ខេត្តស្ទឹងត្រែង ៖ ជនជាតិឡាវម្នាក់រួមនឹងថ្នាំញៀនប្រភេទមេតំហ្វេតាមីនជាច្រើនពាន់គ្រាប់ បានត្រូវបង្ក្រាបដោយកម្លាំងកងរាជអាវុធហត្ថខេត្ត និងក្រុងស្ទឹងត្រែង នៅចន្លោះបង្គោលលេខ៣៥ និងលេខ៣៦ ក្បែរព្រំដែនឡាវ ស្ថិតក្នុងភូមិខាំផាន់ សង្កាត់សាមគ្គី…
ខេត្តស្ទឹងត្រែង ៖ ជនជាតិឡាវម្នាក់រួមនឹងថ្នាំញៀនប្រភេទមេតំហ្វេតាមីនជាច្រើនពាន់គ្រាប់ បានត្រូវបង្ក្រាបដោយកម្លាំងកងរាជអាវុធហត្ថខេត្ត និងក្រុងស្ទឹងត្រែង នៅចន្លោះបង្គោលលេខ៣៥ និងលេខ៣៦ ក្បែរព្រំដែនឡាវ ស្ថិតក្នុងភូមិខាំផាន់ សង្កាត់សាមគ្គី ក្រុងស្ទឹងត្រែង កាលពីវេលាម៉ោង១០ និង៤២នាទីព្រឹកថ្ងៃទី៦ ខែកុម្ភៈ ។
ការបង្ក្រាបករណីជួញដូរថ្នាំញៀនឆ្លងដែនខាងលើនេះ ដឹកនាំដោយលោកវរសេនីយ៍ឯក ដួង វិចិត្រ មេ បញ្ជាការរង ក្រោមបទបញ្ជាពីលោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្ត ដោយមានការសម្របសម្រួលពីព្រះរាជអាជ្ញាអមសាលាដំបូងខេត្ត ។
លោកវរសេនីយ៍ឯក ដួង វិចិត្រ មេបញ្ជាការរងកងរាជអាវុធហត្ថខេត្ត ទទួលផែនបង្ក្រាបបទល្មើសឱ្យដឹងថា ជនសង្ស័យបានលួចនាំគ្រឿងញៀន ឆ្លងដែនពីប្រទេសឡាវមកកាន់កម្ពុជា តាមច្រករបៀងដោយថ្មើរ ជើងកាត់ព្រៃ ។ ក្រោយពីឃើញវត្តមានតាមភិនភាគជនសង្ស័យមកដល់ដីកម្ពុជាក្បែរព្រំដែន កម្លាំងកង រាជអាវុធហត្ថដែលបានដាក់ពង្រាយ ក៏ឃាត់ខ្លួនត្រួតពិនិត្យឃើញមានថ្នាំញៀនមួយចំនួនធំក្នុងកាបូប ស្ពាយពណ៌ខ្មៅ ។
លោក ភុយ ខ្វៃ ប្រធានមន្ទីរយុត្តិធម៌បញ្ជាការដ្ឋានកងរាជអាវុធហត្ថខេត្ត បានបញ្ជាក់ពីសាវតារជនសង្ស័យឈ្មោះ ងួន លែ ភេទប្រុស អាយុ៤០ឆ្នាំ រស់នៅភូមិភាងឌី ស្រុកមឿងខូង ខេត្តចម្ប៉ាសាក់ ប្រទេសឡាវ ។ក្រោយការចាប់ខ្លួន ជនសង្ស័យរួមនឹងវត្ថុតាងជាក់ស្តែង ត្រូវបានដឹកបញ្ជូនតាមរថយន្តមកកាន់ បញ្ជាការ ដ្ឋានកងរាជអាវុធហត្ថខេត្តដើម្បីសួរចម្លើយ ដោយមន្ត្រីជំនាញនឹងធ្វើតេស្តរកសារធាតុញៀនលើវត្ថុតាង នៅចំពោះមុខជនសង្ស័យក្រោមការចូលរួមត្រួតពិនិត្យដោយក្រឡាបញ្ជីតំណាងឱ្យព្រះរាជអាជ្ញា ។
ជាក់ស្តែងវត្ថុតាងដកហូតមានចំនួន២៧កញ្ចប់ស្មើ៥.៣០២គ្រាប់ ជាប្រភេទមេតំហ្វេតាមីនមានអក្សរWYពណ៌ផ្កាឈូក ។ ជនសង្ស័យជាជនជាតិឡាវរូបនេះ ត្រូវបានកសាងសំណុំរឿងបញ្ជូនទៅអយ្យការអមសាលាដំបូងខេត្ត ក្រោយពីបញ្ចប់នីតិវិធី ។
ចែករំលែកព័តមាននេះ