ខេត្តសៀមរាប ៖ ជនជាតិចិនចំនួន៤នាក់ត្រូវបានកម្លាំងនគរបាលជំនាញ ខេត្តសៀមរាបឃាត់ខ្លួនករណីបើកល្បែងស៊ីសងខុសច្បាប់ជ្រកក្រោមស្លាកមជ្ឈមណ្ឌលកំសាន្ត ឈឹងស៊ីអ៊ីងស៊ាង ។
ប្រតិបត្តិការនេះធ្វើឡើងនៅវេលាម៉ោងប្រមាណជា១០យប់ថ្ងៃទី២៤ ខែមករា ឆ្នាំ២០១៩ ក្រោមការដឹកនាំដោយលោក ជួន សុបញ្ញា ព្រះរាជអាជ្ញារង អមសាលាដំបូងខេត្តសៀមរាប ដែលមានទីតាំងស្ថិតសង្កាត់ស្វាយដង្គំ ក្រុងសៀមរាប ក្បែរផ្សាររាត្រីនួនណៃ ។
នៅក្នុងប្រតិបត្តិការបង្ក្រាបនេះសមត្ថកិច្ចបានដកហូតយកវត្ថុតាងបានចំនួន៣២គ្រឿង និងវត្ថុតាងផ្សេងៗមួយចំនួនទៀតបញ្ជូនមកសាកសួរនៅស្នងការដ្ឋាននគរបាលខេត្ត ។
សមត្ថកិច្ចបន្តថា ជនសង្ស័យទាំង៤នាក់ នោះមានឈ្មោះទី១-ឈ្មោះ JIANG JIANCHUN ភេទ ប្រុស អាយុ៣៩ឆ្នាំ ជនជាតិចិន កាន់លិខិតឆ្លងដែនលេខ EE១៣៦២៩៤៥, ២-ឈ្មោះ TONG CHAO ភេទ ប្រុស អាយុ២៩ឆ្នាំ ជនជាតិចិន មិនមានលិខិតឆ្លងដែនជាប់ខ្លួន, ៣-ឈ្មោះ XU HONGXING ភេទ ប្រុស អាយុ៣៩ឆ្នាំ ជនជាតិ ចិន កាន់លិខិតឆ្លងដែនលេខ EC៤៧៦៧៣៨៨ និង ៤-ឈ្មោះ HAO BIN ភេទ ប្រុស អាយុ៣៦ឆ្នាំ ជនជាតិ ចិន មិនមានលិខិតឆ្លងដែនជាប់ខ្លួន ។
បច្ចុប្បន្នជនសង្ស័យជនជាតិចិនទាំង៤នាក់ត្រូវបានការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋានខេត្តសៀមរាបបញ្ជូនមកកាន់តុលាការខេត្តសៀមរាបនាថ្ងៃទី២៦ ខែមករា នេះដើម្បីចាត់ការបន្តតាមនីតិវិធី ៕
ចែករំលែកព័តមាននេះ