រាជធានីភ្នំពេញ ៖ ភោជនីយដ្ឋានអាហារចម្រុះ Food Republic ដែលជាភោជនីយដ្ឋានអាហារចម្រុះដ៏ធំ និងជាបុត្រសម្ព័ន្ធរបស់ក្រុមហ៊ុន BreadTalk Group មានមូលដ្ឋាននៅប្រទេសសិង្ហបូរី បានបើកដំណើរការហាងដំបូងរបស់ខ្លួនជាផ្លូវការនៅក្នុងប្រទេសកម្ពុជា កាលពីថ្ងៃទី៣០ ឧសភា ២០១៩ នៅផ្សារទំនើបអុីអនសែនសុខ ភ្នំពេញ ។
តាមសេចក្តីប្រកាសព័ត៌មានរបស់ក្រុមហ៊ុននេះបានឲ្យដឹងថា ភោជនីយដ្ឋាន Food Republic បានបើកដំណើរការដំបូងនៅឆ្នាំ២០០៥ ក្នុងប្រទេសសិង្ហបុរី ដោយបានប្ដេជ្ញាផ្ដល់ជូននូវអាហារបែបសិង្ហបុរី ដែលមានតម្លៃសមរម្យ និងរសជាតិឈ្ងុយឆ្ងាញ់ដ៏ពិតប្រាកដដល់អតិថិជនរបស់ខ្លួន ។ តាមរយៈគំនិតច្នៃប្រឌិតនៃការរៀបចំជាលក្ខណៈបើកចំហ ភោជនីយដ្ឋាននេះបានប្រមូលផ្ដុំទៅដោយតូបលក់ម្ហូបអាហារជាច្រើនប្រភេទ ផ្សេងៗគ្នា ។
លោកជិន ស៊ិនអុង នាយកប្រតិបត្តិនៃក្រុមហ៊ុន Food Republic បានមានប្រសាសន៍ថា ភោជនីយដ្ឋាន Food Republic បានរីកសាយជាបន្តបន្ទាប់ រហូតមកដល់បច្ចុប្បន្ន ភោជនីយដ្ឋាន Food Republic មានទីតាំង៥៥កន្លែង ដែលគ្រប់គ្រងដោយ Food Republic និង Food Opera ផ្ទាល់ ដូចជាក្នុងប្រទេសសិង្ហបុរី ម៉ាឡេស៊ី ថៃ តៃវ៉ាន់ ហុងកុង និងនៅទីក្រុងចំនួន១០ នៅប្រទេសចិន ។
សម្រាប់ហាងទាំងអស់របស់ Food Republic មានរចនាបថនិងការតុបតែងខុសប្លែកពីគ្នា ដោយហាង នីមួយៗផ្ដោតសំខាន់ទៅលើការផ្ដល់ជូនម្ហូបអាហារ ដែលមានគុណភាព អនាម័យ តម្លៃសមរម្យ និងផាសុកភាពជាមួយបរិយាកាសស្រស់ស្រាយ នៃម៉ាស៊ីនត្រជាក់ ។
លោកបន្តថា Food Republic មានកេរ្តិ៍ឈ្មោះល្បីល្បាញតាមរយៈរសជាតិ ឆ្លុះបញ្ចាំងពីចំណង់ចំណូលចិត្តពិតប្រាកដរបស់អតិថិជន និងការផ្ដល់ជូននូវបទពិសោធន៍ទាក់ទាញ ជាមួយនឹងគំនិតច្នៃប្រឌិតនៃការរៀបចំផ្ទះបាយជាលក្ខណៈបើកចំហរបស់ហាង នីមួយៗ ។ សម្រាប់ហាងដំបូងរបស់ខ្លួននៅកម្ពុជានេះវិញ អតិថិជនទាំងអស់នឹងទទួលបានអារម្មណ៍ប្លែកជាមួយរចនាបថតុបតែងដូចក្នុងប្រទេសអឺរ៉ុប ដោយនៅតាមផ្លូវមានទិដ្ឋភាពដូចនៅប៉ារីស អមជាមួយហាងកាហ្វេបារាំង និងភោជនីយដ្ឋានជាច្រើន ហើយអតិថិជនក៏អាចរីករាយជាមួយការតុបតែងលំអរបែប Fashion ចុងក្រោយបំផុត ។
តំណាងផ្សារទំនើបអុីអនកម្ពុជា ក៏បានមានប្រសាសន៍ថា ការចូលមកកាន់ប្រទេសកម្ពុជា ជាពិសេសទីតាំងនៅផ្សារទំនើបអុីអនគឺជាការផ្ដល់ជម្រើសបន្ថែមដល់ប្រជាពលរដ្ឋកម្ពុជា ដែលត្រូវការម្ហូបអាហារដែលមានរសជាតិប្លែកពីបរទេស ។ ហើយក៏ធ្វើឲ្យផ្សារទំនើបអ៊ីអន កាន់តែមានភាពរស់និយម ថ្មីៗបន្តបន្តាប់ទៀត ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