រាជធានីភ្នំពេញ ៖ អ៊ិន ធី ស៊ីគ្រុប គឺជាស្ថាប័នអប់រំឯកជនមួយដែលមានឧបសម្ព័ន្ធរួមមាន៖ សាលារៀនសុវណ្ណភូមិ សាលារៀនប្រ៊ីជតុន សាលាអាមេរិកាំងប៉ាស៊ីហ្វិច សាលាអន្តរជាតិចិន-អាមេរិកាំង សាលាញូវតុនធីឡាយ សាលាអន្តរជាតិអិុសវ៉េស និងមជ្ឈមណ្ឌលបណ្តុះបណ្តាលសុវណ្ណភូមិ នាព្រឹកថ្ងៃទី១៩ ខែមិថុនា ឆ្នាំ២០១៣ បានប្រារព្ធពិធីបើកការប្រឡងសិល្បៈប្រចាំឆ្នាំ២០១២-២០១៣ ក្រោមការអញ្ជើញចូលរួមពីលោក ឃឹម ផុន នាយកប្រតិបត្តិនៃអ៊ិន ធី ស៊ីគ្រុប, ថ្នាក់ដឹកនាំ និងបុគ្គលិកគ្រប់លំដាប់ថ្នាក់នៃ អិុន ធី ស៊ីគ្រុប, គណៈគ្រប់គ្រងសាលារៀនសុវណ្ណភូមិ សាលារៀនប្រ៊ីជតុន សាលាញូវតុនធីឡាយ លោកគ្រូ-អ្នកគ្រូ មាតាបិតា អាណាព្យាបាលសិស្ស និងសិស្សានុសិស្សទូទាំងរាជធានីខេត្ត ។
ក្នុងរបាយការណ៍របស់ប្រធានគណៈកម្មការរៀបចំការប្រឡងរបស់អិុន ធី ស៊ីគ្រុប បានថ្លែងនាឱកាសនោះថា អិុន ធី ស៊ីគ្រុប បានរៀបចំឲ្យមានការប្រឡងនេះឡើងក្នុងគោលបំណងផ្សព្វផ្សាយ និងលើកស្ទួយវិស័យសិល្បៈ វប្បធម៌ខ្មែរដល់ក្មួយៗសិស្សានុសិស្សដែលជាទំពាំងស្នងឫស្សីឲ្យមានការយល់ដឹងពីសារប្រយោជន៍ និងការចូលរួមចំណែកនៅក្នុងការថែរក្សាសម្បត្តិវប្បធម៌ជាតិឲ្យបានគង់វង្សជារៀងដរាបរៀងទៅ ស្របតាមគោលនយោបាយវប្បធម៌របស់រាជរដ្ឋាភិបាលពោលគឺ «អភិរក្សដើម្បីអភិវឌ្ឍ និងអភិវឌ្ឍលើមូលដ្ឋានអភិរក្សប្រកបដោយនិរន្តរភាព» សំដៅអភិរក្សអត្តសញ្ញាណជាតិ និងប្រែក្លាយវិស័យវប្បធម៌ទៅជាកត្តារួមចំណែកជំរុញកំណើនសេដ្ឋកិច្ចជាតិ ។
ក្នុងឆ្នាំនេះ ការចូលរួមប្រកួតរបស់សិស្ស និងវិញ្ញាសាប្រឡងមានការកើនឡើង ដែលក្នុងនោះរួមមាន ៖
១.ចំនួនសិល្បករ សិល្បការិនី មកពីសាលាញូវតុនធីឡាយប្រតិបត្តិការភ្នំពេញមាន១៥៤នាក់
២.ចំនួនសិល្បករ សិល្បការិនី មកពីសាលាញូវតុនធីឡាយប្រតិបត្តិការខេត្តមាន៣៤នាក់
៣.ចំនួនសិល្បករ សិល្បការិនី មកពីសាលារៀនសុវណ្ណភូមិ(ខេត្ត) មាន៣២នាក់
៤.ចំនួនសិល្បករ សិល្បការិនី មកពីសាលារៀនសុវណ្ណភូមិ(ភ្នំពេញ) មាន២៨៥នាក់
៥.ចំនួនសិល្បករ សិល្បការិនី មកពីសាលារៀនប្រ៊ីជតុនមាន៤៧នាក់
