រាជធានីភ្នំពេញ ៖ សម្រាស់បោះនុយចាប់ត្រីខុសច្បាប់មួយកន្លែង នៅក្នុងភូមិដើមគ សង្កាត់ជ្រោយចង្វា ខណ្ឌជ្រោយចង្វា បានត្រូវមន្ត្រីខណ្ឌរដ្ឋបាលជលផលភ្នំពេញ ចុះទៅរើចេញហើយ បន្ទាប់ពីបណ្តាញព័ត៌មានបានចុះផ្សាយពីសកម្មភាពបោះសម្រាស់ខុសច្បាប់គ្មានអ្នកបង្ក្រាប ។…
រាជធានីភ្នំពេញ ៖ សម្រាស់បោះនុយចាប់ត្រីខុសច្បាប់មួយកន្លែង នៅក្នុងភូមិដើមគ សង្កាត់ជ្រោយចង្វា ខណ្ឌជ្រោយចង្វា បានត្រូវមន្ត្រីខណ្ឌរដ្ឋបាលជលផលភ្នំពេញ ចុះទៅរើចេញហើយ បន្ទាប់ពីបណ្តាញព័ត៌មានបានចុះផ្សាយពីសកម្មភាពបោះសម្រាស់ខុសច្បាប់គ្មានអ្នកបង្ក្រាប ។
ព្រឹកថ្ងៃទី១៥ ខែធ្នូ មន្ត្រីខណ្ឌរដ្ឋបាលជលផលភ្នំពេញ បានជួលកម្មករចំនួន៧នាក់ ចុះទៅរើសម្រាស់នោះចេញ ។ អ្វីដែលមានការចាប់អារម្មណ៍នោះ គឺខណៈរើគេឃើញឈ្មោះធីដែលគេអះអាងថា ម្ចាស់សម្រាស់ដែលស្និទ្ធនឹងមន្ត្រីជលផលនោះ ចេញមកសម្របសម្រួលធ្វើយ៉ាងណា ដើម្បីឲ្យសម្រាស់នោះទុកនៅដដែល ។ ទន្ទឹមនឹងនោះ ភ្នាក់ងារកោះសន្តិភាពដែលចុះទៅផ្តិតយករូបភាពក៏ត្រូវបុរសម្នាក់ដែលគេអះអាងថាឈ្មោះធីនេះ ឲ្យទូរស័ព្ទថាមានគេចង់ជួប ដោយប្រាប់ថាបើរើទាំងអស់ នៅមានសម្រាស់ជាច្រើនទៀតកុំ
ឱ្យខ្លះរើ ខ្លះមិនរើ ។
តាមមន្ត្រីខណ្ឌរដ្ឋបាលជលផល ដែលចុះទៅរើសម្រាស់នេះបានឲ្យដឹងថា កន្លងមកខណ្ឌរដ្ឋបាលជលផលភ្នំពេញមានការលំបាកក្នុងការបង្ក្រាបបទល្មើសនេសាទ ដោយសារតែអ្នករកស៊ីល្មើសច្បាប់សុទ្ធតែមានអន្តរគមន៍ ។ មន្ត្រីរូបនេះបានត្អួញត្អែរទៀតថា ដូចជាសម្រាស់នៅទន្លេសាប ត្រង់អតីតក្រុមហ៊ុនបូមខ្សាច់ម៉ាកវែល ក្នុងសង្កាត់ឫស្សីកែវ ខណ្ឌឫស្សីកែវ ជាសម្រាស់របស់មន្ត្រីអាវុធហត្ថ គ្រាន់តែចូលក្បែរមិនឲ្យចូលផង ។
