រាជធានីភ្នំពេញ ៖ បញ្ហានៃការយកពន្ធអង្ករកម្ពុជាសម្រាប់ការនាំអង្ករចូលទីផ្សារអឺរ៉ុប ហាក់កំពុងតែឡើងកំដៅ បន្ទាប់ពីប្រមុខដឹកនាំរាជរដ្ឋាភិបាលកម្ពុជា ក៏ដូចជាសហព័ន្ធស្រូវអង្ករ បញ្ជាក់ជំហរចង់ដាក់ពាក្យប្តឹងប្រឆាំង នឹងសហគមន៍អឺរ៉ុបទៅអង្គការពាណិជ្ជកម្មពិភព លោក (WTO) ដោយចាត់ទុកការសម្រេចយកពន្ធអង្ករកម្ពុជា ហាក់មានភាពអយុត្តិធម៌ខ្លាំងសម្រាប់កម្ពុជា ។
យ៉ាងណាមិញ ថ្នាក់ដឹកនាំសហព័ន្ធស្រូវអង្ករកម្ពុជា បានឲ្យដឹងថាសហព័ន្ធកំពុងតែធ្វើការពិភាក្សាលើបញ្ហាផ្លូវច្បាប់ ក្នុងការដាក់ពាក្យប្តឹងទៅអង្គការពាណិជ្ជកម្មពិភពលោក រឿងសហភាពអឺរ៉ុបដាក់ពន្ធលើអង្ករកម្ពុជា ខណៈការដាក់ពន្ធលើអង្ករនេះត្រូវថ្នាក់ដឹកនាំថា ជាការគាំពារនិយមរបស់សហភាពអឺរ៉ុបសម្រាប់ប្រទេសអុីតាលី។ ហើយគោលដៅនៃការប្តឹងទាស់ទៅនឹងការដាក់ពន្ធនេះ ចំពោះអង្ករក្រអូបរបស់កម្ពុជា ដោយសារថាការដាក់ពន្ធនេះ គាត់ដាក់ពន្ធលើអង្ករក្រអូបបូកជាមួយអង្ករសរ ហ្នឹងមកចាត់ការលើបន្ទាត់ពន្ធគយ។
ថ្នាក់ដឹកនាំសហព័ន្ធស្រូវអង្ករពន្យល់ថា ការយកពន្ធនេះ គឺហាក់មិនច្បាស់លាស់ពីប្រភេទនៃអង្ករ ត្រង់នេះគឺមានន័យថា តាមពិតទៅវាជាអង្ករពីរប្រភេទខុសគ្នា គឺអង្ករក្រអូបកម្ពុជា និងអង្ករសអុីតាលី ។ អីចឹងការប្រកួតប្រជែងហ្នឹង អង្ករកម្ពុជាប្រកួតប្រជែងជាមួយប្រជាជនគាត់ គាត់ការពារប្រជាជនគាត់គួរតែដាក់ពន្ធលើអង្ករសរហ្នឹងទេ មិនគួរដាក់ពន្ធលើអង្ករក្រអូប និងអង្ករប្រឌិតនោះទេ ពីព្រោះកសិករអឺរ៉ុបមិនអាចផលិតអង្ករនេះបានទេ ដោយសារលក្ខខណ្ឌសីតុណ្ហភាព និងភូមិសាស្ត្រមិនអាចអនុញ្ញាតឱ្យកសិករអឺរ៉ុបផលិតអង្ករក្រអូបនេះបានទេ»។
