រាជធានីភ្នំពេញ ៖ គិតត្រឹមរយៈពេល៤ខែដើមឆ្នាំ២០១៩នេះ កម្ពុជាបាននាំចេញជ័រកៅស៊ូបានប្រមាណជាង៦ម៉ឺនតោន កើនឡើងប្រមាណ២៣% បើប្រៀបធៀបនឹងរយៈពេលដូចគ្នានឹងឆ្នាំមុន។ នេះបើយោងតាមរបាយការណ៍អគ្គនាយកដ្ឋានកៅស៊ូរបស់កម្ពុជា។
របាយការណ៍ដដែលឱ្យដឹងថាក្នុងឆ្នាំ២០១៩នេះ អគ្គនាយកដ្ឋានកៅស៊ូ បានអនុវត្តការងារចម្បងៗក្នុងស្មារតីទទួលខុសត្រូវទាំងការងរចន្ត ការងារអនុវត្តគម្រោងតាមកម្មវិធី ការដាំដុះថែទាំកូនកៅស៊ូថ្មី ការងារអាជីវកម្ម ផលិតកម្ម និងធុរកិច្ចសំខាន់ៗដែលសម្រេចបាន។ បច្ចុប្បន្នកម្ពុជាមានផ្ទៃដីដាំកៅស៊ូជាង៤៣ម៉ឺនហិកតា ក្នុងនោះផ្ទៃដីចៀរជ័រមានជាង២០ម៉ឺនហិកតា ស្មើនឹង៤៦% និងផ្ទៃដីថែទាំមានជាង២៣ម៉ឺនហិកតា ស្មើនឹង៥៤%។ ផលិតផលជ័រកៅស៊ូសម្រេចបានក្នុងខែមេសា ឆ្នាំ២០១៩ មានចំនួន១៤.៤២០តោន បានកើនឡើងជាង២,៧ពាន់តោន ស្មើន២៣% ធៀបនឹងខែមុន នឹងបានកើនឡើង២,២ពាន់តោន ស្មើនឹង១៩% ធៀបនឹងរយៈពេលដូចគ្នាក្នុងឆ្នាំ២០១៨។
របាយការណ៍បញ្ជាក់ថា «បរិមាណបញ្ចេញលក់សរុបគិតពីខែមករាមកដល់ខែមេសា២០១៩នេះ កម្ពុជាបានធ្វើការនាំចេញបានចំនួន៦៣.៤៥៣តោនបានកើនឡើងចំនួន១១.៩៣០តោន ស្មើនឹង២៣%ធៀបនឹងរយៈពេលដូចគ្នាឆ្នាំ២០១៨ ហើយតម្លៃលក់មធ្យមក្នុងខែមេសា២០១៩គឺថ្លៃ១.៣៦៦ដុល្លារក្នុងមួយតោនបាន កើនឡើង៥ដុល្លារក្នុងមួយតោន ស្មើនឹង០,៣៦% ធៀបនឹងខែមុននិងបានចុះចំនួន៤៩ដុល្លារអាមេរិកក្នុងមួយតោន ស្មើនឹង៣% បើប្រៀបធៀបនឹងរយៈពេលដូចគ្នាក្នុងឆ្នាំ២០១៨»។ បើទោះបីការនាំចេញជ័រកៅស៊ូនៅរយៈពេល៤ខែដើមឆ្នាំ២០១៩មានកើនឡើង តែបើក្រឡេកទៅមើលនិន្នការដាំដុះកៅស៊ូក្នុងស្រុក មានការដាំដុះកើនឡើងតិចតួចហើយតម្លៃជ័រកៅស៊ូនៅលើទីផ្សារធ្លាក់ចុះ។
លោក ប៉ុល សុផា អគ្គនាយកដ្ឋានកៅស៊ូកម្ពុជាមានប្រសាសន៍ឱ្យដឹងថា« មកដល់សព្វថ្ងៃនេះ និន្នាការនៃការដាំកៅស៊ូរបស់កម្ពុជាមានការកើនឡើងតិចតួច ព្រោះដោយសារ ៖១-)ជិតអស់ផ្ទៃដីដែលកបនឹងដំណាំកៅស៊ូ (b)តម្លៃជ័រកៅស៊ូធ្លាក់ចុះខ្លាំង,២-)ការដាំកៅស៊ូចំណាយទុនច្រើន រយៈពេលពី៦ទៅ៧ឆ្នាំ ខ្វះពលកម្ម ពិបាកក្នុងការថែទាំនិងចៀរជ័រជាងដើម» ។
សូមរម្លឹកថា កន្លងមកមានក្រុមហ៊ុនរបស់ចិនមួយឈ្មោះថា Beijing Fushide Investment Management Ltd and East Consulting Management Ltd បានអះអាងថាក្រុមហ៊ុនរបស់ខ្លួន មានបំណងចង់វិនិយោគលើវិស័យដាំឈើនៅកម្ពុជា ដើម្បីនាំចូលទីផ្សារប្រទេសចិន។ជាពិសេសគឺក្រុមហ៊ុនចិនខាងលើ បានថ្លែងប្រាប់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ កាលពីថ្ងៃទី ២៧ ខែមេសា ឆ្នាំ២០១៩ នៅក្រុងប៉េកាំង ប្រទេសចិនថា ក្រុមហ៊ុនចិន ក៏មានការចាប់អារម្មណ៍លើការដាំកៅស៊ូផងដែរ ដោយចង់ធ្វើការកែច្នៃជាសំបកកង់រថយន្តសម្រាប់នាំចេញ ។
ជាការឆ្លើយតបជាពេលនោះ លោក វេង សាខុន ស្វាគមន៍គម្រោងវិនិយោគលើវិស័យកសិកម្ម ព្រមទាំងបានបញ្ជាក់ថា នៅកម្ពុជាមានសក្តានុពលយ៉ាងខ្លាំងសម្រាប់ការវិនិយោគ ជាពិសេសការវិនិយោគលើការដាំឈើឡើងវិញ ការកែច្នៃផលិតផលកសិកម្ម ការដាំដុះមុខដំណាំផ្សេងៗ និងការចញ្ចឹមសត្វ ឬចញ្ចឹមត្រីជាដើម ដែលទាំងអស់នេះ គឺមានសក្តានុពលក្នុងការវិនិយោគដែលអាចធ្វើការនាំចេញទៅប្រទេសចិន ឬទីផ្សារក្នុងប្រទេសអាស៊ាន ក៏ដូចជាទីផ្សារអឺរ៉ុប និងអាមេរិក ផងដែរ។
ពាក់ព័ន្ធនឹងការបង្ហាញចំណាប់អារម្មណ៍របស់អ្នកវិនិយោគិនចិនចង់វិនិយោគលើការដាំកៅស៊ូវិញ លោក វេង សាខុន បានបញ្ជាក់ថា ផ្ទៃដីកៅស៊ូនៅកម្ពុជា មានប្រមាណ ៤៥ម៉ឺនហិកតា «តែតម្លៃកៅស៊ូបច្ចុប្បន្នមានតម្លៃទាប និងមានបញ្ហាច្រើន ដូច្នេះលោកស្នើឱ្យក្រុមហ៊ុនមកទស្សនកិច្ចនៅកម្ពុជា ដើម្បីពិនិត្យពីលទ្ធភាពវិនិយោគ» ៕ កែសម្រួលដោយ ៖ សុឃាក់
ចែករំលែកព័តមាននេះ