មន្ត្រីរូបនេះនិយាយថា នៅក្នុងការរើសម្រាស់នេះ យើងមានការលំបាកដោយសារតែពុំមានឧបករណ៍គ្រាប់គ្រាន់ ។ នៅព្រឹកថ្ងៃនោះ គេឃើញមន្ត្រីជលផលបានជួលទូកនិងកម្មករមករើសម្រាស់ហើយការរើអស់រយៈពេលមួយព្រឹកទៅហើយ បានសម្រាស់តែប្រមាណមួយទូកប៉ុណ្ណោះទំនងរើកន្លះខែទៀត មិនអស់ផង ដែលគេដាក់ត្រឹមតែ៣-៤ថ្ងៃ ។
លោក ងិន ឌី នាយខណ្ឌរដ្ឋបាលជលផលភ្នំពេញ បានឲ្យដឹងថា ក្រៅពីសម្រាស់ដែលកំពុងរើនោះ នៅមានសម្រាស់ធំៗមួយចំនួនទៀតដូចជា របស់កងរាជអាវុធហត្ថ នៅក្នុងសង្កាត់ឫស្សីកែវ និងរបស់កងម៉ារីននៅទន្លេមេគង្គក្រោយមូលដ្ឋានទាហានជើងទឹក លោកនឹងបន្តចុះរើចេញជាបន្តបន្ទាប់ទៀត ។
ដោយឡែក លោក សៀង បូរិន ប្រធានមន្ទីរកសិកម្ម រុក្ខាប្រមាញ់ និងនេសាទ រាជធានីភ្នំពេញ បានឲ្យដឹងថា ការដាក់សម្រាស់ជាបទល្មើសនេសាទ ដែលកន្លងមកសមត្ថកិច្ចជំនាញតែងតែចុះបង្ក្រាបជារៀងរាល់ឆ្នាំ ។ អ្នកដាក់សម្រាស់់ភាគច្រើនជាកងកម្លាំងប្រដាប់អាវុធហើយមន្ត្រីជំនាញមានការលំបាកនិងទើសទាល់យ៉ាងខ្លាំង ទោះបីជាយ៉ាងណា លោកនឹងចុះបង្ក្រាបជាបន្តបន្ទាប់ ។
គួរបញ្ជាក់ថា សម្រាស់នេះត្រូវបានគេចាប់ផ្តើមបោះចូលក្នុងទន្លេសាបកាលពីថ្មីៗនេះ ហើយនៅថ្ងៃទី១២ ខែធ្នូ អ្នកយកព័ត៌មានកោះសន្តិភាពបានទៅថតផ្សាយ ទើបឃើញមានការចុះបង្ក្រាបរើចេញ ។ ការដាក់សម្រាស់ចាប់ត្រីខុសច្បាប់នោះ ត្រូវបានគេលួចបង្ហើបឲ្យដឹងថា មានការឃុបឃិតគ្នារវាងមន្ត្រីរដ្ឋបាលជលផលគ្រប់គ្រងទីនោះនិងសមត្ថកិច្ចមួយចំនួន និងមានអ្នករត់ការតាំងពីសង្កាត់រដ្ឋបាលជលផលច្រាំងចំរេះ ផ្នែក និងខណ្ឌ រដ្ឋបាលជលផលភ្នំពេញ ។
តាមព័ត៌មានឲ្យដឹងថា សម្រាស់នីមួយៗមានទទឹងជាង៥០ម៉ែត្រ និងបណ្តោយតាមដងទន្លេ ជាង១០០ម៉ែត្រ និងខ្លះទៀតលើសពីនេះ ។ អ្នករកស៊ីដាក់សម្រាស់ចាប់ត្រីខុសច្បាប់នេះ ត្រូវគេដឹងថា ម្ចាស់ឈ្មោះកូប និងឈ្មោះយ៉ា ដែលជាខ្មែរអ៊ិស្លាម មានជំនាញមុជទឹកនិងមានគេដេកចាំ បោះនុយអប់ ស្បែកគោ និងយាមជាប្រចាំដើម្បីការពារការលួចឆក់ក្នុងសម្រាស់ ៕
ចែករំលែកព័តមាននេះ