស្រឡាញ់វិញបាត់មុខបុរសនេះមិនបាន ទើបសម្រេចចិត្តយកគ្នាជាប្ដីប្រពន្ធដោយមិនបានរៀបការឡើយ ។ ពេលនោះភាពល្អូកល្អឺនផ្អែមល្ហែម បានធ្វើឲ្យគាត់គិតថានឹងមានសុភមង្គលរហូតហើយ ។ ចំណងស្នេហ៍ក្រោយនេះ គាត់បង្កើតបានកូនស្រីម្នាក់ជូនប្ដី ហើយរហូតដល់ថ្ងៃឆ្លងទន្លេគាត់សង្កេតឃើញកាយវិការប្ដីនៅជាធម្មតា គ្មានតម្រុយណាមួយដែលចង់បែកពីគាត់ឡើយ។
ប្រភពដដែលបន្តថា ដោយសារតែបែបនេះក្រោយពីសម្រាលកូនទី១ទើបបាន៤ខែប៉ុណ្ណោះ គាត់ក៏ចាប់ ផ្ដើមមានផ្ទៃពោះកូនទី២ទៀត ។ ប៉ុន្តែពេលមានផ្ទៃពោះបាន៣ខែ ស្រាប់តែលោកប្ដីបែកចិត្តទៅមានស្រីថ្មី និងបានពង្រត់ស្រីនោះចាកចោលនាងទៅបាត់ ដែលរហូតមកទល់នឹងពេលនេះមានរយៈ៣ខែហើយ ខណៈដែលបច្ចុប្បន្ននាងកំពុងមានផ្ទៃពោះ៦ខែ ៕
ចែករំលែកព័តមាននេះ