ថ្មីៗនេះសម្តេចតេជោ ហ៊ុនសែន នាយករដ្ឋមន្ត្រីកម្ពុជា បានថ្លែងក្នុងវេទិការរាជរដ្ឋាភិបាលកម្ពុជា-ផ្នែកឯកជនលើកទី១៨ កាលពីថ្ងៃទី២៩មីនាថា ចំនួនអង្ករសម្រាប់នាំចេញនៅឆ្នាំនេះមានការកើនឡើងបើប្រៀបធៀបទៅនិងឆ្នាំទៅ។ អីចឹងអ្វីដែលសហភាពអឺរ៉ុបដាក់ពន្ធលើយើងវាមិនបណ្តាលឱ្យមានការខូចខាតណាមួយប៉ះពាល់ដល់ការនាំចេញអង្កររបស់កម្ពុជានោះទេ ។ សម្តេចមានប្រសាសន៍បញ្ជាក់នាពេលនោះថា « ឥឡូវខាងសហព័ន្ធស្រូវអង្កររបស់យើងបានសំណូមពរមកខ្ញុំផ្ទាល់ តែខ្ញុំអត់ទាន់ឆ្លើយតបនោះទេ ខ្ញុំទុកឱ្យនាំគ្នាសិក្សា។ គេសុំប្តឹងទៅអង្គការពាណិជ្ជកម្មពិភពលោក ព្រោះរឿងនេះវាមិនត្រឹមត្រូវ»។
ថ្លែងប្រាប់កោះសន្តិភាពនាថ្ងៃទី ១ ខែមេសានេះ លោក ឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាមានប្រសាសន៍ថា «សហព័ន្ធស្រូវអង្ករយើងបានប្រជុំពិភាក្សាគ្នាជាមួយទីប្រឹក្សាអ្នកច្បាប់ ដើម្បីឱ្យគាត់ផ្តល់យោបល់ថាការដាក់កំហិតឱ្យត្រូវបង់ពន្ធក្នុងការនាំចេញអង្ករទៅសហភាពអឺរ៉ុបនេះ វាមិនឆ្លើយតបទៅនិងភាពអនុគ្រោះ ។ យើងអាចនៅមានសិទ្ធិក្នុងការពន្យល់សហគមន៍អឺរ៉ុបឬឱ្យស្ថាប័នណាមួយមានសិទ្ធអំណាចក្នុងការធ្វើការតវ៉ា ឬក៏កែសម្រួលឡើងវិញនូវអ្វីដែលជាបំរាមដែលគេ(EU) ចេញសេចក្តីប្រកាស»។
លោកឧកញ៉ា បន្តថា សហព័ន្ធស្រូវអង្ករ ត្រូវការពិភាក្សា ពិសេសពិភាក្សាជាមួយក្រសួង ពាណិជ្ជកម្ម ដើម្បីរកយន្តការណាមួយឱ្យវាសមស្រប តាមច្បាប់គតិយុត្ត។ បានន័យថាត្រូវការសិក្សាឱ្យបានគ្រប់ជ្រុងជ្រោយមុននឹងដាក់ទៅតែសព្វថ្ងៃនេះវាស្ថិតក្នុងអន្តរការពិភាក្សា។ ទោះជាយ៉ាងណាសហព័ន្ធត្រូវតែជួយឱ្យសហព័ន្ធអាចឱ្យកម្ពុជានាំចូលអង្ករទៅអឺរ៉ុបបានដូចដើមវិញ។ លោកឧកញ៉ា បញ្ជាក់ថា ជាទូទៅការជជែកគ្នា សមស្របហើយ តែផ្លូវការមិនទាន់បានដាក់ទេ ព្រោះយើងនៅសិក្សាបន្តទៅទៀត វានៅមានរយៈពេលជាង១ឆ្នាំ។ស្ថាប័នពាក់ព័ន្ធកំពុងជជែកគ្នាឱ្យបានស៊ីជម្រៅពាក់ព័ន្ធនិងការងារផ្លូវច្បាប់។
ចំណែក លោក ប៉ាន សូរស័ក្តិ រដ្ឋមន្ត្រី ក្រសួងពាណិជ្ជកម្មមានប្រសាសន៍ថា រឿងនេះយើងបានធ្វើមួយជំហានរាយការណ៍ជូនដល់សម្តេចរួចហើយ។
