ប្រារព្ធនាងឧត្តរាថេរីជាអ្នកមានអាយុវែង

ថ្ងៃទី ២៤ ខែ មេសា ឆ្នាំ ២០១៩

ម៉ោង ១១:០៧

ព្រះបរមសាស្តាទ្រង់ប្រារព្ធនូវនាងឧត្តរាថេរីជាអ្នកមានអាយុវែងដល់ទៅ១២០ឆ្នាំ។

ថ្ងៃមួយនាងបានទៅបិណ្ឌបាតតាមផ្ទះអ្នកស្រុក លុះបានចង្ហាន់ល្មមសមគួរហើយ ទើបត្រឡប់មកកាន់កុដិវិញ។ ពេលនិមន្តមកដល់ពាក់កណ្តាលផ្លូវនាងបានជួបនឹងភិក្ខុមួយអង្គកំពុងនិមន្តបិណ្ឌបាតហើយបានប្រគេនចង្ហាន់បិណ្ឌបាតរបស់ខ្លួនដល់ភិក្ខុអង្គនោះទាំងអស់ និងធ្វើយ៉ាងនេះអស់រយៈពេល៣ថ្ងៃ ។

លុះក្នុងថ្ងៃទី៤នាងបានទៅបិណ្ឌបាតទៀតក៏ជួបនឹងព្រះពុទ្ធជាម្ចាស់នៅត្រង់ផ្លូវចង្អៀតមួយ ហើយបានរចៀសផ្លូវដោយដើរថយក្រោយបន្តិចបានជាន់ជាយចីវររបស់ខ្លួនឯងដួលនៅទៅទីនោះ ។

ភ្លាមៗព្រះសាស្តាទ្រង់ចូលទៅជិតហើយត្រាស់សម្តែងធម្មីកថាដោយព្រះគាថានេះថា បរិជិណ្ណមិទំ រូបំ រោគនិទ្ធំ បភង្គណំ ភិជ្ជតិ បូតិ សន្ទេហោ មរណន្តំ ហិ ជីវិតំ ។

ប្រែថា រូបកាយនេះគ្រាំគ្រាទ្រុឌទ្រោមហើយជាទីអាស្រ័យនៅនៃរោគ ជារបស់ដែលផុយរលួយ កាយរបស់ខ្លួនជារបស់ដែលស្អុយគួរខ្ពើមរអើម និងបែកធ្លាយជាធម្មតា ព្រោះថា ជីវិតនេះមានសេចក្តីស្លាប់នៅទីបំផុតចៀសមិនរួចឡើយ ។

លុះចប់ធម្មីកថា នាងឧត្តរាថេរីក៏បានលុះនូវព្រះធម៌តាមឧបនិស្ស័យរបស់ខ្លួន សោយសុខក្នុងលោកនេះផង លុះបែកធ្លាយរូបកាយក៏បានទៅសោយសុខក្នុងព្រះនិព្វាន។