រាជធានីភ្នំពេញ ៖ ព្រឹត្តិការណ៍កីឡាបាល់ទះ ឆ្នេរខ្សាច់អន្តរជាតិស្រាបៀរអាន់ឆ័រ ត្រូវបានប្រកាសបើកជាផ្លូវការលើកទី២ នៅក្នុងប្រទេសកម្ពុជា ។ ពិធីប្រកាសព្រឹត្តិការណ៍កីឡាមួយនេះ បានធ្វើឡើងនៅក្នុងសន្និសីទសារព័ត៌មានមួយកាលពីថ្ងៃទី២០ កុម្ភៈ ២០១៩ ។
យោងតាមសេចក្តីប្រកាសរបស់ក្រុមហ៊ុនស្រាបៀរអាន់ឆ័រ ដែលជាអ្នករៀបចំព្រឹត្តិការណ៍កីឡានេះ បានឱ្យដឹងថា ព្រឹត្តិការណ៍នេះ ជាព្រឹត្តិការណ៍កីឡាបាល់ទះឆ្នេរខ្សាច់អន្តរជាតិលើកទី២ ដែលប្រារព្ធធ្វើឡើងនៅក្នុងព្រះរាជាណាចក្រកម្ពុជា ក្រោមកិច្ចសហការជាមួយនឹងសហព័ន្ធកីឡាបាល់ទះអន្តរជាតិ ក្រសួងអប់រំ យុវជននិងកីឡា និងសហព័ន្ធកីឡាបាល់ទះកម្ពុជា ។ ការប្រកួតកីឡាបាល់ទះឆ្នេរខ្សាច់អន្តរជាតិនេះ នឹងមានក្រុមកីឡាករឆ្នើមសញ្ជាតិកម្ពុជា និងក្រុមកីឡាករឆ្នើមអន្តរជាតិជាច្រើនក្រុមដូចជា មកពីប្រទេសជប៉ុន ឆេក ថៃ សហរដ្ឋអាមេរិក ទីក្រុងតៃប៉ិ អូស្ត្រាលី ប៉ូឡូញ កាណាដា អ៊ីស្រាអែល សឹង្ហបុរី អាឡឺម៉ង់ ជាដើម ។
លោកសំ សោភាន់ អនុប្រធានសហព័ន្ធកីឡាបាល់ទះកម្ពុជា បានឱ្យដឹងថា ការលេងកីឡាផ្ដល់ផលប្រយោជន៍សម្រាប់មនុស្សគ្រប់វ័យ ឱ្យទទួលបានសុខភាពល្អ ទាំងផ្លូវកាយ ផ្លូវចិត្ត ផ្លូវបញ្ញា និងជួយឱ្យជៀសផុតពីភាពអសកម្មផ្សេងៗក្នុងសង្គម ។ កីឡាបាល់ទះ គឺជាប្រភេទកីឡាដែលពេញនិយម និងមានប្រជាប្រិយភាពលំដាប់ទី២ នៅលើពិភពលោក ហើយព្រះរាជាណាចក្រកម្បុជា ក៏មានប្រជាពលរដ្ឋជាច្រើននាក់ទាំងចាស់ទាំងក្មេងលេងកីឡានេះ ។
លោកបន្តថា សហព័ន្ធកីឡាបាល់ទះកម្ពុជា បានធ្វើការជំរុញ និងអភិវឌ្ឍន៍ សកម្មភាពកីឡាបាល់ទះនៅក្នុងព្រះរាជាណាចក្រកម្ពុជា ដោយបានរៀបចំក្រុម ក្លឹបកីឡា និងរៀបចំផែនការធ្វើការបណ្ដុះបណ្ដាល កីឡាករ កីឡាការិនីឆ្នើម និងមន្ត្រីជំនាញ សម្រាប់បម្រើដល់ការអភិវឌ្ឍន៍កីឡាបាល់ទះក្នុងគោលបំណងផ្សព្វផ្សាយនិងបណ្ដុះឆន្ទៈ ដល់ពលរដ្ឋកម្ពុជាឱ្យចូលរួមចូលចិត្តលេង គាំទ្រ និងស្រលាញ់កីឡាបាល់ទះ។
លោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា ក្នុងបរិបទថ្មី ដែលប្រទេសជាតិកំពុងតែទទួលបាននូវផលចំណេញពីសុខសន្តិភាព ស្ថិរភាពនយោបាយ និងការអភិវឌ្ឍវិស័យអប់រំកាយ និងកីឡា ការកំណត់យកការអភិវឌ្ឍការងារកីឡា ជាចំណុចស្នូលនៃកំណែទម្រង់ក្នុងគោលបំណងលើកកម្ពស់ សុខភាព សមត្ថភាពជំនាញបច្ចេកទេសកីឡា ប្រកបដោយគុណភាព និងសមិទ្ធផលខ្ពស់ក្នុងការប្រកួតជាលក្ខណៈជាតិ និងអន្តរជាតិ ។
លោកបន្តថា ដើម្បីឆ្លើយតបទៅនឹងចក្ខុវិស័យនេះ រាជរដ្ឋាភិបាលបានជំរុញដល់ការបណ្ដុះបណ្ដាល កីឡាករ កីឡាការិនី ការកសាងហេដ្ឋារចនាសម្ព័ន្ធ កីឡា និងគាំទ្រឱ្យមានការរៀបចំការប្រកួតកីឡាគ្រប់ប្រភេទ ដើម្បីផ្ដល់ឱកាសឱ្យកីឡាករ កីឡាការិនី បញ្ចេញសមត្ថភាពដកស្រង់បច្ចេកទេស បង្ហាញទេពកោសល្យរបស់ខ្លួន និងកសាងកេរ្តិ៍ឈ្មោះនៅលើឆាកអន្តរជាតិ ៕ ដោយសហការ
ចែករំលែកព័តមាននេះ