រាជធានីភ្នំពេញ ៖ ការស្រឡាញ់ភេទដូចគ្នាមិនមែនកើតឡើងគ្រាន់តែតាមអារម្មណ៍ ឬ ការធ្វើតាមគ្នា ឬតាមការបន្តុះបង្អាប់លើកដាក់គ្នានោះទេ គឺការស្រឡាញ់ភេទដូចគ្នាកើតឡើង ដោយបេះដូងពីធម្មជាតិ ។
កញ្ញា លី ពិសី អ្នកសម្របសម្រួលសមាគមឥន្ទធនូកម្ពុជាបានលើកឡើងថា ការស្រឡាញ់ ភេទដូចគ្នានៅកម្ពុជាមានភាពល្អឡើងបន្ទាប់ពីប្រទេសក្នុងចំណោមបណ្តាប្រទេសជាសមាជិកអាស៊ាន បន្ទាប់ពីប្រទេសថៃ ប៉ុន្តែតែមានការរើសអើង ។
ក្នុងបទសម្ភាសន៍កាលពីពេល ថ្មីៗកន្លងមកកញ្ញាលី ពិសី បានលើកឡើងថា ការស្រឡាញ់ភេទដូចគ្នា នៅប្រទេសកម្ពុជានៅមានភាពរើសអើង ខណៈប្រទេសថៃការស្រឡាញ់ភេទដូចគ្នាកើតឡើងមុនកម្ពុជា ហើយក៏មានការរើសអើងផងដែរ ។ ចំណែកប្រទេសអាស៊ានមួយចំនួនទៀតមានភាពយ៉ាប់ជាងកម្ពុជា ដែលក្នុងនោះពាក់ព័ន្ធនឹងសាសនា និងមួយចំនួនទៀតទាក់ទង និងវប្បធម៌ប្រពៃណី ។
កញ្ញាលី ពិសី និយាយថា «ទាំងវប្បធម៌ប្រពៃណី សង្គម សាសនានៅកម្ពុជា មានការផ្តល់មេត្តាធម៌ច្រើនតាមរយៈការងារយើង ។ ក្នុងនោះក៏មានបរិយាកាសផ្នែកនយោបាយផងដែរ។ ថ្នាក់ដឹកនាំប្រទេសបានគាំទ្រសមាគមឥន្ទធនូខ្លាំង ដោយជាសាធារណៈថែមទៀត ដោយកុំឲ្យមានការរើសអើង ឬប្រកាន់អ្នកស្រឡាញ់ភេទដូចគ្នាផងដែរ »។
តាមការស្រាវជ្រាវនៅក្នុងអំឡុងឆ្នាំ២០១៥ ក្នុងចំណោមប្រជាជនជាង១.០០០នាក់បានគាំទ្រចំនួនពាក់កណ្តាល និងពាក់កណ្តាលទៀតមិនបានគាំទ្រនោះទេ ។ អ្នកដែលមិនបានគាំទ្រនោះបានលើកឡើងពីកក្តាតំណពូជ(ដាច់ពូជ) ការអាប់ឱនដល់គ្រួសារ ។
ប្រភពដដែលបញ្ជាក់ថា៖«បើនិយាយពីការស្អប់ស្ពើមមិនមែនទេ តែគាត់បារម្ភពីការដាច់ពូជដែលទាក់ទង់នឹងប្រពៃណីច្រើនជាង ។ និយាយការប្រឡាញ់ភេទដូចគ្នានៅក្នុងប្រទេស កម្ពុជាមានភាពអំណោយទានច្រើនក្នុងការរស់នៅជាមួយអ្នកដទៃបាន ថ្វីដ្បិតតែនៅមាន ការរើសអើងមួយចំនួនក៏ដោយ ។
យើងចង់បង្កើតក្រុមគ្រួសារពេញមុខពេញមាត់ ដូចអ្នកដែលមានភេទផ្ទុយគ្នា។ ទោះបីជាមានយើងគ្មានច្បាប់អនុញ្ញាតអាពាហ៍ពិពាហ៍ (អេតាស៊ីវិល) ក៏ដោយ ប៉ុន្តែយើងអាចរៀបកម្មវិធីបាន ។ យើងចង់រស់នៅក្នុងសង្គម ក្នុងភូមិដែលពេញមុខពេញមាត់ថាយើងគឺគ្រួសារដែលមានប្តី ប្រពន្ធ ដូចគេដូចឯងដែរ យ៉ាងយោចណាស់ធ្វើតាមប្រពៃណី ។ កុំឲ្យថារស់នៅទៅលឹបល មិនពេញលេញដូចគេ។ អីុចឹងគឺគោលបំណងសំខាន់អ្នកស្រឡាញ់ភេទដូចគ្នា »។
កញ្ញាលី ពិសី ឲ្យដឹងថាចំពោះការស្រឡាញ់ភេទដូចគ្នានៅក្នុងប្រទេសកម្ពុជា មិន ទាន់មានតួលេខណាមួយបញ្ជាក់ចំនួនច្បាស់លាស់នោះទេ ប៉ុន្តែបើតាមសមាគមឥន្ទធនូកម្ពុជារបស់កញ្ញាដែលបានចង់ក្រង២៥ ខេត្តក្រុងមានអ្នកស្រឡាញ់ភេទដូចគ្នាប្រមាណ២ពាន់នាក់(រាប់ទាំងដៃគូ) ។
