ខេត្តឧត្តរមានជ័យ ៖ បើតាមសេចក្តីរាយការណ៍បឋមឲ្យដឹងថា បុរសម្នាក់បានព្យាយាមអត្តឃាត៣ដងហើយ តែពុំបានសម្រេច ស្រាប់តែលើកចុងក្រោយនេះចង.កសម្លាប់ខ្លួននៅលើដើមអំពិល ខណៈប្រពន្ធមិននៅ ករណីនេះកើតឡើងកាលពីម៉ោង៤និង៣០នាទី ថ្ងៃ២១ ខែវិច្ឆិកា ឆ្នាំ២០១៨ ស្ថិតនៅភូមិទួលតាសេក ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ។
ជនរងគ្រោះខាងលើឈ្មោះ សៅ ញូញ ភេទប្រុស អាយុ៥៨ឆ្នាំ ប្រពន្ធឈ្មោះ ហោ ម៉ាច អាយុ៥៧ឆ្នាំ មានកូនចំនួន៩នាក់ ក្នុងនោះស្រី៥នាក់ ។
តាមការបំភ្លឺពីកូនស្រីរបស់ជនរងគ្រោះឈ្មោះ សៅ សូ និងអ្នកជិតខាងឈ្មោះ ង៉ែត ឌឿន ភេទប្រុស បានឲ្យសមត្ថកិច្ចដឹងថា ជនរងគ្រោះជាមនុស្សមានជំងឺប្រចាំកាយរយ:ពេល៤ទៅ៥ឆ្នាំមកហើយ ។ ហើយកាលពីដើមខែវិច្ឆិកា ជនរងគ្រោះមានបំណងសម្លាប់ខ្លួន៣ដងដែរ តែត្រូវប្រពន្ធឃើញទាន់ ក៏ឃាត់បានជោគជ័យគ្រប់ពេលវេលា ។
ប្រភពខាងលើបន្តទៀតថា ស្រាប់តែជនរងគ្រោះសម្រេចចិត្តចង.កសម្លាប់ខ្លួនលើកចុងក្រោយនេះនៅលើដើមអំពិល ស្របពេលប្រពន្ធមិននៅផ្ទះ ហើយមូលហេតុមានតែមួយគត់ គឺជនរងគ្រោះតូចចិត្តដោយសារមានជំងឺប្រចាំកាយដែលមើលពុំជា ។
ក្រោយពេលកើតមានករណីធ្វើអត្តឃាតខាងលើនោះ កម្លាំងសមត្ថកិច្ចមូលដ្ឋានបានទៅដល់ និងបានរាយការណ៍កម្លាំងជំនាញមាននគរបាលបច្ចេកទេលចុះទៅពិនិត្យសាកសព ដោយបានធ្វើការសន្និដា្ឋនដូចគ្នាទៅនឹងសាក្សី គឺជាការធ្វើអត្តឃាត ដោយសារជំងឺប្រចាំកាយពិតមែន ។ បន្ទាប់ពីសមត្ថកិច្ចពិនិត្យរួចរាល់ ក៏ប្រគល់សពជនរងគ្រោះឱ្យក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