ខេត្តសៀមរាប ៖ កម្មវិធី «តោះជិះកង់ដើម្បីសហគមន៍» ឆ្នាំ២០១៩ ប្រមូលបានថវិកាជិត ៣ ម៉ឺនដុល្លារអាមេរិកហើយបរិច្ចាគទាំងស្រុងដល់មន្ទីរពេទ្យគុន្ធបុប្ផា ខេត្តសៀមរាប ។…
ខេត្តសៀមរាប ៖ កម្មវិធី «តោះជិះកង់ដើម្បីសហគមន៍» ឆ្នាំ២០១៩ ប្រមូលបានថវិកាជិត ៣ ម៉ឺនដុល្លារអាមេរិកហើយបរិច្ចាគទាំងស្រុងដល់មន្ទីរពេទ្យគុន្ធបុប្ផា ខេត្តសៀមរាប ។ ដោយមានការចូលរួមពីអ្នកជិះកង់ប្រមាណជាង ១០០០ នាក់ កម្មវិធីជិះកង់ដើម្បីសហគមន៍ បានប្រារព្ធឡើងនៅព្រឹកថ្ងៃទី២៦ ឧសភា ២០១៩ ក្រោមការរៀបចំដោយសមាគមអ្នកជិះកង់ខេត្តសៀមរាប ឧបត្ថម្ភធំដោយក្រុមហ៊ុនទឹកពិសា វីតាល់ ។
លោក អ៊ុំ វណ្ណៈ ប្រធានផ្នែកទំនាក់ទំនងទីផ្សារនៃក្រុមហ៊ុនវីតាល់ បានមានប្រសាសន៍ថា នេះជាឆ្នាំទី ៥ ហើយដែល វីតាល់ បានចូលរួមឧបត្ថម្ភដល់កម្មវិធីជិះកង់នេះ ។ ផ្អែកលើទស្សនវិស្ស័យរួមគ្នាគឺការជួយដល់សង្គម និងពង្រឹងសកម្មភាពមនុស្សធម៌ វីតាល់ រីករាយនឹងបន្ត និងគាំទ្រដល់សមាគមជិះកង់កម្ពុជាក្នុងការរៀបចំកម្មវិធីជិះកង់សប្បុរស ដើម្បីមន្ទីរពេទ្យគុន្ធបុប្ផា ដែលកំពុងត្រូវការជាចាំបាច់ក្នុងការជួយសង្គ្រោះជីវីតកុមាររាប់ពាន់អ្នកជារៀងរាល់ថ្ងៃ ។
ពីក្រោយភាពជោគជ័យរបស់កម្មវិធី វីតាល់ មើលឃើញថា ក្រុមការងារបានខិតខំប្រឹងប្រែងយ៉ាងខ្លាំងដើម្បីប្រារព្ធកម្មវិធីមួយដ៏ល្អ សម្រាប់សង្គមជាតិ និងវិស័យកីឡាផង ដែលបញ្ជាក់ច្បាស់ពីសាមគ្គីភាព ។ វីតាល់ ក៏រំពឹងថា នឹងបន្តសកម្មភាពនេះបន្តបន្ទាប់ទៀតរៀងរាល់ឆ្នាំ បើសិនជានៅតែមានការគាំទ្រខ្លាំងពីសំណាក់បងប្អូនប្រជាពលរដ្ឋ ។
លោក គឹម ប៊ុនថាន់ ស្ថាបនិកនៃសមាគមអ្នកជិះកង់ដើម្បីសហគមន៍ បានបន្ថែមថា «កម្មវិធីឆ្នាំនេះពិតជាកាន់តែពិសេសខ្លាំងមែនទែន ដោយមានការគាំទ្រ និងចូលរួមយ៉ាងច្រើនកុះករពីសំណាក់អ្នកជិះកង់ច្រើនជាងមុន ថែមទាំងទទួលបានការឧបត្ថម្ភជាច្រើនពីស្ថាប័នផ្សេងៗ ជាពិសេសក្នុងនោះមានការឧបត្ថម្ភធំជាងគេពីក្រុមហ៊ុនទឹកពិសាវីតាល់ ដែលអាចធ្វើឱ្យកំណើនមូលនិធិឆ្នាំនេះកើនឡើងគួរឱ្យកត់សម្គាល់ ។ អ្វីដែលកាន់តែរំភើបទៅទៀតនោះ គឺសំបុត្រចូលរួមត្រូវបានលក់អស់តាំងពីថ្ងៃចាប់បើកលក់ក្នុងអាទិត្យដំបូង ហើយចំនួនក៏បន្តកើនឡើងជាលំដាប់ដែលទាំងនេះបានបង្កើនទឹកចិត្តក្រុមការងារទាំងអស់ផងដែរ។
លោក ប៊ុន ថាន់ ក៏បានថ្លែងអំណរគុណដល់ វីតាល់ ចំពោះការចូលរួមចំណែកឧបត្ថម្ភ និងរៀបចំកម្មវិធីឲ្យមានភាព កាន់តែអធិកអធម ។ «តោះជិះកង់ដើម្បីសហគមន៍ឆ្នាំទី៦» បានបញ្ចប់ទៅដោយក្តីរីករាយ ស្នាមញញឹម មិត្តភាព និងអនុស្សាវរីយ៍ដែលមិនអាចបំភ្លេចបាន ។ គ្រប់គ្នារំពឹងយ៉ាងមុតមាំថា កម្មវិធីនេះនឹងបន្តស្ថិតស្ថេរជារៀងរាល់ឆ្នាំ ក្រុមហ៊ុនវីតាល់ នឹងគាំទ្រយ៉ាងពេញទំហឹងបន្ថែមទៀត ដើម្បីក្តីរំភើបប្រជាពលរដ្ឋ និងកុមារកម្ពុជាទូទាំងប្រទេស ៕ (កែសម្រួលដោយ ៖ បុប្ផា)
ចែករំលែកព័តមាននេះ