រាជធានីភ្នំពេញ ៖ កម្លាំងនគរបាលខណ្ឌទួលគោកដាក់គោលដៅដើម្បីត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍បានធ្វើការឃាត់ខ្លួនសង្ស័យ២នាក់ និងដកបានថ្នាំញៀនចំនួន២កញ្ចប់តូច រួមទាំងម៉ូតូមួយ
គ្រឿង។
ហេតុការណ៍ខាងលើនេះបានកើតឡើងកាលពីវេលាម៉ោង១០និង១០នាទីយប់ថ្ងៃទី១៨ ខែធ្នូ ឆ្នាំ២០១៨ស្ថិតនៅចំណុចខាងត្បូងស្តុបអាងទឹកអូឡាំពិកប្រមាណ១០០ម៉ែត្រ តាមបណ្តោយផ្លូវព្រះមុនីរ៉េត ស្ថិតក្នុងសង្កាត់ផ្សារដើមគ ខណ្ឌទួលគោក ។
ជនសង្ស័យទាំង២នាក់ខាងលើ ម្នាក់ឈ្មោះ ប៊ុន សុខជា ភេទប្រុស អាយុ២០ឆ្នាំ ជាមន្ត្រីយោធាថ្នាក់ព្រិន្ទបាលទោនៅបញ្ជាការដ្ឋានអង្គរក្ស ស្នាក់នៅក្នុងក្រុងតាខ្មៅ ខេត្តកណ្ដាល និងម្នាក់ទៀតឈ្មោះ ទី ឡា ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះក្បែរគ្នា។
តាមប្រភពព័ត៌មានពីកម្លាំងសមត្ថកិច្ចបានប្រាប់ឲ្យដឹងថា កម្លាំងរបស់ពួកគាត់បានធ្វើការដាក់គោលដៅត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍នៅត្រង់ចំណុចកើតហេតុខាងលើ ក៏ស្រាប់តែលេចមុខជនសង្ស័យទាំង២នាក់ខាងលើជិះម៉ូតូមួយគ្រឿងម៉ាកហុងដាប៊ីត ពណ៌ក្រហមលាយស ធ្វើដំណើរតាមបណ្តោយផ្លូវព្រះមុន្នីរ៉េត ក្នុងទិសដៅពីជើងទៅត្បូង។
លុះមកដល់ចំណុចគោលដៅខាងលើ ពេលដែលជនសង្ស័យឃើញកម្លាំងសមត្ថកិច្ចកំពុងដាក់គោលដៅត្រួតពិនិត្យ ភ្លាមនោះជនសង្ស័យឈ្មោះប៊ុន សុខជា ក៏បានបោះថ្នាំញៀនប្រភេទក្រាមសថ្លាមួយកញ្ចប់តូចដែលកាន់នឹងដៃចោលទៅនឹងដី ហើយព្យាយាមជិះម៉ូតូបត់ត្រឡប់ក្រោយទាំងបញ្ច្រាសទិសដៅចរាចរណ៍ ប៉ុន្តែក៏ត្រូវបានកម្លាំងសមត្ថកិច្ចដែលកំពុងពួនស្ទាក់ចាប់ឃាត់បានភា្លមៗតែម្តង ។
បន្ទាប់មកកម្លាំងសមត្ថកិច្ចធ្វើការឆែកឆេរនៅលើខ្លួនជនសង្ស័យទាំងពីរនាក់ ស្រាប់តែប្រទះឃើញថ្នាំញៀនប្រភេទក្រាមសថ្លានៅលើខ្លួនជនសង្ស័យឈ្មោះប៊ុន សុខជាចំនួនមួយកញ្ចប់តូចបន្ថែមទៀតផង។
បច្ចុប្បន្នសង្ស័យទាំងពីរនាក់ រួមនិងវត្ថុតាងត្រូវបានកម្លាំងនគរបានបញ្ជូនខ្លួនមកសួរនាំនៅអធិការដ្ឋាននគរបាលខណ្ឌទួលគោកដើម្បីកសាងសំណុំរឿងបញ្ជូនទៅតុលាការរង់ចាំចាត់ការទៅតាមនីតិវិធី ៕
ចែករំលែកព័តមាននេះ