ADផ្ទាំងផ្សព្វផ្សាយពាណិជ្ជកម្ម

Picture

ដំណាច់ត្រីមាស​ទី​3 ទុន​វិនិយោគ​កម្ពុជាមាន​ទឹកប្រាក់​ជិត5​ពាន់​លាន​ដុល្លារ

5 ឆ្នាំ មុន
  • ភ្នំពេញ

រាជធានី​ភ្នំពេញ ៖ ដំណាច់ត្រីមាស​ទី​៣​ឆ្នាំ​នេះ ទំហំ​ទុន​វិនិយោគ​នៅ​កម្ពុជា​សម្រេច​បាន​ទឹកប្រាក់​ជិត​៥​ពាន់​លាន​ដុល្លារ​អា​មេ​រិ​ក ដែល​គម្រោង​វិនិយោគ​ទាំងនោះ​បាន​បង្ហាញ​ថា អ្នក​វិនិយោគ​ចិន​នៅ​តែ​នាំមុខ​គេ​នៅ​កម្ពុជា ។ យោង​តាម​ទិន្នន័យ​ពី​ក្រុមប្រឹក្សា​អភិវឌ្ឍន៍​កម្ពុជា​(CDC) បានឱ្យ​ដឹង​នា​ព្រឹក​ថ្ងៃ​ទី​១៤ វិច្ឆិកា…

រាជធានី​ភ្នំពេញ ៖ ដំណាច់ត្រីមាស​ទី​៣​ឆ្នាំ​នេះ ទំហំ​ទុន​វិនិយោគ​នៅ​កម្ពុជា​សម្រេច​បាន​ទឹកប្រាក់​ជិត​៥​ពាន់​លាន​ដុល្លារ​អា​មេ​រិ​ក ដែល​គម្រោង​វិនិយោគ​ទាំងនោះ​បាន​បង្ហាញ​ថា អ្នក​វិនិយោគ​ចិន​នៅ​តែ​នាំមុខ​គេ​នៅ​កម្ពុជា ។

យោង​តាម​ទិន្នន័យ​ពី​ក្រុមប្រឹក្សា​អភិវឌ្ឍន៍​កម្ពុជា​(CDC) បានឱ្យ​ដឹង​នា​ព្រឹក​ថ្ងៃ​ទី​១៤ វិច្ឆិកា ម្សិលមិញ​ថា កម្ពុជា​ទទួល​បាន​គម្រោង​វិនិយោគ​សរុប​ចំនួន​១៧០​នៅ​ក្នុង​រយៈពេល​៩​ខែ​ដើមឆ្នាំ​២០១៨​នេះ ដែល​គិត​ជា​ទឹកប្រាក់​មាន​ចំនួន​ជាង​៤,៧​ពាន់​លាន​ដុល្លារ ។ ក្នុង​ចំណោម​​គម្រោង​វិនិយោគ​នោះ មាន​គម្រោង​ក្រៅ​តំបន់​សេដ្ឋកិច្ច​ពិសេស​ចំនួន​១១៤ ដែល​គិត​ជា​ទឹកប្រាក់​ចំនួន​៤​ពាន់​លាន​ដុល្លារ និង​គម្រោង​ក្នុង​តំបន់​សេដ្ឋកិច្ច​ពិសេស​មាន​ចំនួន​៥៦​គម្រោង ដែល​គិត​ជា​ទឹកប្រាក់​ចំនួន​ជិត​៧០០​លាន​ដុល្លារ ។

គម្រោង​នៃ​ការ​វិនិយោគ​ឆ្នាំ​នេះ មានការ​កើនឡើង​ចំនួន​២៨​គម្រោង ធៀប​រយៈពេល​ដូច​គ្នា​កាលពី​ឆ្នាំ​មុន​។ គម្រោង​វិនិយោគ​ទាំងនេះ​បាន​និង​កំពុង​បង្កើត​ការងារ​ចំនួន​ជិត​៣៦​ពាន់​កន្លែង​នៅ​កម្ពុជា​ផង​ដែរ ។ ក្នុង​ចំណោម​គម្រោង​វិនិយោគ​នេះ អ្នក​វិនិយោគ​ក្នុង​ស្រុក​​បាន​គ្របដណ្តប់​៣៥%​នៃ​ទុន​វិនិយោគ​សរុប ។

ទិន្នន័យ​ដដែល​បាន​ឲ្យ​ដឹង​ទៀត​ថា ក្នុង​ចំណោម​គម្រោង​វិនិយោគ​ឆ្នាំ​នេះ ការ​វិនិយោគ​លើ​គម្រោង​ឧស្សាហកម្ម និង​កម្មន្តសាល គឺជា​គម្រោង​ដែល​អ្នក​វិនិយោគ​ចាប់អារម្មណ៍​ច្រើន​ជាងគេ​ដែល​មាន​រហូត​ដល់​១៤៥​គម្រោង​, គម្រោង​វិនិយោគ​លើ​វិស័យ​កសិកម្ម និង​កសិឧស្សាហកម្ម​ចំនួន​១២​គម្រោង​និង​ហេដ្ឋារចនាសម្ព័ន្ធ និង​ទេសចរណ៍​មាន​ចំនួន​១៣​គម្រោង ។

របាយការណ៍​ដដែល​នេះ​បាន​បង្ហាញ​ឲ្យ​ដឹងផង​ដែរ​ថា ទោះជា​គម្រោង​វិនិយោគ​ឆ្នាំ​នេះ មាន​កំណើន​ចំនួន​២៨​គម្រោង ប៉ុន្តែ​ទំហំ​ទុន​វិនិយោគ​មានការ​ធ្លាក់​ចុះ​ជាង​១​ពាន់​លាន​ដុល្លារ ។

អ្វី​ដែល​គួរ​ឲ្យ​កត់សំគាល់ គឺ​ទិន្នន័យ​នេះ​បាន​បង្ហាញ​ថា ប្រទេស​ចិន​នៅ​តែ​ជា​ប្រទេស​នាំមុខ​គេ ដែល​បាន​វិនិយោគ​នៅ​កម្ពុជា ដោយ​អ្នក​វិនិយោគ​មក​ពី​ប្រទេស​នេះ​បាន​ក្តោប​ក្តាប់​ការ​វិនិយោគ​ចំនួន​ជាង​៦០% និង​តាម​ពីក្រោយ​ដោយ​អ្នក​វិនិយោគ​មក​ពី​ប្រទេស​ជប៉ុន ថៃ ម៉ា​ឡេ​ស៊ី និង​អង់គ្លេស​ជាដើម ៕

អត្ថបទសរសេរ ដោយ

កែសម្រួលដោយ