ភាគីច្រើននៃអ្នកដែលស្រឡាញ់ភេទដូចគ្នានោះដែរ គឺអ្នកប្តូរយ៉េនឌ័រ (តែងខ្លួន) ពីស្ត្រីទៅបុរស និងពីបុរសទៅស្ត្រី ។ ចំណែកស្ត្រីស្រឡាញ់ស្ត្រីមិនសូវមានទេ ។
កញ្ញាលី ពិសី ដែលស្រឡាញ់ភេទដូចគ្នាបានអះអាងថាស្រីស្រឡាញ់ស្រីដូចគ្នា ច្រើនតែមិនហ៊ានចេញ ឬបង្ហាញទៅក្រុមគ្រួសារ និងសង្គមជាតិទេ ។ សម្រាប់នាងផ្ទាល់មិនបានព្រួយបារម្ភចំពោះអ្នកតពូជនោះទេ ព្រោះនាងបានឲ្យតម្លៃទៅលើក្តីស្រឡាញ់ ហើយដៃគូក៏បានជជែកគ្នាថាមិនចង់មានកូនផ្ទាល់ទេ ។
«យើងមិនបានព្រួយបារម្ភចំពោះការដាក់ពូជទេ ផ្ទុយទៅវិញ យើងយកក្តីស្រឡាញ់ទៅជួយអ្នកក្រីក្រ ។ បើខ្ញុំចង់បានកូនមែនខ្ញុំអាច់ដាក់ពាក្យសុំកូនចិញ្ចឹមក៏បាន »។
កញ្ញាលី ពិសី មិនលើកទឹកចិត្តឲ្យមានការស្រឡាញ់ភេទដូចគ្នានៅកម្ពុជាច្រើនទេ ប៉ុន្តែចង់ឲ្យអ្នកស្រឡាញ់ភេទដូចគ្នាទាំងអស់ត្រូវមានជំនឿលើខ្លួនឯង និងសុំឲ្យមហាជនកុំរើសអើង ចំពោះអ្នកស្រឡាញ់ភេទដូចគ្នា ។ ជាងនេះសុំឲ្យអ្នកស្រឡាញ់ភេទដូចគ្នាហ៊ានចេញមុខនិយាយជាចំហ ។
«យើងជឿថាយើងមិនអាចបង្ខំអ្នកណាដែលមិនមែនជាខ្លួនគេ ធ្វើជាគេបានទេ ។ ការស្រឡាញ់ភេទដូចគ្នាមិនមែនកើតដោយសារអារម្មណ៍ និងកក្តាបន្តុះបង្អាប់នោះទេ ។ ការស្រឡាញ់ដូចគ្នាគឺកត្តាធម្មជាតិ មានន័យថាគឺដុះចេញពីក្នុងខ្លួនឯងតែម្តង ។
យើងមិនអាចយកចំនួនតួលេខអ្នកដែលស្រឡាញ់ភេទដូចគ្នាតាមរយៈការបង្អាប់គ្នាមួយករណី ឬពីរករណីមកបូកធ្វើសេចក្តីសន្និដ្ឋានរួមនោះទេ ។ ខ្ញុំមិនអាចនិយាយថាមិនមែនទេ គឺមាន ។ ប៉ុន្តែទឡ្ហីករណ៍ដែលតំណាងឲ្យយើងអ្នកស្រឡាញ់ភេទដូចគ្នាបានទេ គឺស្រឡាញ់ភេទដូចគ្នាមានសេចក្តីស្រឡាញ់ដូួចគ្នាដែលស្រឡាញ់ភេទផ្ទុយគ្នា »។
យោងតាមរបាយការណ៍របស់អង្គការអនាគតកម្ពុជា-អាស៊ាន លើកស្ទួយសិទ្ធិអ្នក ស្រឡាញ់ភេទដូចគ្នា កាលពីពេលកន្លងមកបានបង្ហាញថាក្នុងរយៈពេល១០ឆ្នាំ ចុងក្រោយនេះកំណើនរបស់អ្នកស្រឡាញ់ភេទដូចគ្នាកើនដល់ជាង៦ពាន់គូដែលពួកគេភាគច្រើនរងការរើសអើងយ៉ាងខ្លាំងពីសាច់ញាតិ និងអ្នកនៅជុំវិញខ្លួន ។
របាយការណ៍សមាគមឥន្ទធនូកម្ពុជាបានចេញផ្សាយថាអ្នកស្រឡាញ់ភេទដូចគ្នា៣៣%បានលើកឡើងថា អ្នកស្រឡាញ់ភេទដូចគ្នាចំនួន៨២% បានទទួលរងការរើសអើងពីក្រុមគ្រួសារ សហគមន៍ និងប្រជាជនទូទៅ២៩% មិនហ៊ានចេញទៅខាងក្រៅដោយសារតែភ័យខ្លាចនៃការរើសអើងការវិនិច្ឆ័យ ការសម្លុត និងការយាយី ផ្សេងៗ។
ចំណែកអ្នកប្តូរភេទជាស្ត្រីរងការរើសអើង កម្រិតខ្ពស់ ក្នុងនោះ៣៩%រងការរំលោភបំពានខាងផ្លូវភេទ ២៤%រងនូវការរើសអើង ផ្នែកការងារ ២៤%ត្រូវបានគេបដិសេធ ឬ បណ្តេញចេញពីលំនៅឋាន និង២៤%ទៀតរង នូវការបំពានលើរូបរាងកាយ ៕
ចែករំលែកព័តមាននេះ