ខេត្តកំពង់ស្ពឺ ៖ ជនសង្ស័យចំនួន២នាក់បានប៉ុនប៉ងសម្លាប់មនុស្សរស់នៅភូមិផងរបងក្បែរគ្នា តែមិនសម្រេច រួចរត់គេចខ្លួនចោលផ្ទះសម្បែងជិត១០ឆ្នាំ ស្រាប់តែស្ងាត់ៗលបចូលភូមិវិញ ត្រូវសមត្ថកិច្ចចាប់តាមដីកាតុលាការ បានទាំង២នាក់ កាលពីថ្ងៃទី៣០ ខែតុលា ឆ្នាំ២០១៨ ស្ថិតក្នុងភូមិរំលោង និងភូមិត្បែស ឃុំវល្លិសរ ស្រុកសំរោងទង។
ជនសង្ស័យទី១-ឈ្មោះ ទូច ដាន ភេទប្រុស អាយុ៣៤ឆ្នាំ រស់នៅភូមិរំលោង ឃុំវល្លិសរ ស្រុកសំរោងទង និងជនសង្ស័យទី២-ឈ្មោះ ឆ្នាំ ប៊ុននឿន ភេទប្រុស អាយុ៣៥ឆ្នាំ រស់នៅភូមិត្បែស ឃុំវល្លិសរ ស្រុកសំរោងទង ខេត្តកំពង់ស្ពឺ។
ប្រភពពីសមត្ថកិច្ចនគរបាលព្រហ្មទណ្ឌកម្រិតធ្ងន់ ឲ្យដឹងថា មុនឈានដល់បង្ក្រាបមុខសញ្ញាមនុស្សឃាតនេះ មានគេរាយការណ៍ថា បានឃើញជនសង្ស័យទាំង២នាក់វិលចូលភូមិវិញ ដែលពួកគេបានរត់ចោលផ្ទះតាំងពីឆ្នាំ២០០៩មកម្ល៉េះ។
ប្រភពដដែលបន្តថា ជនសង្ស័យទី១ មានដីកាបង្គាប់ឲ្យចាប់ខ្លួនលេខ៣៩០ ចុះថ្ងៃទី១៣ ខែធ្នូ ឆ្នាំ២០១៤ របស់លោកសុង ប៊ុណ្ណារិទ្ឋ ចៅក្រមសាលាដំបូងខេត្តកំពង់ស្ពឺ។ ចំណែកជនសង្ស័យទី២ មានដីកាបង្គាប់លេខ៣៨៨ ចុះថ្ងៃជាមួយគ្នារបស់លោកចៅក្រមខាងលើ។
សមត្ថកិច្ច បានបញ្ជាក់ថា ជនសង្ស័យទាំង២បានប៉ុនប៉ងមនុស្សឃាតតាំងពីឆ្នាំ២០០៩ តែមិនសម្រេចរួចរត់ចោលផ្ទះរហូតមិនដឹងទៅរស់នៅលាក់ខ្លួននៅទីណាទេ ស្រាប់តែថ្មីៗនេះ គេឃើញជនសង្ស័យលបចូលស្រុកវិញ ទើបកម្លាំងនគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ត ដឹកដោយលោកវរសេនីយ៍ឯក សម សាក់ នាយការិយាល័យ សហការជាមួយកម្លាំងនគរបាលអធិការដ្ឋានស្រុកសំរោងទង អនុវត្តដីកាតុលាការចុះឃាត់ខ្លួនជនសង្ស័យទាំង២នាក់ខាងលើ នៅផ្ទះពួកគេរៀងៗខ្លួន។
ក្រោយមកធ្វើកំណត់ហេតុរួច សមត្ថកិច្ចការិយាល័យព្រហ្មទណ្ឌកម្រិតធ្ងន់ បានបញ្ជូនខ្លួនជនសង្ស័យទាំង២នាក់ ទៅកាន់សាលាដំបូង វិនិច្ឆ័យទោសតាមច្បាប់៕
ចែករំលែកព័តមាននេះ