មិនដឹងផ្តើមចេញពីរឿងអ្វី…ជាងមាស២ក្រុមវាយតប់គ្នាផ្អើលពេញមុខហាង
- ភ្នំពេញ
រាជធានីភ្នំពេញ ៖ បុរស២ក្រុមមានគ្នាចំនួន៦ទៅ៧នាក់ជាជាងមាស បានចូលទៅផឹកស៊ីច្រៀងខារ៉ាអូខេក្នុងភោជនីយដ្ឋានម្ហូបខ្មែរគាប់ចិត្ត នៅម្តុំផ្សារសាំហាន់ សង្ស័យទាស់ពាក្យសំដីគ្នារហូតឈានទៅដល់ការវាយតប់គ្នាផ្អើលពេញខាងមុខហាង បណ្តាលឱ្យមានអ្នករងរបួស ហើយត្រូវបានសមត្ថកិច្ចធ្វើការឃាត់ខ្លួនយកទៅសួរនាំនៅប៉ុស្តិ៍ទួលសង្កែទី១ ។ ហេតុការណ៍នេះបានកើតឡើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៨…
ហេតុការណ៍នេះបានកើតឡើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៨ ខែធ្នូ ឆ្នាំ២០១៨ តាមបណ្តោយផ្លូវផ្សារសាំហាន់ នៅចំណុចភោជនីយដ្ឋានម្ហូបខ្មែរគាប់ចិត្ត ស្ថិតនៅក្នុងសង្កាត់ទួលសង្កែទី១ ខណ្ឌឬស្សីកែវ ។
តាមប្រភពព័ត៌មានពីសមត្ថកិច្ចបានអោយដឹងថា មុនពេលកើតហេតុ ភាគីទាំងសងខាងសរុបទាំងអស់មានគ្នាពី៦ទៅ៧នាក់ សុទ្ធតែជាមិត្តភក្តិដែលរកស៊ីធ្វើជាងមាសជាមួយគ្នា ហើយពួកគេទាំងអស់នោះបានចូលទៅផឹកស៊ីច្រៀងខារ៉ាអូខេនៅក្នុងបន្ទប់ខារ៉ាអូខេយីហោឈ្មោះម្ហូបខ្មែរគាប់ចិត្ត លុះពេលដែលផឹកស៊ីនឹងច្រៀងរួចរាល់ហើយក៏គិតលុយ ។
ប្រភពដដែលបានបន្តថា ប៉ុន្តែគេមិនដឹងថាភាគីទាំងសងខាងនេះទាស់ពាក្យសំដីគ្នា ឬមួយឌឺដងគ្នារឿងអ្វីនោះទេ បានជាយកកែវចានគប់ និងវាយគ្នានៅក្នុងបន្ទប់ខារ៉ាអូខេរហូតឈានទៅដល់របួសរៀងៗខ្លួន ហើយត្រូវបានសន្តិសុខហាមឃាត់មិនអោយឈ្លោះប្រកែកគ្នា ។
លុះពេលសន្តិសុខឃាត់អោយចេញទៅក្រៅរួចហើយ ភាគីទាំងសងខាងបាននាំគ្នាវាយគ្នាម្តងទៀតនៅខាងក្រៅហាងបង្កអោយផ្អើលទៅដល់សមត្ថកិច្ចខណ្ឌឫស្សីកែវចុះមកអន្តរាគមន៍ឃាត់យកទៅសួរនាំនៅប៉ុស្តិ៍ទួលសង្កែ១ ។
សមត្ថកិច្ចមិនទាន់ដឹងថា ខាងណាជាជនបង្ក ខាងណាជាជនរងគ្រោះនោះទេ ប៉ុន្តែឃាត់ខ្លួនបានតែបុរស៥នាក់តែប៉ុណ្ណោះ ក្នុងនោះភាគីម្ខាងរងរបួសបែកក្បាល២នាក់ និងភាគីម្ខាងទៀតរងរបួសបែកភ្នែក៣នាក់ ។
ចែករំលែកព័តមាននេះ