ខេត្តបាត់ដំបង៖ ក្រុមអ្នកលក់ដូរថ្មាំញៀនដ៏ព្រហើនចំនួន៤នាក់ មានទាំងស្ត្រីម្នាក់ផង ត្រូវបានកម្លាំងកងរាជអាវុធហត្ថព័ទ្ធឃាត់ខ្លួន កាលពីម៉ោង១០ និង៣០នាទីព្រឹកថ្ងៃទី០៨ វិច្ឆិកា នេះ ខណ:ដែលពួកគេកំពុងនាំគ្នាច្រកថ្នាំញៀនលក់ដូចលក់នំ នៅក្នុងរោងមួយកន្លែង នៅខាងមុខអនុវិទ្យាល័យឈើទាល ភូមិឈើទាល ឃុំឈើទាល ស្រុកបាណន់ ។
មន្ត្រីកងរាជអាវុធហត្ថបានឲ្យដឹងថា ក្រុមប្រព្រឹត្តបទល្មើសគ្រឿងញៀនដ៏ព្រហើនទាំង៤នាក់ ដែលត្រូវឃាត់ខ្លួនមាន ១-ឈ្មោះធឿត វ៉ាន់ថា ភេទប្រុស អាយុ២៧ឆ្នាំឆ្នាំ រស់នៅភូមិឈើទាល ឃុំឈើទាល ស្រុកបាណន់ ២-ឈ្មោះសៀក សៅលី ភេទប្រុស អាយុ២២ឆ្នាំ ជាអ្នកបិទស្កុតម៉ូតូ រស់នៅភូមិច្រាបក្រសាំង សង្កាត់វត្តគរ ក្រុងបាត់ដំបង ៣-ឈ្មោះជួប សង្ហា ភេទប្រុស អាយុ៣២ឆ្នាំ ធ្វើស្រែ រស់នៅភូមិកំពង់ស្រម៉ ឃុំឈើទាល ស្រុកបាណន់ និង៤-ឈ្មោះម៉ៅ ស្រីប៉ោះ ភេទស្រី អាយុ១៧ឆ្នាំ មុខរបរគ្មាន រស់នៅភូមិឥន្ទជិត ឃុំឈើទាល ស្រុបាណន់។
មន្ត្រីដដែលបានប្រាប់ថា ក្រុមជួញដូរគ្រឿងញៀនទាំង៤នាក់នេះ ត្រូវកម្លាំងកងរាជអាវុធហត្ថបង្ក្រាបបាន ពេលពួកគេកំពុងនាំគ្នាអង្គុយច្រកថ្នាំញៀននៅក្នុងរោងមួយ ស្ថិតនៅខាងមុខអនុវិទ្យាល័យឈើទាល ដោយគ្មានខ្លាចក្រែងសមត្ថកិច្ច ឬក្រែងភ្នែកប្រជាពលរដ្ឋនៅទីនោះឡើយ ។
នៅក្នុងរបាយការណ៍សមត្ថកិច្ចថា ជាមួយនឹងការឃាត់ខ្លួនជនទាំង៤នាក់នេះ កម្លាំងជំនាញបានដកហូតនូវវត្ថុតាងនានាដូចជាថ្នាំញៀន ប្រភេទមេតំហ្វេតាមីន ICE (ម៉ាទឹកកក) ចំនួន២កញ្ចប់ធំ មានទម្ងន់៤,៤៦ក្រាម, ថង់សម្រាប់ច្រកថ្នាំចំនួន១២ដុំ ដែកកេស០៦, កន្ត្រៃ០១ និងឧបករណ៏សម្រាប់ជក់ថ្នាំញៀនមួយចំនួនទៀត។ មន្ត្រីកងរាជអាវុធហត្ថដដែលថា ក្រុមជនសង្ស័យបានសារភាពទទូលស្គាល់នូវសកម្មភាពល្មើសច្បាប់របស់ខ្លួនហើយ។
ចែករំលែកព័តមាននេះ