កាលពីរសៀលថ្ងៃទី ១២ ខែតុលា ឆ្នាំ២០១៨ ក្នុងពិធីដុតបំផ្លាញវត្ថុតាងផលិតផលក្លែងក្លាយលើកទី ២៧ រៀបចំឡើងដោយនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដោយមានការចូលរួមពីព្រះរាជអាជ្ញាអមសាលាដំបូងរាជធានីភ្នំពេញ តំណាងអគ្គនាយកដ្ឋានស្ដង់ដារកម្ពុជា តំណាងប្រធាននាយកដ្ឋានកណ្ដាលនគរបាលយុត្តិធម៌…
កាលពីរសៀលថ្ងៃទី ១២ ខែតុលា ឆ្នាំ២០១៨ ក្នុងពិធីដុតបំផ្លាញវត្ថុតាងផលិតផលក្លែងក្លាយលើកទី ២៧ រៀបចំឡើងដោយនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដោយមានការចូលរួមពីព្រះរាជអាជ្ញាអមសាលាដំបូងរាជធានីភ្នំពេញ តំណាងអគ្គនាយកដ្ឋានស្ដង់ដារកម្ពុជា តំណាងប្រធាននាយកដ្ឋានកណ្ដាលនគរបាលយុត្តិធម៌ តំណាងគណៈកម្មាធិការប្រយុទ្ធប្រឆាំងផលិតផលក្លែងក្លាយ និងតំណាងនាយកដ្ឋានឱសថចំណីអាហារនៃក្រសួងសុខាភិបាល និងអាជ្ញាធរមូលដ្ឋាន
សមត្ថកិច្ចបានធ្វើការដុតបំផ្លាញចោលហើយនូវបារី 555 ក្លែងក្លាយសរុបប្រមាណជាជាង១០០០ សុង ដែលអាជ្ញាធរដកហូតបានពីអាជីវករលក់បារីក្លែងក្លាយក្នុងទីតាំងផ្សារធំថ្មី និងផ្សារកណ្ដាល កាលពីប៉ុន្មានខែកន្លងទៅ ដែលគិតជាទឹកប្រាក់សរុបប្រមាណជាជាង ១៥.០០០ ដុល្លារសហរដ្ឋអាមេរិក រួមទាំងផលិតផលក្លែងក្លាយផ្សេងៗទៀត។
យោងតាមប្រសាសន៍ឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃ នាថ្ងៃដុតបំផ្លាញផលិតផលក្លែងក្លាយនោះបានឲ្យដឹងថា «នេះជាលើកទី ២៧ ហើយដែលនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃធ្វើការដុតបំផ្លាញចោលនូវវត្ថុតាងផលិតផលក្លែងក្លាយ ដែលលើកនេះ រួមមានទាំងផលិតផលបារី 555 ក្លែងក្លាយប្រមាណជាជាង ១.០០០ សុងផងដែរ ដែលនាយកដ្ឋានយើងបានរឹបអូសក្រោមបណ្ដឹងពីក្រុមហ៊ុនទទួលសិទ្ធិចែកចាយលក់ផ្ដាច់មុខនូវយីហោបារីម៉ាក 555 នេះ»។
ថ្លែងក្នុងគ្រានោះ លោក វរសេនីយ៍ឯក ម៉ាត់ យូសុះ នាយការិយាល័យនគរបាលប្រឆាំងបទល្មើសកម្មសិទ្ធិបញ្ញានៃនាយកដ្ឋាននគរបាលប្រឆាំងបទល្មើសសេដ្ឋកិច្ច បន្ថែមថា «បច្ចុប្បន្នសមត្ថកិច្ច បានរៀបចំផែនការរួចជាស្រេច ក្នុងការបន្តចុះបង្ក្រាបនិងអនុវត្តច្បាប់ ដែលឈានទៅដល់ការ ដាក់ពិន័យដល់អាជីវករ និងរឹបអូសផលិតផលបារីក្លែងក្លាយ ដែលមាននៅលើទីផ្សារទាំងអស់ ក្នុងគោលបំណងលុបបំបាត់រាល់អាជីវកម្មខុសច្បាប់ ដែលបណ្ដាលឲ្យប៉ះពាល់ដល់សុខភាពប្រជាពលរដ្ឋ ។
ហើយឆ្លៀតឱកាសនេះ លោកក៏សូមអំពាវនាវ និងព្រមានដល់បងប្អូនអាជីវករទាំងអស់ ឲ្យបញ្ឈប់រាល់សកម្មភាពទិញ និងចែកចាយលក់ផលិតផលបារីក្លែងក្លាយតទៅទៀត ជៀសវាងការប្រឈមមុខច្បាប់ដូចករណីនេះជាឧទាហរណ៍ស្រាប់»។
ការតាំងលក់បារីក្លែងក្លាយ គឺជាកាយវិការចូលរួមលើកតម្កើនការចរាចរផលិតផលក្លែងក្លាយ ហើយថែមទាំងនាំមកនូវការខាតបង់ និងជាប់ទោសទណ្ឌដល់ខ្លួនទៀតផង ហើយលក្ខណៈសម្គាល់បឋមរបស់បារីក្លែងក្លាយគឺ គ្មានបិតតែមប្រិ៍អាករ គ្មានសារព្រមានសុខភាពជារូបភាព និងជាអក្សរខ្មែរ តែអាចមានសារព្រមានជាភាសាបរទេស។ ដោយសហការ
ចែករំលែកព័តមាននេះ