ខេត្តកំពង់ធំ ៖ ក្មេងប្រុសម្នាក់ត្រូវរានទេវតាធ្លាក់សង្កត់លើស្លាប់យ៉ាងអាណោចអាធម្ម ហេតុការនេះបានបង្កឲ្យមានការភ្ញាក់ផ្អើលកាលពៅវេលាម៉ោង០៣និង៣០នាទីរសៀល ថ្ងៃទី១៥ ខែវិច្ឆិកា ឆ្នាំ២០១៨ នៅចំណុចមុខផ្ទះជនរងគ្រោះ ស្ថិតក្នុងភូមិបន្ទាយយមរាជ ឃុំប្រាសាទ ស្រុកសន្ទុក ខេត្តកំពង់ធំ ។
តាមប្រភពពីសមត្ថកិច្ចបានប្រាប់ថា កុមារារងគ្រោះឈ្មោះ ម៉ៅ គីម អាយុ៦ឆ្នាំ រៀនថ្នាក់ទី១ មានឪពុកឈ្មោះ ម៉ៅ ធារី អាយុ៣៦ឆ្នាំ និងម្តាយឈ្មោះ គង់ ធារិន អាយុ៣២ឆ្នាំ រស់នៅភូមិកើតហេតុ ។
បើតាមការបំភ្លឺពីម្តាយក្មេងរងគ្រោះអោយដឹងថា នៅមុនពេលកើតហេតុប្តីគាត់មិននៅទៅធ្វើការនៅឯកំពង់ថ្ម ចំណែករូបគាត់នៅផ្ទះជាមួយកូនៗ និងកំពុងតែរៀបចំរបស់របរលក់ដូរ ដោយមិនបានដឹងថា កូនទៅលេងក្បែររានទេវតានៅខាងត្បូងផ្ទះនោះទេ ស្រាប់តែឮសំលេងប្រាវ ។
ភ្លាមនោះគាត់ក៏ស្ទុះទៅមើលឃើញកូនត្រូវរានទេវតារលំសង្កត់លើបណ្តាលរបួសធ្ងន់ក៏បានតេទូរស័ព្ទហៅប្តី និងអ្នកជិតខាងមកជួយមើលឃើញកូនត្រូវរបួសក្បាលខ្លាំងក៏ដឹកយកកូនទៅសង្គ្រោះនៅមន្ទីរពេទ្យបង្អែកបារាយណ៍សន្ទុក ពេលដឹកទៅដល់គ្រូពេទ្យប្រាប់ថា សភាពរបួសធ្ងន់ធ្ងរណាស់ក៏រៀបចំដាក់ឡានយកទៅព្យាបាលឯភ្នំពេញ ពេលចេញដំណើរតាមផ្លូវអកុសលជីវិតត្រូវផុតកូនរបស់គាត់ក៏ផុតដង្ហើមតាមផ្លូវ ហើយក៏បានយកសពកូនមកផ្ទះវិញ ។
ក្រោយដឹងព័ត៌មានជំនាញនៃអធិការដ្ឋាននគរបាលស្រុកសន្ទុកបានសហការណ៍ជាមួយលោកនាយប៉ុស្តិ៍ប្រាសាទចុះដល់កន្លែងកើតហេតុសនិ្នដ្ឋានថា កុមាររងគ្រោះបានទៅតោងរានទេវតាលេងក៏រលំសង្កត់ចំក្បាលបណ្តាលរងរបួសធ្ងន់ធ្ងរ ដោយមូលហេតុរានទេវតានោះមិនបានផ្សារស៊ីម៉ងត៍ឲ្យជាប់ ក្រោយពិនិត្យចប់បានប្រគល់សាកសពជូនសាច់ញាតិយកធ្វើបុណ្យតាមប្រពៃណី ៕
ចែករំលែកព័តមាននេះ