ខេត្តរតនគិរី ៖ ច្រកទ្វារអូរយ៉ាដាវក្រុមឈ្មួញសម្រុកដឹកឈើប្រណីតទៅលក់នៅប្រទេស វៀតណាម តាមរថយន្តស៊េរីទំនើបៗដូចជារថយន្តសាំយ៉ុង បាឡែន លុច្សស៊ី៣៣០ ស៊ីអរវី យ៉ាងគគ្រឹក គគ្រេងក្នុង១ថ្ងៃមិនក្រោមពី១០ទៅ២០គ្រឿងនោះទេ គ្មានសមត្ថកិច្ចណា ហ៊ានបង្ក្រាបទេ។ ជាក់ស្ដែងនៅរសៀលថ្ងៃទី១២-១៣ខែវិច្ឆិកា ឆ្នាំ២០១៨ សារព័ត៌មាន បានថតរូបភាពជាក់ស្តែង រថយន្តម៉ាកសាំយ៉ុងពណ៌ស ពាក់ស្លាកលេខ 1297 និងរថយន្ត សាំយ៉ុងពណ៌សមួយគ្រឿងទៀត ពាក់ស្លាកលេខ 8355 បានផ្ទុកឈើប្រណីតពេញរថយន្តតែម្តង នៅចំណុចផ្លូវជាតិលេខ៧៨ ស្រុកអូរយ៉ាដាវ ដែលប៉ុស្តិ៍សមត្ថកិច្ចគ្រប់ជាន់ថ្នាក់ ចាប់ពីក្រុងបានលុង ទៅមិនក្រោមជាង២០កន្លែង បើកផ្លូវតាមរយៈការបង់ប្រាក់ឲ្យឈ្មួញដឹកឈើ ចេញទៅលក់ប្រទេសវៀតណាមយ៉ាងរលូននោះ។ បើតាមប្រជាពលរដ្ឋរស់នៅក្បែរដងផ្លូវជាតិ៧៨ បានប្រាប់ឲ្យដឹងថា៖
រយៈពេលជាង២ថ្ងៃនេះ សកម្មភាពដឹកជញ្ជូនឈើប្រណីតខុសច្បាប់ តាមច្រកទ្វារអន្តរជាតិអូរយ៉ាដាវ ទាំងយប់ទាំងថ្ងៃយ៉ាងគគ្រឹកគគ្រេង និងម៉ូតូមិនក្រោមពី១០០គ្រឿង នោះទេ តាមច្រករបៀងក្រោយកាស៊ីណូឧកញ៉ាទ្រីភាព។ បើតាមការប៉ាន់ស្មានឈើដែលហូរទៅប្រទេសវៀតណាដោយខុសច្បាប់នោះក្នុង១យប់១ថ្ងៃមិនក្រោមពី៣០០-៤០០ម៉ែត្រគូបនោះឡើយ។ ប្រភពដែលពួកឈ្មួញទៅកាប់បំផ្លាញព្រៃឈើទី១-ស្រុកវ៉ើនសៃ (ឧទ្យានការពារសត្វទោច) ទី២-កាប់ចេញពីតំបន់ឧទ្យានជាតិអូរយ៉ាដាវ ទី៣-កាប់ចេញពីដែនជម្រកសត្វព្រៃលំផាត់ ហើយច្រកទាំង២ខាងលើមានថៅកែជនជាតិវៀតណាមជាច្រើនអ្នកចូលមករកទិញឈើតាមបណ្តាលស្រុក ហើយបានជួលឲ្យរថយន្តរបស់ខ្មែរ និងប្រគល់លុយឲ្យម្ចាស់រថយន្តនីមួយៗរត់ការសមត្ថកិច្ចគ្រប់ជាន់ថ្នាក់។
ក្នុងជំនួញឈើប្រណីតខុសច្បាប់ខាងលើនេះត្រូវបានសមត្ថកិច្ចលួចខ្សឹបប្រាប់សារព័ត៌មានថា ក្រុមរកស៊ីឈើទាំងអស់នៅក្នុងខេត្តមានចំនួន១៩ក្រុម ក្នុង១ក្រុមមានរថយន្តបាឡែន៥-៦គ្រឿង និងរថយន្តឡង់គ្រីស័រ៤-៥គ្រឿង និងរថយន្តសាំយ៉ុងម្នាក់៦៧គ្រឿង។ ពួកគាត់បានបន្តទៀតថាបើសិនជាសមត្ថកិច្ចជំនាញបង្ក្រាបបទល្មើសព្រៃឈើនៅតែបណ្តែបណ្តោយឲ្យជនជាតិវៀតណាមមកដើរទិញឈើដល់ប្រភពឈើរបៀបនេះអនាគតទៅមិនក្រោយ២ឆ្នាំទៀតទេឈើក្នុងខេត្តរតនគិរីពិតជារលាយហើយ៕
ចែករំលែកព័តមាននេះ