ខេត្តសៀមរាប ៖ រយៈពេល២ថ្ងៃគឺថ្ងៃទី១៨ និងទី១៩ ខែកុម្ភៈ សមត្ថកិច្ចចម្រុះសហការគ្នាចុះរឹតបន្តឹងច្បាប់ចរាចរណ៍ផ្លូវគោក និងចុះបង្ក្រាបករណីរក្សាទុកចែកចាយ និងប្រើប្រាស់គ្រឿងញៀនក្នុងក្រុងសៀមរាបឈានដល់ធ្វើការឃាត់ខ្លួនបានជនសង្ស័យប្រុសស្រីចំនួន១៦នាក់ ក្នុងនោះមានប្រុស២នាក់ជាភ្នាក់ងាររបស់ប៉េអឹមខេត្តសៀមរាបរួចនាំយកមកសួរនៅការិយាល័យនគរបាលប្រឆាំងគ្រឿងញៀនខេត្ត ។
ប្រភពពីមន្ត្រីនគរបាលជំនាញខេត្តបានប្រាប់ថា ជនសង្ស័យប្រុសស្រីទាំង១៦នាក់នោះ និងវត្ថុតាងត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលាការខេត្ត ដើម្បីចាត់ការទៅតាមនីតិវិធីច្បាប់ ។
សូមបញ្ជាក់ផងដែរថា ជនសង្ស័យប្រុសស្រីទាំង១៦នាក់ក្នុងនោះមាន២នាក់ទី១-ឈ្មោះ កែវ រដ្ឋា ភេទប្រុស អាយុ៣៣ឆ្នាំ ជួញដូរ និងម្នាក់ទៀតឈ្មោះ ជា ចាន់ពន្លឺ ភេទប្រុស អាយុ១៧ឆ្នាំ អ្នកទាំង២នាក់នេះជាភ្នាក់ងារឱ្យខាងប៉េអឹមខេត្តរស់នៅភូមិវិហារចិន សង្កាត់ស្វាយដង្គំ ក្រុងសៀមរាប បានជិះម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ពាក់ផ្លាកលេខ សៀមរាប 1E-2905 ត្រូវបានកម្លាំងនគរបាលចរាចរណ៍ចុះរឹតបន្តឹងច្បាប់ចរាចរណ៍ផ្លូវគោកធ្វើការឃាត់ខ្លួនបាន ។
ក្នុងនោះដកហូតបានវត្ថុតាងរួមមាន ថ្នាំញៀនចំនួន២កញ្ចប់, កាំបិតដែកចំនួន១, ឆ្នាំងសាកទូរស័ព្ទចំនួន១ រកឃើញនៅក្នុងកែបម៉ូតូ ។ ប៉ុន្តែមិនត្រូវបានប៉ូលិសដាក់ថតឱ្យទេ ព្រមទាំងមិនឱ្យដាក់ជាភ្នាក់ងារប៉េអឹមផងដែរ ៕
ចែករំលែកព័តមាននេះ