ខេត្តមណ្ឌលគិរី ៖ ស្ត្រីជនជាតិព្នងម្នាក់ ព្រោះតែខ្លាចប្តីយកលុយកាក់ទៅចាយវាយផឹកស៊ី ក៏បានប្តឹងនគរបាលដោយប្រឌិតថា ខ្លួនត្រូវចោរប្លន់យកទ្រព្យសម្បត្តិអស់ កាលពីថ្ងៃទី២២ ខែមីនាកន្លងទៅ វេលាម៉ោង៩និង២០នាទីយប់ នៅចំណុចអូរណាវ…
ខេត្តមណ្ឌលគិរី ៖ ស្ត្រីជនជាតិព្នងម្នាក់ ព្រោះតែខ្លាចប្តីយកលុយកាក់ទៅចាយវាយផឹកស៊ី ក៏បានប្តឹងនគរបាលដោយប្រឌិតថា ខ្លួនត្រូវចោរប្លន់យកទ្រព្យសម្បត្តិអស់ កាលពីថ្ងៃទី២២ ខែមីនាកន្លងទៅ វេលាម៉ោង៩និង២០នាទីយប់ នៅចំណុចអូរណាវ ក្នុងភូមិពូទឺត ឃុំប៊ូស្រា ស្រុកពេជ្រាដា ។
ទាក់ទងនឹងករណីខាងលើ លោក ឡោ សុខា ស្នងការនគរបាលខេត្តបានឲ្យដឹងថា ករណីចោរចូលប្លន់នេះ បើតាមការបំភ្លឺពីស្ត្រីម្ចាស់ផ្ទះឈ្មោះ ចេស ហើប អាយុ៣៥ឆ្នាំ និងប្ដីឈ្មោះ ណែក ម្យន អាយុ៤១ឆ្នាំ ជាកសិករ មានទីលំនៅបច្ចុប្បន្នភូមិពូទឺត ឃុំប៊ូស្រា បានឲ្យដឹងថា នៅវេលាម៉ោងជាង៩យប់នោះ ប្រពន្ធនៅ
ផ្ទះជាមួយកូនតូច ។
ពេលនោះ មានជនមិនស្គាល់មុខ៣នាក់ ពាក់មួកសុវត្ថិភាព បានចូលផ្ទះធ្វើសកម្មភាព ដោយ២នាក់ ដោយចាប់ដៃនិងខ្ទប់មាត់ បិទភ្នែក និងម្នាក់ទៀតបានរើជជុះអីវ៉ាន់ លុះបានហើយក៏រត់គេចខ្លួនបាត់អស់ទៅ ។ បន្ទាប់ពីពួកចោរទៅបាត់ ពេលពិនិត្យមើលទ្រព្យសម្បតិ្តទើបដឹងថា បាត់ចិញ្ចៀនមាស៤វង់ស្មើនឹង៧ជី លុយខ្មែរ៧០ម៉ឺនរៀល និងលុយវៀតណាម១លានដុង ។
បើតាមស្ត្រីម្ចាស់ផ្ទះថា គាត់មិនដឹងខ្លួនសោះ ពេលចោរចូលទៅប្លន់នោះ ហើយនាំគ្នាគេចចេញទៅមើលពុំទាន់ ព្រោះពេលនោះ ភ្នែករបស់ខ្លួនស្រវាំង ទើបពេលចោរទៅផុត ក៏ពកូនទៅហៅប្ដីដែលនៅផ្ទះអ្នកជិតខាង និងរាយការណ៍ប្រាប់សមត្ថកិច្ច ។
លោកស្នងការបន្តថា ក្រោយពីស្តាប់ការផ្តល់ចម្លើយរបស់ស្ត្រីម្ចាស់ផ្ទះ និងការទៅពិនិត្យជាក់ស្តែងនៅកន្លែងកើតហេតុ សមត្ថកិច្ចសង្ស័យករណីខាងលើជាការប្រឌិត ទើបបន្តការស្រាវជ្រាវ ។ លុះមកដល់ល្ងាចថ្ងៃទី២៣ ខែមីនា ស្ត្រីរូបនេះសារភាពថា គាត់ពិតជាបានប្រឌិតរឿងប្លន់នេះមែន ក្នុងគោលបំណងយកមាសចំនួន៧ជី ទៅលាក់ទុកខ្លាចប្តីយកទៅចាយវាយស៊ីផឹក ព្រោះប្តីដើរផឹកស៊ីយប់ៗជារៀងរាល់ថ្ងៃ ហើយនៅពេលចូលផ្ទះវិញតែងតែរករឿង ។ ហេតុដូច្នេះហើយ ទើបគាត់ប្រឌិតរឿងចោរប្លន់មាសខាងលើនេះ
លោក សូ សុវណ្ណ ស្នងការរងនគរបាលខេត្ត ទទួលផែនយុត្តិធម៌បានឲ្យដឹងថា ក្រោយពីសមត្ថកិច្ចធ្វើការស៊ើបអង្កេតច្បាស់លាស់ ក៏ធ្វើការអប់រំណែនាំឲ្យស្ត្រីរូបនេះវិលត្រឡប់ទៅផ្ទះវិញ ព្រោះតែគាត់មានកូនតូច ។ បើតាមលោកស្នងការរងបញ្ជាក់ថា ស្ត្រីម្នាក់នេះមានស្មារតីល្អមិនមានបញ្ហាអ្វីនោះទេ ប៉ុន្តែគាត់បែរជាគិតខ្លាចប្តីយកលុយទៅបំផ្លាញទើបបង្កើតជារឿងប្រឌិតចោរប្លន់បែបនេះ ។
បើតាមអ្នកជិតខាងរស់នៅភូមិពូទឺតនិយាយថា បុរសជាប្តីតែងទៅធ្វើជាកម្មករគេ ដើម្បីបានកម្រៃចិញ្ចឹមគ្រួសារ ។ ចំណែកការផឹកស៊ីពិតជាមានមែន តែក៏មិនដូចអ្វីដែលប្រពន្ធបានចោទគាត់ទាំងស្រុងនោះដែរ ៕
ចែករំលែកព័តមាននេះ