- សរុបចំនួនសិល្បករ សិល្បការិនីទាំងអស់មាន៥៥២នាក់
- សរុបវិញ្ញាសាទាំងអស់មាន១២៧វិញ្ញាសា
វិញ្ញាសាដែលត្រូវប្រឡងឆ្នាំនេះរួមមាន៖
- ចំនួនវិញ្ញាសារបាំមាន៤របាំ
១. របាំបុប្ផាលោកីយ៍
២. របាំច្រូតស្រូវ
៣. របាំផ្លិត
៤. របាំគែន
- វិញ្ញាសាសម្តែងរឿងមាន១វិញ្ញាសា
១. ល្ខោននិយាយ
- វិញ្ញាសាបង្ហាញម៉ូតមាន២វិញ្ញាសា
១. បង្ហាញម៉ូតបុរាណ
២. បង្ហាញម៉ូតសម័យ
– វិញ្ញាសាចម្រៀង
១. ចម្រៀងទោល
២. ចម្រៀងកាយវិការភាសាអង់គ្លេស
– វិញ្ញាសាកំណាព្យមាន១វិញ្ញាសា
ក្នុងឆ្នាំនេះវិញ្ញាសាប្រឡងមានការកើនឡើងចំនួន១១វិញ្ញាសា លើសកាលពីឆ្នាំមុន ទាំងនេះដោយសារមានការចូលរួមពីថ្នាក់ដឹកនាំ មាតា-បិតា អាណាព្យាបាលសិស្ស និងសិស្សានុសិស្សទាំងអស់ ។ លោក ឃឹម ផុន នាយកប្រតិបត្តិនៃអិុន ធី ស៊ីគ្រុប បានមានប្រសាសន៍នាឱកាសនោះថា តាមរយៈរបាយការណ៍របស់គណៈកម្មការនៃការប្រឡងនេះស្តែងចេញឲ្យឃើញនូវការខិតខំប្រឹងប្រែងរបស់ថ្នាក់ដឹកនាំគ្រប់លំដាប់ថ្នាក់ ដោយមានការចូលរួមពីសំណាក់លោកគ្រូ-អ្នកគ្រូ មាតា-បិតា អាណាព្យាបាលសិស្ស និងសិស្សានុសិស្សទាំងអស់ ។
ព្រឹត្តិការណ៍នៃការប្រឡងសិល្បៈបែបនេះគឺមានរយៈពេល១១ឆ្នាំហើយ ដែលអិុន ធី ស៊ីគ្រុប បានរៀបចំការប្រឡង ដោយមានការចូលរួមពីសំណាក់សិស្សមត្តេយ្យ របស់អិុន ធី ស៊ីគ្រុប គ្រប់សេវាកម្មខេត្ត-ក្រុង ក្នុងគោលបំណងផ្សព្វផ្សាយ និងលើកស្ទួយវិស័យសិល្បៈវប្បធម៌ខ្មែរដល់ក្មួយៗសិស្សានុសិស្សដែលទំពាំងស្នងឫស្សី ឲ្យមានការយល់ដឹងពីសារប្រយោជន៍ និងការចូលរួមចំណែកនៅក្នុងការថែរក្សាសម្បត្តិវប្បធម៌ជាតិឲ្យបានគង់វង្សជារៀងដរាបរៀងទៅ ស្របតាមគោលនយោបាយវប្បធម៌របស់រាជរដ្ឋាភិបាលពោលគឺ«អភិរក្សដើម្បី អភិវឌ្ឍ និងអភិវឌ្ឍលើមូលដ្ឋានអភិរក្សប្រកប ដោយនិរន្តរភាព» សំដៅអភិរក្សអត្តសញ្ញាណជាតិ និងប្រែក្លាយវិស័យវប្បធម៌ ទៅជាកត្តារួមចំណែកជំរុញកំណើនសេដ្ឋកិច្ចជាតិ និងរក្សាបាននូវនិរន្តរភាពវប្បធម៌ ពោលគឺ«យើងទាំងអស់គ្នាដើម្បីការការពារវប្បធម៌ជាតិ ហើយវប្បធម៌ ជាតិដើម្បីយើងទាំងអស់គ្នា ៕
ចែករំលែកព័តមាននេះ