ខេត្តព្រៃវែង ៖ ផ្ទះមួយខ្នងធ្វើពីឈើ ជញ្ជាំងនិងដំបូលសង្ក័សីទំហំ៨ម៉ែត្រ×៧ម៉ែត្រ ត្រូវភ្លើងឆេះអស់ទាំងស្រុង ដោយសារតែផ្ទុះកំប៉ុងហ្គាសក្នុងពេលដែលម្ចាស់កំពុងដាក់ដាំទឹកទុកចោល ។ ហេតុការណ៍នេះ បានកើតឡើង កាលពីវេលាម៉ោង៣…
ខេត្តព្រៃវែង ៖ ផ្ទះមួយខ្នងធ្វើពីឈើ ជញ្ជាំងនិងដំបូលសង្ក័សីទំហំ៨ម៉ែត្រ×៧ម៉ែត្រ ត្រូវភ្លើងឆេះអស់ទាំងស្រុង ដោយសារតែផ្ទុះកំប៉ុងហ្គាសក្នុងពេលដែលម្ចាស់កំពុងដាក់ដាំទឹកទុកចោល ។ ហេតុការណ៍នេះ បានកើតឡើង កាលពីវេលាម៉ោង៣ និង២០នាទីរសៀលថ្ងៃទី១៤ មិថុនា នៅចំណុចភូមិតាហឿវ ឃុំបឹងដោល ស្រុកព្រះស្តេច ខេត្តព្រៃវែង ភ្ញាក់ផ្អើលដល់អ្នកស្រុករត់ជាន់ជើងគ្នា រកទឹកយកមកជួយពន្លត់ តែអ្វីៗហួសពេលអស់ ។
ប្រភពពីសមត្ថកិច្ចបានឱ្យដឹងទៀតថា ផ្ទះដែលត្រូវភ្លើងឆេះនេះ មានម្ចាស់ឈ្មោះ ជិត ជុន្នី ភេទប្រុស អាយុ៥៣ឆ្នាំ និងប្រពន្ធឈ្មោះ ឆែម នឿន អាយុ៥១ឆ្នាំ រស់ក្នុងភូមិ-ឃុំខាងលើ ចំណែកកូនចៅទៅធ្វើការនៅភ្នំពេញអស់ហើយ ។ នៅថ្ងៃកើតហេតុនោះ ស្ត្រីជាប្រពន្ធបានទៅលេងកូននៅឯភ្នំពេញ សល់តែបុរសជាប្តីនៅផ្ទះម្នាក់ឯង ហើយពេលប្រពន្ធទៅបាត់ បុរសជាប្តីបានទៅផឹកស្រាជាមួយអ្នកស្រុកជិតខាង ។
រហូតដល់ថ្ងៃត្រង់ស្រវឹងស្ពឹកមុខ ក៏ត្រឡប់មកផ្ទះវិញ ដាក់កំសៀវដាំទឹកចោលនៅផ្ទះ ហើយក៏ដើរទៅផ្ទះអ្នកជិតខាងបបួលគ្នាផឹកទៀត ប៉ុន្តែខណៈពេលកំពុងនាផឹកនោះ ស្រាប់តែលាន់ឮសំឡេងផ្ទុះឡើងយ៉ាងខ្លាំង ធ្វើឱ្យមានការភ្ញាក់ផ្អើលនាំគ្នារត់មកមើល ឃើញផ្ទះត្រូវភ្លើងឆេះទៅហើយ ទើបនាំគ្នារត់រកទឹកយកមកពន្លត់ និងទូរសព្ទ័ប្រាប់សមត្ថកិច្ចយកឡានទឹកទៅជួយបាញ់ពន្លត់ ប៉ុន្តែដោយអណ្តាតភ្លើងឆេះខ្លាំងពេកមិនអាចជួយសង្គ្រោះបាន គឺបានត្រឹមទប់ស្កាត់កុំអោយឆ្លងរាលដាលទៅផ្ទះអ្នកជិតខាងប៉ុណ្ណោះ។
បើតាមការបញ្ជាក់ពីម្ចាស់ផ្ទះ ភ្លើងឆេះនេះបណ្តាលអោយមានការខូចខាត សរុបជាទឹកប្រាក់ប្រមាណជា៣០លានរៀល ប៉ុន្តែមិនបានបណ្តាលអោយមាននរណាម្នាក់រងរបួសនោះទេ ដោយសារតែការធ្វេសប្រហែសរបស់ម្ចាស់ផ្ទះ ។ (សម្រួលដោយ៖ ស្រីណា)
ចែករំលែកព័តមាននេះ