លោករដ្ឋមន្ត្រី ពន្យល់ថា «រឿងនេះ ជារឿង ការការពារផលិតផលក្នុងស្រុកពិសេសនៅសហ ភាពអឺរ៉ុប គឺប្រទេសអុីតាលីគាត់ថា អង្ករយើងចូលទៅប្រកួតប្រជែងជាមួយអង្កររបស់គាត់ ហើយគាត់ក៏ដាក់ភាពការពារ ហើយខ្មែរយើងក៏មានដែរ គេហៅថាច្បាប់ឧបាស្រ័យ ហើយច្បាប់នេះមិនអាចដាក់រហូតបានទេអាចមានរយៈពេលបីឆ្នាំនាំចូលត្រូវបង់ពន្ធ»។
តែទោះជាយ៉ាងណាលោក ប៉ាន សូរស័ក្តិ បញ្ជាក់ថា « យើងបានធ្វើមួយជំហានហើយ ខ្ញុំមានស្ថានបេសកម្មនៅហ្សឺណែវ WTO គាត់កំពុងតែធ្វើការនិងបានជជែកជាមួយសមភាគីខាង EU […] ដោយពន្យល់ថា អង្ករដែលគាត់ដាក់ការពារនេះវាខុស ។ ខ្មែរយើងអត់មានអង្ករសទេ ខ្មែរយើងហៅថាអង្ករក្រអូប អីចឹងគាត់ច្រលំ ។ យើងអាចប្រាប់គេថា អ្នកឯងត្រូវបំបែកអង្ករនេះជាពីរ ព្រោះយើងអត់មានធ្វើឱ្យប៉ះពាល់ដល់អង្ករអុីតាលីទេ»។ លោករដ្ឋមន្ត្រី លើកឡើងថា ទាក់ទងរឿង EU ដាក់ពន្ធលើអង្ករកម្ពុជា កម្ពុជាបាននឹងកំពុងធ្វើសន្សឹមហើយព្យាយាមពន្យល់ទៅដល់ខាង EU ក្នុងសកម្មភាពមួយទន់ភ្លន់តែបើ EUនៅតែបន្តដាក់ពន្ធលើអង្ករកម្ពុជា។ ជម្រើសចុងក្រោយកម្ពុជានឹងដាក់ពាក្យប្តឹងទៅអង្គការពាណិជ្ជកម្មពិភពលោកឱ្យជួយដោះស្រាយ ។
សូមរម្លឹកថា គណៈកម្មការអឺរ៉ុប បានឲ្យដឹងទៀតថា ចាប់ពីថ្ងៃទី១៨ មករា តទៅ អឺរ៉ុបនឹងកំណត់ដកហូតពន្ធលើអង្ករនាំចូលពីកម្ពុជា និងមីយ៉ាន់ម៉ាផងដែរ ដោយឆ្នាំទី១ គឺឆ្នាំ២០១៩នេះ នឹងកំណត់ដកហូតពន្ធគយក្នុងតម្លៃ ១៧៥ អឺរ៉ូ ឬស្មើនឹងប្រមាណ ២០០ ដុល្លារអាមេរិក ក្នុងអង្ករមួយតោន។ នៅឆ្នាំទី២ នឹងកំណត់ដកហូតពន្ធមកនៅត្រឹម ១៥០ អឺរ៉ូ ឬស្មើនឹងជាង ១៧០ដុល្លារអាមរិក និងឆ្នាំទី៣ ការដកហូតពន្ធនឹងថយចុះមកនៅ ១២៥ អឺរ៉ូ ឬស្មើនឹងជាង ១៤០ ដុល្លារអាមេរិក នៅក្នុងអង្ករមួយតោន។ ការសម្រេចយកពន្ធនេះធ្វើឲ្យការនាំចេញអង្កររបស់កម្ពុជាទៅទីផ្សារអឺរ៉ុបត្រូវបង់ពន្ធប្រមាណជាង ៥០លានដុល្លារអាមេរិកក្នុងមួយឆ្នាំ៕
ចែករំលែកព័តមាននេះ