រាជធានីភ្នំពេញ ៖ សាលាដំបូងរាជធានីភ្នំពេញកាលពីរសៀលថ្ងៃទី១២ ខែមិថុនា ឆ្នាំ២០១៩ បានបន្តលើកយកសំណុំរឿង«ម្តាយខ្ញុំលក់ខ្ញុំ» មកបើកសវនាការជំនុំជម្រះក្តីដែលអង្គសវនាការនោះមានលោកកូយ សៅ ចៅក្រមជំនុំជម្រះ និងលោកវង្ស ប៊ុនវិសុទ្ធ ព្រះរាជអាជ្ញារងជាតំណាងអយ្យការ ។
ជនត្រូវចោទក្នុងសំណុំរឿងក្តីនេះមានឈ្មោះ រ៉ាត់ រ័ត្នមុនី ភេទប្រុស អាយុ៤៧ឆ្នាំ ត្រូវបានសមត្តកិច្ចចាប់ និងឃុំខ្លួន កាលពីថ្ងៃទី១៣ ខែធ្នូ ២០១៨ ពាក់ពន្ធការផលិតវីដេអូរឿង «ម្តាយខ្ញុំលក់ខ្ញុំ» ។ ជនត្រូវចោទត្រូវបានតំណាងអយ្យការចោទប្រកាន់ពីបទ ញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌប្រព្រឹត្ត កាលពីថ្ងៃទី១៥ ខែតុលា ឆ្នាំ២០១៨ ដែលដើមបណ្ដឹងក្នុងសំណុំរឿងក្ដីនេះមាន៤នាក់ ។
ក្រោយបញ្ចប់សវនាការនាល្ងាចថ្ងៃដដែលនោះចៅក្រមជំនុំជម្រះបានសម្រេចលើកពេល ប្រកាសសាលក្រមផ្តន្ទាទោសលើជនជាប់ចោទទៅថ្ងៃទី២៦ ខែមិថុនា ខាងមុខនេះ ៕ កែសម្រួលដោយ ៖ សុឃាក់
ចែករំលែកព័តមាននេះ