ថ្នាក់ដឹកនាំនឹងផ្តល់កិត្តិយសដល់មង្គលការ ឱក សុគន្ធកញ្ញា

ថ្ងៃទី ១៥ ខែ ឧសភា ឆ្នាំ ២០១៩

ម៉ោង ១៥:២៨

រាជធានីភ្នំពេញ៖ មានដំណឹងថា សម្តេចអគ្គមហាសេនាបតីតេជោហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន នឹងផ្តល់កិត្តិយសអញ្ជើញចូលរួមនៅក្នុងពិធីមង្គការរបស់តារាចម្រៀងឱក សុគន្ធកញ្ញា ។ មង្គលការនេះនឹងធ្វើឡើងនៅថ្ងៃទី១៦ ខែឧសភា ២០១៩ នៅសណ្ឋាគារសុខាអូតែល រាជធានីភ្នំពេញ ។

ដំណឹងនៃការចូលរួមរបស់សម្តេចតេជោនាយករដ្ឋមន្ត្រី និងភរិយាបានក្លាយជាទីចាប់អារម្មណ៍ពីមហាជន ជាពិសេសអ្នកគាំទ្រតារាចម្រៀងឱក សុគន្ធកញ្ញា ។ ដំណឹងនេះបានកើតឡើងបន្ទាប់ពីឱក សុគន្ធកញ្ញា និងអនាគតស្វាមីលោកអុឹង សុខលី បានអញ្ជើញសម្តេចទាំងពីរដោយផ្ទាល់ ក្នុងពេលដែលអ្នកទាំងពីរបានយកប្រាក់បរិច្ចាគជូនកាកបាទក្រហមក្នុងទិវា៨ឧសភាកាលពីពេល ថ្មីៗកន្លងមក ។ ការអញ្ជើញចូលរួមដោយផ្ទាល់ពីសម្តេចទាំងពីររឹតតែធ្វើឲ្យមង្គលការរបស់ឱក សុគន្ធកញ្ញា និងប្អូនប្រុសថៅកែផលិតកម្មហង្សមាសមានភាពឱឡារិក និងមានមុខមាត់កាន់តែខ្លាំង ក្នុងនាមជាតារាចម្រៀងល្បីក្នុងប្រទេស ។

ពិធីមង្គលការរបស់ឱក សុគន្ធកញ្ញា និងលោកអ៉ឹង សុខលី អគ្គនាយករងស្ថានីយទូរទស្សន៍ហង្សមាសត្រូវគេដឹងថា នឹងរៀបចំយ៉ាងពិសេសជាមួយនឹងកម្មវិធី ប្លែកៗជាច្រើន ។ ជាមួយសម្លៀកបំពាក់ពីសំអាងការល្បីឈ្មោះមានតម្លៃរាប់មុឺនដុល្លារនោះ ពិធីមង្គលការឱក សុគន្ធកញ្ញា នឹងមានការរៀបចំការច្រៀងរួមគ្នាមួយពីតារាចម្រៀងនៅក្នុងផលិតកម្មហង្សមាសផងដែរ ។

ពិធីមង្គលការរបស់ឱក សុគន្ធកញ្ញា ត្រូវគេរំពឹងថា នឹងមានការកក្រើកខ្លាំង ព្រោះក្រៅពីការរៀបចំយ៉ាងប្រណីតនោះ ភ្ញៀវកិត្តិយសដែលនឹងចូលរួមនឹងមានមន្ត្រី ធំៗ អ្នកជំនួញ ល្បីៗ ជាពិសេសតារាស្ទើរតែទាំងអស់នឹងបង្ហាញវត្តមាននាពេលនោះ ។ មុននេះបានលេចឡើងរូបភាពមុនអាពាហ៍ពិពាហ៍របស់ឱក សុគន្ធកញ្ញា យ៉ាងកក្រើកហ្វេសប៊ុក ។

ប្រវត្តិស្នេហារបស់ឱក សុគន្ធកញ្ញា និងលោកអុឹង សុខលី ស្ថិតក្នុងភាពកំបាំងអស់ពេលជាយូរ រហូតទាល់តែពួកគេបានធ្វើពិធីស្តីដណ្តឹង។ ក្រោយពិធីនោះមករូបភាពស្និទ្ធស្នាល ឬដើរលេងកម្សាន្តរួមគ្នារបស់គូស្នេហ៍នេះបានបង្ហាញឡើងជាបន្តបន្ទាប់ ។ អ្នកគាំទ្រជាច្រើនបានអបអរសាទរតារាក្នុងដួងចិត្តពួកគេ គឺឱក សុគន្ធកញ្ញា ដែលចូលរោងការ ។ ពួកគេជូនពរគូជីវិតរួមរស់នឹងគ្នាប្រកបដោយសុភមង្គល ៕