រាជធានីភ្នំពេញ៖ តារាកំប្លែងលោកជួង ជី ហៅនាយកុយ បានប្រកាសរៀបចំពិធីឆ្លងអាស្រមលោកយាយម៉ៅ នៅពេជ្រនិល បន្ទាប់ពីអាស្រមថ្មីមួយនេះសាងសង់រួចរាល់ក្រោមការផ្តួចផ្តើមដោយរូបនាយផ្ទាល់ ។ ការផ្តួចផ្តើមសាងសង់អាស្រមព្រោះនាយកុយតែងតែរៀបចំពិធីបុណ្យនៅទីនោះជារៀងរាល់ឆ្នាំ ដើម្បីសុំសេចក្តីសុខ ដោយនាយបានធ្វើប្រមាណជាង១០ឆ្នាំមកហើយ ។
បើតាមការប្រកាសពីតារាកំប្លែងនាយកុយ តាមហ្វេសប៊ុកឲ្យដឹងថា ពិធីឆ្លងអាស្រមលោកយាយម៉ៅនៅពេជ្រនិលនឹងប្រារព្ធធ្វើឡើងនៅថ្ងៃទី២៨ ខែមីនា ឆ្នាំ២០១៩។ នៅក្នុងឱកាសនៃពិធីបុណ្យលោកបាននាំផ្ទាំងទស្សនីយភាពល្ខោនបាសាក់របស់ក្រុមប៉ូឡូ សាវឿនសម្តែងជូនមហាជនទស្សនាទល់ភ្លឺ ។
អាស្រមលោកយាយម៉ៅ នៅពេជ្រនិលបានផ្តើមការសាងសង់ជាថ្មីដោយតារាកំប្លែងលោកជួង ជី ហើយទើបតែសាងសង់រួចកាលពីពេល ថ្មីៗកន្លងមក ។ អាស្រមមួយនេះបានកសាងជាលើកទី២ ដោយសារសំណង់ដែលបានសាងសង់លើកទី១ត្រូវតារាកំប្លែងរូបនេះអះអាងថា មិនមានភាពរឹងមាំ ហើយបាក់ស្រុតទៅវិញ ។
នាយកុយ បានសម្តែងការហួសចិត្តផងដែរចំពោះការសាងសង់លើកដំបូងមិនមានការទទួលខុសត្រូវខ្ពស់ពីជាងទទួលសាងសង់ ធ្វើឲ្យសំណង់មិនមានគុណភាព ជាហេតុនាំឲ្យលោកខាតបង់ពេលវេលា និងប្រាក់រាប់ពាន់ដុល្លារ។ បន្ទាប់ពីបណ្តេញជាងដែលធ្វើដំបូងនោះចោល នាយកុយ បានហៅជាងថ្មីមកធ្វើឡើងវិញ រហូតសំណង់បានសម្រេចរួចរាល់នាពេលនេះ ។
តាមរយៈនៃការរៀបចំពិធីបុណ្យនេះកន្លងមកនាយកុយ ធ្លាប់បានលើកឡើងថា ក្នុងគោលបំណងរំលឹក និងដឹងគុណដល់លោកយាយម៉ៅ ដែលបានតាមថែរក្សាក្រុមគ្រួសាររបស់លោកឱ្យមានសេចក្តីសុខ និងប្រជាពលរដ្ឋគ្រប់រូបដែលធ្វើដំណើរឆ្លងកាត់ ។
នាយកុយឲ្យដឹងថា ពិធីបុណ្យ លោកបានប្រារព្ធធ្វើមួយឆ្នាំម្តង និងជារៀងរាល់ឆ្នាំ រហូតមកដល់ពេលនេះប្រារព្ធធ្វើប្រហែលជាង១០ឆ្នាំមកហើយ ។ ពិធីបុណ្យនេះតែងតែមានការចូលរួមឧបត្ថម្ភគាំទ្រពីមន្ត្រីជាន់ខ្ពស់មួយចំនួន ប្រជាពលរដ្ឋ ជាពិសេសពីអ្នកសិល្បៈដូចគ្នា ។
តាំងពីឆ្នាំ២០១៣ ក្រោយកូនប្រុសបានបាត់បង់ជីវិតដោយគ្រោះថ្នាក់ចរាចរណ៍ នៅផ្លូវជាតិលេខ៤ ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ មក នាយកុយ មិនរំលងមួយឆ្នាំណាឡើយ តែងតែនិមន្តព្រះសង្ឃសូត្រមន្ត បង្សុកូលឧទ្ទិសដល់វិញ្ញាណក្ខន្ធកូនរូបនោះនៅទីកន្លែងដែលល្បីបារមីលោកយាយម៉ៅកាន់ ៕
ចែករំលែកព័តមាននេះ