រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក អ៊ិត សំហេង បានឲ្យដឹងថា ជប៉ុនបានបើកឱកាសការងារជាច្រើនដល់យុវជនកម្ពុជាក្នុងការធ្វើការងារជាមួយក្រុមហ៊ុនធំៗនៅប្រទេសជប៉ុន ។ ការអះអាងរបស់លោករដ្ឋមន្ត្រីធ្វើក្នុងជំនួបពិភាក្សាការងារជាមួយលោក…
រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក អ៊ិត សំហេង បានឲ្យដឹងថា ជប៉ុនបានបើកឱកាសការងារជាច្រើនដល់យុវជនកម្ពុជាក្នុងការធ្វើការងារជាមួយក្រុមហ៊ុនធំៗនៅប្រទេសជប៉ុន ។
ការអះអាងរបស់លោករដ្ឋមន្ត្រីធ្វើក្នុងជំនួបពិភាក្សាការងារជាមួយលោក Yohei Shibasaki នាយកប្រតិបត្តិនៃក្រុមហ៊ុន Fourth Valley Concierge ជាក្រុមហ៊ុនដ៏ធំមួយរបស់ជប៉ុន ដើម្បីផ្តល់ឱកាសការងារដល់យុវជន សិស្សនិស្សិតនៅតាមបណ្តាប្រទេសនានាក្នុងតំបន់អាស៊ីអាគ្នេយ៍ ដើម្បីមានឱកាសទៅធ្វើការនៅប្រទេសជប៉ុន កាលពីរសៀលថ្ងៃទី៣០ តុលា ឆ្នាំ២០១៨ នៅទីស្តីការក្រសួង ។
ក្នុងជំនួបលោក Yohei Shibasaki នាយកប្រតិបត្តិក្រុមហ៊ុនលើកឡើងថា គោលបំណងដែលរូបលោក និងក្រុមការងារចូលជួបសម្តែងការគួរសម និងពិភាក្សាការងារជាមួយលោករដ្ឋមន្ត្រីនាពេលនេះ គឺដើម្បីសុំកិច្ចគាំទ្រពីខាងក្រសួងការងារ និងបណ្តុះបណ្តលវិជ្ជាជីវៈ ដើម្បីបើកការិយាល័យក្រុមហ៊ុននៅកម្ពុជាក្នុងការបណ្តុះបណ្តាលយុវជនកម្ពុជាមុននឹងបញ្ជូនទៅបម្រើការងារនៅប្រទេសជប៉ុន ។ លោកនាយកប្រតិបត្តិក្រុមហ៊ុនលើកឡើងថា ក្រុមហ៊ុនរបស់លោកមានបទពិសោធន៍១០ឆ្នាំមកហើយ នៅតំបន់អាស៊ីអាគ្នេយ៍ គឺទទួលបានជោគជ័យជាខ្លាំង ។ បច្ចុប្បន្ននេះយុវជនកម្ពុជាក៏មានសមត្ថភាពដូចយុវជនដទៃទៀត នៅតាមបណ្តាប្រទេសមួយចំនួនដែលទទួលបានឱកាសទៅធ្វើការនៅប្រទេសជប៉ុន ។
ឆ្លើយតបទៅនឹងគោលបំណងនេះ លោករដ្ឋមន្ត្រីរីករាយស្វាគមន៍ និងគាំទ្រចំពោះសំណើរនេះ ដោយស្នើដល់ក្រុមហ៊ុនត្រូវរៀបចំឯកសារតាមនីតិវិធីដែលតម្រូវទៅតាមច្បាប់ជាមុនសិន ។ លោករដ្ឋមន្ត្រីមានប្រសាសន៍ថា រដ្ឋាភិបាលកម្ពុជារីករាយ និងស្វាគមន៍ចំពោះកិច្ចសហប្រតិបត្តិការជាមួយរដ្ឋាភិបាលជប៉ុនដែលមកដល់ពេលនេះកម្ពុជាមានក្រុមហ៊ុនសហគ្រាសជាច្រើនរបស់ជប៉ុនចូលមកវិនិយោគនៅកម្ពុជា ។ រីឯខាងផ្នែកវិស័យការងារវិញកម្ពុជាក៏បានបញ្ជូនកម្មសិក្សាការីទៅធ្វើការនៅជប៉ុនក៏ច្រើនដែរមកដល់ពេលនេះកម្មសិក្សាការីកម្ពុជាមានប្រហែលជាង៨ពាន់នាក់ កំពុងធ្វើកម្មសិក្សានៅទីនោះដែលនៅជប៉ុនមានកម្លាំងពលកម្មច្រើនទាក់ទងទៅនឹងឧស្សាហកម្មកសិកម្មសេវាកម្ម និងថែទាំមនុស្សចាស់ជាដើម ។
បើតាមការបញ្ជាក់ ពីលោក ងុយ រិទ្ធ នាយករងខុដ្ឋកាល័យ លោករដ្ឋមន្ត្រីបានឲ្យដឹងថា ក្រុមហ៊ុននេះនឹងរៀបចំដំណើរការផ្តល់វគ្គបណ្តុះបណ្តាលដល់និស្សិតវ័យក្មេងទទួលបានឱកាសទៅធ្វើការនៅជប៉ុនជាមួយនឹងក្រុមហ៊ុនល្បីៗ ។ ក្រុមហ៊ុនទាំងនោះបានផ្តល់ឱកាសទៅដល់ប្រទេសជាច្រើន នៅក្នុងតំបន់ ហើយបច្ចុប្បន្នក្រុមហ៊ុននេះបានពង្រីកខ្លួនមកដល់ប្រទេសកម្ពុជាដែរហើយ ។ លោកបានបញ្ជាក់ថា «យុវជននិស្សិតកម្ពុជានឹងទទួលបាននូវឱកាសចេញទៅធ្វើការនៅជប៉ុនជាមួយក្រុមហ៊ុនធំៗ រយៈពេលពី៥ទៅ១០ឆ្នាំ ។
នេះជាឱកាសដែលយើងមិនធ្លាប់មានពីមុនដែលពីមុនកម្ពុជាបញ្ជូនត្រឹមជាសិក្ខាកាម ឬជាអ្នកហាត់ការទេមិនទាន់បានទទួលទិដ្ឋការការងារនៅឡើយទេ ប៉ុន្តែក្រុមហ៊ុននេះផ្តល់ឱកាសឲ្យយុវជនកម្ពុជាទទួលបាននូវទិដ្ឋការការងារតែម្តងធ្វើការបានរហូតពី៥ទៅ១០ឆ្នាំឯណោះ ។ ពេលដែលយុវជនកម្ពុជាបានទៅធ្វើការជាមួយក្រុមហ៊ុនល្បីៗពួកគេនឹងមានសមត្ថភាពកាន់តែខ្ពស់ ខណៈបានវិលត្រឡប់មកបម្រើការងារឲ្យក្រុមហ៊ុនជប៉ុននៅក្នុងប្រទេសជាតិវិញ ដែលជាប្រភពធនធានមនុស្សដ៏សំខាន់ចាំបាច់ឆ្លើយតបទៅនឹងគោលនយោបាយរបស់រដ្ឋាភិបាលកម្ពុជា» ៕
ចែករំលែកព័តមាននេះ